ខេត្តបន្ទាយមានជ័យ ៖ សេចក្តីរាយការណ៍បឋមឱ្យដឹងថា មានហេតុការណ៍ដ៏ភ្ញាក់ផ្អើលមួយនាព្រឹកថ្ងៃទី២៤ វិច្ឆិកា នេះ ត្រង់ចំណុចក្បែរកន្លែងកម្សាន្តអាងអូរខៃដន ស្ថិតក្នុងភូមិកូនដំរី សង្កាត់និមិត្ត ខណៈដែលនៅក្នុងរថយន្តមួយគ្រឿងបានប្រទះព្រះសង្ឃ១អង្គ ដោយមានឈាមប្រឡាក់ពេញរថយន្តផងដែរ ហាក់ដូចជាមានជម្លោះហិង្សាណាមួយកើតឡើង ។
សេចក្តីរាយការណ៍បន្តថា ករណីនេះ មិនត្រឹមតែមានព្រះសង្ឃខាងលើនោះទេ គឺអ្នកស្រុកបានឃើញមានស្ត្រីម្នាក់ទៀតរងរបួសធ្ងន់បានស្រែកហៅឱ្យគេជួយ ពេលនោះក៏បាននាំទៅសង្គ្រោះបាត់ទៅ ខណៈដែលរថយន្តនេះត្រូវអ្នកស្រុកអះអាងថា ជារបស់ស្ត្រីរូបនោះ ។
ទោះបីជាយ៉ាងណា ពេលនេះសមត្ថកិច្ចនៅមិនទាន់ដឹងថា រឿងនេះ ជាករណីអ្វីនោះទេ។ បច្ចុប្បន្ន សមត្ថកិច្ចបាននាំព្រះសង្ឃអង្គនោះទៅសាកសួរនៅអធិការដ្ឋាននគរបាលក្រុងប៉ោយប៉ែតហើយ ហើយក៏កំពុងតាមរកស្ត្រីរូបនោះផងដែរ ។
ព័ត៌មានបន្ថែមនឹងមានផ្សាយជូនបន្ត ។
ប្រភព៖ កោះសន្តិភាព
Update លើព័ត៌មានខាងលើនេះ ៖
ថាម៉េច…ដោយសារលោកប្រចណ្ឌជាមួយស្រីនោះ?
ខេត្តបន្ទាយមានជ័យ ៖ សេចក្តីរាយការណ៍បន្តថា ទាក់ទិនករណីព្រះសង្ឃ១អង្គដែលស្ថិតក្នុងរថយន្តមួយគ្រឿង មានប្រឡាក់ឈាមពេញនោះគិតត្រឹមម៉ោង១០ព្រឹកថ្ងៃទី២៤ វិច្ឆិកា ដដែលនេះ គឺត្រូវបានមន្ត្រីធម្មការសង្ឃធ្វើការសម្រេចចាប់ផ្សឹកហើយ ដើម្បីប្រគល់ជូនទៅសមត្ថកិច្ច មានចំណាត់ការបន្តតាមផ្លូវច្បាប់ ខណៈត្រូវបានស្រាវជ្រាវដឹងថា សង្ឃនេះបានយកដែកឆាបទៅចាក់លើស្ត្រីម្នាក់នោះ ដោយសារតែរឿងប្រចណ្ឌ ។
សេចក្តីរាយការណ៍បន្តថា សង្ឃអង្គនេះគង់នៅវត្តស្វាយចាស់ ក្នុងភូមិកំពង់ស្វាយ សង្កាត់ព្រះពន្លា ក្រុងសិរីសោភ័ណ ឈ្មោះទន់ សាវន អាយុ៥២ឆ្នាំ ។ ដោយឡែក ស្ត្រីរងគ្រោះត្រូវគេដឹងថា ជាអាជីវករប្តូរប្រាក់និងវេប្រាក់វីង នៅក្នុងភូមិផ្សារកណ្តាល ឈ្មោះសេង ផល្លា អាយុ៤៦ឆ្នាំ របួសធ្ងន់ ពេលនេះបានចេញទៅប្រទេសថៃ ដើម្បីព្យាបាលរបួស ។
ប្រភពបន្តថា សមត្ថកិច្ចនៅមិនទាន់ដឹងការទំនាក់ទំនងរបស់សង្ឃដែលចាប់ផ្សឹកជាមួយស្ត្រីរងរបួសនោះមានដល់កម្រិតណានោះទេ ដោយបច្ចុប្បន្នសមត្ថកិច្ចកំពុងសាកសួរបន្ត ។
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
