បរទេស៖ Zlatan Imbrahimovic បានធ្វើការវាយប្រហារពាក្យសម្ដីខ្លាំងៗ ទៅកាន់កីឡាករ Cristiano Ronaldo អំពីរឿងដែល Ronaldo បានបបួល Lionel Messi ទៅអ៊ីតាលីដើម្បមានការប្រកួតប្រជែងថ្មីៗ។ កីឡាករ Cristiano Ronaldo បានធ្វើការផ្លាស់ចេញពី Real Madrid ទៅកាន់ Juventus ក្នុងតម្លៃខ្លួន ១០០លានផោន ហើយបច្ចុប្បន្ននេះរូបគេគឺជា Top Scorer នៅ Serie A ដោយរកបាន ១៤គ្រាប់ហើយក្នុងរដូវកាលនេះ។
ក្រោយពីផ្លាស់ទៅអ៊ីតាលីបានមួយរយៈពេលខ្លី Ronaldo បានបបួល Messi ឱ្យផ្លាស់មកកាន់ទីនេះ (អ៊ីតាលី) ជាមួយគ្នា។ Ronaldo មានបំណងចង់ឱ្យ Messi មកស្វែងរកការប្រកួតប្រជែងថ្មីមួយដែលអាចបង្ហាញថារូបគេពិតជាកីឡាករល្អបំផុតមួយរូបពិតប្រាកដមែន។ Ronaldo បាននិយាយថា៖ “ខ្ញុំចង់ឱ្យគេ(Messi) មកកាន់ទឹកដីអ៊ីតាលីនៅថ្ងៃណាមួយ, ខ្ញុំសង្ឃឹមថាគេនឹងចូលចិត្តការប្រកួតប្រជែងថ្មីៗបែបនេះ ប៉ុន្តែបើសិនជាគេរីករាយនៅអេស្ប៉ាញ អីចឹងខ្ញុំក៏គោរពក៏សម្រេចចិត្តបែបនេះដែរ។”
Ronaldo បានបន្ថែមថា៖ “ខ្ញុំធ្លាប់លេងនៅព័រទុយហ្គាល់,អង់គ្លេស,អេស្ប៉ាញ និងអ៊ីតាលី ខណៈដែល Messi ស្ថិតនៅអេស្ប៉ាញតាំងពីដើមមក, ប្រហែលជាគេត្រូវការអ្វីជាច្រើនបន្ថែមទៀត, សម្រាប់ខ្ញុំជីវិតគឺជាការប្រកួតប្រជែង ហើយខ្ញុំក៏ចូលចិត្តបែបនេះ, ចំពោះ Messi រូបគេជាកីឡាករដ៏អស្ចារ្យម្នាក់ និងជាមនុស្សល្អម្នាក់ផងដែរ”។
ទោះបីជាបែបណាក្តី កីឡាករដែលធ្លាប់ឈ្នះពាននៅ ហូឡង់,អ៊ីតាលី,អេស្ប៉ាញ និងនៅបារាំង Zlatan Imbrahimovic បាននិយាយថា Messi មិនមានអ្វីត្រូវបញ្ជាក់ទៀតទេ ហើយ Zlatan ក៏បាននិយាយពីការផ្លាស់ទៅកាន់ Juventus របស់ Ronaldo ផងដែរ។ Zlatan បាននិយាយថា៖ “CR7 បាននិយាយពីការប្រកួតប្រជែងថ្មី, ការប្រកួតប្រជែងថ្មីសម្រាប់គេគឺការផ្ទេរទៅកាន់ ក្លិបដែលឈ្នះពាន Serie A ឡើងធម្មតាទៅហើយ” Zlatan បាននិយាយបែបឌឺដងបន្ថែមថា៖ “ហេតុអ្វីទើប Ronaldo មិនទៅចូលរួមជាមួយក្លិបដែលទើបតែឡើងមកពីលីគទី២”? “បើសិនគេមានការប្រកួតប្រជែងជាមួយក្លិបដែលទើបឡើងមកកាន់លីគកំពូល ហើយជួយឱ្យក្លិបលើកពានលីគកំពូល នោះទើបជាការប្រកួតប្រជែងពិតប្រាកដ”, “វាមិនខ្មេះទេ ! ចូលរួមជាមួយ Juventus តាមពិតទៅវាគ្មានលក្ខណៈជាការប្រកួតប្រជែងសោះឡើយ” Zlatan បានបន្ថែមដូច្នេះ។
គួរបញ្ជាក់ថា បច្ចុប្បន្ននេះ Zlatan កំពុងប្រកបអាជីពនៅក្លិប LA Galaxy នាក្របខណ្ឌ MSL របស់អាមេរិក ដោយបង្ហាញខ្លួនបាន ២៧ដង និងរកគ្រាប់បាល់បាន ២២គ្រាប់៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]