រាជធានីភ្នំពេញ ៖ បុរសម្នាក់ដែលគេស្គាល់ថា ជាតារាសម្តែង ហើយត្រូវជាមិត្តប្រុសរបស់តារាចម្រៀងអ្នកនាង ពេជ្រ សោភា ត្រូវបានជនសង្ស័យធ្វើសកម្មភាពឆក់ទូរស័ព្ទដៃយកទៅបាត់បានសម្រេច ខណៈពេលដែលកំពុងជិះម៉ូតូកង់បីមកពីហូបពោតស្ងោរ បង្កឱ្យមានការភ្ញាក់ផ្អើលកាលពីម៉ោង១និង៣០នាទីរំលងអធ្រាត្រឈានចូលថ្ងៃទី១៨ ខែមករា ឆ្នាំ២០១៨ ត្រង់ចំណុចខាងកើតស្តុបពេទផន តាមបណ្ដោយផ្លូវ១៨២ ស្ថិតក្នុងសង្កាត់ផ្សារដេប៉ូទី១ ខណ្ឌទួលគោក។
តារាសម្តែងរងគ្រោះដោយសារជនសង្ស័យឆក់មានឈ្មោះ ឆឹម សក្កដា អាយុ28ឆ្នាំ ជាតារាសម្ដែង និងតារាម៉ូដែល ស្នាក់នៅក្នុងសង្កាត់បឹងសាឡាង ខណ្ឌទួលគោក។
តាមសម្តីតារាសម្ដែងខាងលើបានរៀបរាប់ប្រាប់ឱ្យដឹងថា នៅមុនពេលកើតហេតុ គាត់បានហៅម៉ូតូកង់បីឥណ្ឌាមួយគ្រឿង ជិះចេញពីផ្ទះនៅម្តុំបឹងសាឡាងតែម្នាក់ឯង គោលបំណងទៅហូបពោតស្ងោនៅម្តុំវិមានឯករាជ្យ។
ពេលហូបរួចហើយ គាត់ក៏បានជិះត្រលប់មកផ្ទះវិញ ដោយបានធ្វើដំណើរតាមបណ្ដោយផ្លូវ១៨៧ ក្នុងទិសដៅពីកើតទៅលិច មកដល់ចំណុចកើតហេតុ គាត់ក៏បានដកទូរស័ព្ទដៃមួយគ្រឿងម៉ាក Oppo R17 Pro របស់គាត់យកមកលេងហ្វេសប៊ុក ស្រាប់តែលេចមុខជនសង្ស័យ២នាក់ជិះម៉ូតូមួយគ្រឿងម៉ាកហុងដាឌ្រីម មិនចាំស្លាកលេខ មកពីក្រោយ រួចក៏ឆក់ទូរស័ព្ទដៃពីរូបគាត់ បណ្ដោយឱ្យទូរស័ព្ទជ្រុះទៅលើដី ភ្លាមៗនោះក៏មានបក្សពួករបស់ជនសង្ស័យជិះម៉ូតូមួយគ្រឿងផ្សេងទៀត មករើសយកទូរស័ព្ទដៃរបស់គាត់រួចជិះរត់គេចខ្លួនបាត់ស្រមោល។
លោក ឆឹម សក្កដា បានបញ្ជាក់ទៀតថា គាត់មិនសូវស្តាយទូរស័ព្ទដៃដែលត្រូវក្រុមចោរឆក់យកទៅនោះទេ គឺគាត់ស្តាយឯកសារសំខាន់ៗដែលគាត់បានរក្សាទុកក្នុងទូរស័ព្ទដៃនោះ គឺមានដូចជា ម៉ែរូឡូឌីចម្រៀង និងបារ៉ូរឿងខ្លីៗដែលគាត់បាននិពន្ធជាច្រើន ជាឯកសារដែលគាត់គ្រោងចូលទៅក្នុងផលិតកម្មមួយក្នុងពេលឆាប់ៗខាងមុខនេះផងដែរ។
ក្រោយពេលកើតហេតុតារាសម្ដែងខាងលើត្រូវបានសមត្ថកិច្ចមូលដ្ឋាននាំទៅសួរនាំ និងដាក់ពាក្យបណ្ដឹងនៅប៉ុស្តិ៍នរគបាលរដ្ឋបាលផ្សារដេប៉ូទី១ ដើម្បីសមត្ថកិច្ចស្រាវជ្រាវរកជនសង្ស័យយកមក ផ្តន្ទាទោសទៅតាមផ្លូវច្បាប់៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
