(កំពត)៖ មន្ដ្រីនគរបាល នៃអធិការដ្ឋាននគរបាលក្រុងកំពតម្នាក់ ក្នុងឯកសណ្ឋានស៊ីវិល បានដកកាំភ្លើងខ្លីចេញពីក្នុងកែបម៉ូតូ ទៅភ្ជង់គំរាមប្រជាពលរដ្ឋនៅតាមដងផ្លូវ នៅតំបន់ទឹកឈូ ហើយត្រូវការគេថតវីដេអូបានបង្ហោះចែកចាយពេញបណ្ដាញសង្គម Facebook បង្កឲ្យមានការរិះគន់ខ្លាំងៗផងដែរ។
ក្រោយទទួលបានព័ត៌មាននេះភ្លាម ស្នងការនគរបាលខេត្តកំពត លោកឧត្តមសេនីយ៍ទោ ម៉ៅ ច័ន្ទមធុរិទ្ធ នៅថ្ងៃទី១៣ ខែតុលា ឆ្នាំ២០១៨នេះ បានបញ្ជាឲ្យកម្លាំងជំនាញចុះស្រាវជ្រាវ និងឃាត់ខ្លួនមន្ដ្រីនគរបាលរូបនោះមកសួរនាំផងដែរ។
ថ្លែងប្រាប់អង្គភាព Fresh News នៅព្រឹកថ្ងៃនេះ លោកឧត្តមសេនីយ៍ទោ ម៉ៅ ច័ន្ទមធុរិទ្ធ បានបញ្ជាក់យ៉ាងដូច្នេះថា «បន្ទាប់ពីទទួលបានព័ត៌មាននេះ ខ្ញុំបានបញ្ជាកម្លាំងជំនាញស្រាវជ្រាវភ្លាមៗ ហើយរកឃើញថា មន្ដ្រីនគរបាលនោះ បម្រើការនៅអធិការដ្ឋាននគរបាលក្រុងកំពត ហើយខ្ញុំបានបញ្ជាកម្លាំងចុះទៅឃាត់ខ្លួនដើម្បីយកមកសួរនាំ»។ តែលោកស្នងការ ក៏មិនទាន់បានបញ្ជាក់ពីអត្តសញ្ញាណនោះទេ គ្រាន់តែបញ្ជាក់ថា បម្រើការងារនៅអធិការដ្ឋាននគរបាលក្រុងកំពត។
បើតាមលោកឧត្តមសេនីយ៍ស្នងការ ក្រោយបញ្ចប់ការសួរនាំ លោកនឹងប្រជុំក្រុមប្រឹក្សាវិន័យ ហើយប្រសិនបើកំហុសមន្ដ្រីនគរបាលនោះធ្ងន់ធ្ងរ អាចនឹងឈានការកាត់ក្របខ័ណ្ឌចោលតែម្ដង ព្រោះលោកមិនបណ្ដែតបណ្ដោយឲ្យមន្ដ្រីនគរបាលដែលជាអ្នកបម្រើប្រជាពលរដ្ឋ ទៅប្រព្រឹត្តទង្វើបែបនេះជាដាច់ខាត។
សូមជម្រាបថា បើតាមការចែកចាយក្នុងបណ្ដាញសង្គម Facebook នោះ ហេតុការណ៍នេះកើតឡើងនៅចំណុចផ្លូវចូលទឹលឈូរ ខេត្តកំពត កាលពីនៅថ្ងៃទី១០ ខែតុលា ឆ្នាំ២០១៨កន្លងទៅថ្មីៗនេះ។
យ៉ាងណាក៏ដោយ សម្រាប់ករណីនេះ គេមិនទាន់ដឹងថា ផ្តើមចេញពីមូលហេតុអ្វីនោះទេ ដែលនាំឲ្យមន្រ្តីនគរបាលរូបនេះ ទាញកាំភ្លើងទៅភ្ជង់ប្រជាពលរដ្ឋនៅលើរថយន្តយ៉ាងដូច្នេះដែរ ខណៈលេខទូរស័ព្ទមួយខ្សែដែលអះអាងថា ជាជនរងគ្រោះនោះ ក៏អង្គភាពព័ត៌មាន Fresh News មិនអាចទាក់ទងសុំការបំភ្លឺបានទេនៅព្រឹកថ្ងៃនេះ៕
ប្រភព៖ Fresh News
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]