បរទេស៖ ថ្មីៗនេះក្រុមហ៊ុនស្រាវជ្រាវនិងរុករកធនធានកម្រនៅបាតសមុទ្រ OceanGate បានប្រកាសក្តែងៗថា នាពេលខាងមុខនេះភ្ញៀវទេសចរទាំងអស់នឹងអាចចុះទៅទស្សនាកប៉ាល់យក្ស Titanic ដែលបានលិចនៅមហាសមុទ្រអាត្លង់ទិចបានហើយ។ យ៉ាងណាមិញពួកគេត្រូវចំណាយទឹកប្រាក់ប្រមាណ ១០៥,១២៩ ដុល្លារដើម្បីអាចចុះទៅទស្សនាបាន។ នេះយោងតាមសារព័ត៌មាន Metro ដែលបានចេញផ្សាយនៅថ្ងៃទី ១៧ ខែ ធ្នូ ឆ្នាំ ២០១៨។
ដំណើរកម្សាន្តមួយនេះនឹងអនុញ្ញាតឲ្យភ្ញៀវទេសចរអាចយល់ដឹងបន្ថែមពីអ្វីផ្សេងៗដែលមាននៅបាតសមុទ្រដោយផ្ទាល់។ យោងតាមសារព័ត៌មានដដែលបានឲ្យដឹងថា ក្រុមហ៊ុន OceanGate នឹងប្រើកប៉ាល់ជ្រមុជទឹកមួយឈ្មោះថា Titan សម្រាប់ដឹកភ្ញៀវទៅកន្លែងកើតហេតុ ដោយត្រូវចំណាយថេរវេលាសរុបប្រហែល ៧ម៉ោង។
គួររម្លឹកផងដែរ កន្លងមកក្រុមហ៊ុន OceanGate បានទទួលជោគជ័យម្តងរួចមកហើយក្នុងការជ្រមុជទឹកចូលបាតសមុទ្រនៅកោះ Bahamas។
ភ្ញៀវទេសចរណាដែលចង់ចុះទៅទស្សនាកប៉ាល់ Titanic គេតម្រូវឲ្យចេះជ្រមុជទឹក (Dive)។ ករណីភ្ញៀវណាមិនទាន់ចេះជ្រមុជទឹក ពួកគេនឹងត្រូវចូលរួមហាត់ហ្វឹកជាមួយនាវិកបេសកកម្មជាមុនសិន។
រហូតដល់ចេះជ្រមុជទឹកស្ទាត់ ទើបក្រុមហ៊ុនអនុញ្ញាតឲ្យចុះទៅទស្សនាកប៉ាល់ Titanic។ ក្រុមនាវិកបេសកកម្មនឹងនាំទៅកន្លែងដែលនាវា Titanic លិច និងឲ្យអ្នកបានឃើញអ្វីប្លែកៗ និងទ្រុងទា្រយនាវាទាំងមូលដែលមាននៅទីនោះ។
គួរបញ្ជាក់ថា នាវាយក្ស Titanic បានលិចកាលពីថ្ងៃទី ១៤ ខែ មេសា ឆ្នាំ១៩១២។ Titanic ជានាវាយក្សធំបំផុតមួយលើពិភពលោកនាសម័យកាលនោះ។
មហាវិនាសកម្មនៃការលិចកប៉ាល់ Titanic បានលេបត្របាក់ជីវិតអ្នកដំណើរសរុប ១៥០៣នាក់។ អំឡុងពេលលិច Titanic មានទូកសង្រ្គោះជីវិតត្រឹម២០គ្រឿងប៉ុណ្ណោះ។ ក្នុងនោះទូកមួយអាចសង្គ្រោះជីវិតអ្នកដំណើរបាន ៦៥នាក់៕
មានវីដេអូនៅខាងក្រោម៖
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក ប្លែកៗ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
