ឥណ្ឌូនេស៊ី៖ ក្រោយឧបទ្ទវហេតុធ្លាក់យន្តហោះនៅឥណ្ឌូនេស៊ីកាលពីចុងខែមុន ក្រុមមុជទឹកសង្គ្រោះបាននិងកំពុងសស្រាក់សស្រាំស្វែងរកសពជនរងគ្រោះ បំណែកយន្តហោះ ប្រអប់ខ្មៅទាំងពីរ និងសម្ភារផ្សេងៗ។ ជាអកុសល សមាជិកក្រុមសង្គ្រោះម្នាក់បានស្លាប់ក្នុងពេលបំពេញភារកិច្ច ខណៈសពជនរងគ្រោះទើបតែស្រង់បានចំនួន ៧២ ក្នុងចំណោម ១៨៩ នាក់ ហើយមានតែសពចំនួន ៤ ប៉ុណ្ណោះ ដែលគេអាចបញ្ជាក់អត្តសញ្ញាណបាន។ នេះបើតាមសារព័ត៌មាន Dailymail របស់ចក្រភពអង់គ្លេស។
បុរសមុជទឹករូបនោះមានឈ្មោះ Syachrul Anto អាយុ ៤៨ ឆ្នាំ បានដួលសន្លប់បាត់ស្មារតីរហូតដល់ស្លាប់ បន្ទាប់ពីងើបឡើងគោកវិញ ក្រោយមុជទឹកដល់ទីតាំងបំណែកយន្តហោះ Lion Air Boeing 737 MAX ដែលរប៉ាត់រប៉ាយក្នុងបាតសមុទ្រជម្រៅជិត ៣០ ម៉ែត្រ។
ប្រធានក្រុមស្វែងរកនិងសង្គ្រោះឥណ្ឌូនេស៊ី Basarnas គឺលោក Muhammad Syaugi បានមានប្រសាសន៍ថា “យើងសូមចូលរួមរម្លែកទុក្ខយ៉ាងជ្រាលជ្រៅចំពោះការបាត់បង់ជីវិតវីរបុរសនៃមនុស្សជាតិពីក្រុមមុជទឹកសង្គ្រោះឥណ្ឌូនេស៊ី”។
គួរបញ្ជាក់ថា អ្នកព្យាយាមសង្គ្រោះគេបែរជាស្លាប់ខ្លួនឯងនេះ ធ្លាប់បំពេញបេសកកម្មក្នុងការស្វែងរកសាកសព បន្ទាប់ពីយន្តហោះមួយគ្រឿងរបស់ក្រុមហ៊ុនអាកាសចរណ៍ Air Asia បានធ្លាក់នៅក្បែរឆ្នេរបរនេអូ កាលពីចុងឆ្នាំ ២០១៤។
ជុំវិញការស្លាប់នេះ គេយល់ថាគាត់ប្រហែលជាដួលស្លាប់ដោយសាររងសម្ពាធខ្លាំង ថ្វីបើមូលហេតុពិតប្រាកដទំនងជាមិនអាចរកឃើញឡើយ ព្រោះភាគីខាងគ្រួសារសពបានសម្រេចចិត្តមិនឱ្យគេធ្វើកុសលវិច្ច័យឡើយ។
គួរឱ្យដឹងថា អ្នកជំនាញយល់ថាគាត់មានអាការមួយដែលគេអាចហៅបាន៥យ៉ាងជាភាសាអង់គ្លេសគឺ Decompression Sickness (DCS), Divers’ Disease, The Bends, Aerobullosis, ឬ Caisson Disease។ អាការនេះកើតឡើងដោយសារឧស្ម័នដែលរលាយ បានប្រែជាពពុះនៅក្នុងរាងកាយអ្នកមុជទឹក ពេលរងសម្ពាធទឹកខ្លាំង៕
សូមទស្សនាវីដេអូខាងក្រោម៖
តើប្រិយមិត្តយល់យ៉ាងណាដែរ?
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]