រាជធានីភ្នំពេញ ៖ ក្រោយពីបែកធ្លាយរូបភាពស្ត្រីម្នាក់យកស្កុតរុំមាត់កូន ត្រូវបានអ្នក លេងបណ្តាញសង្គមស៊ែរចែករំលែកតៗគ្នា និងធ្វើការរិះគន់តាមរូបភាពទៅលើស្ត្រីជាម្តាយហាក់បីដូចជា ធ្វើទារុណកម្មមកលើកូនប្រុស (តាមរូបភាព) ដូចជាសាហាវ គ្មានក្តីមេត្តា ករុណា ស្រឡាញ់ អាណិត ជាកូនកើតពីផ្ទៃខ្លួន ។
ក៏ប៉ុន្តែនៅយប់ថ្ងៃទី១១ ខែតុលា ឆ្នាំ២០១៨ ស្ត្រីខាងលើត្រូវសមត្ថកិច្ចទៅតាមហៅដល់ផ្ទះ ដើម្បីសាកសួរនៅប៉ុស្តិ៍គោកឃ្លាង ទើបភ្ញាក់ខ្លួនស្រឡាំងកាំងរឿងរូបភាពរុំស្កុតមាត់កូននោះ មិនមែនកូនប្រុសទេ ជាកូនស្រីអស់រយៈពេលជាង៦ខែកន្លងមកហើយ។
ក្រោមវត្តមានទាំងគ្រួសារតែម្តង រួមទាំងកូនស្រីម្នាក់នោះផងដែរ នៅប៉ុស្តិ៍ប៉ូលិសស្ត្រីខាងលើ បានឲ្យដឹងថា គាត់មានឈ្មោះ សុទ្ធ ធារី អាយុ២៨ឆ្នាំ មុខរបរនៅផ្ទះ មានប្តីឈ្មោះ ឈឹម វីរៈ អាយុ៣២ឆ្នាំ មុខរបររត់ម៉ូតូឌុប មានទីលំនៅក្នុងភូមិតំណាក់ សង្កាត់គោកឃ្លាង ខណ្ឌសែនសុខ មានកូន២នាក់ ប្រុសអាយុ៧ឆ្នាំ និងស្រីអាយុ១ខួប៦ខែ មានឈ្មោះ ផល លីណា ។
តាមការរៀបរាប់ស្ត្រីជាម្តាយឲ្យដឹងថា កាលពីអំឡុងជាង៦ខែមុន គ្រាដែលកូនស្រីគាត់អាយុទើប១ខួប នាងជាក្មេងរពឹស ខណៈដែលក្រុមគ្រួសារនៅជុំគ្នាទាំងអស់គ្នាបានលេងជាមួយកូនគាត់ក៏យកស្កុតរុំមាត់កូនស្រីពៅរបស់គាត់លេង មិនមែនកូនប្រុស ដូចអ្នកលេងបណ្តាញសង្គមឃើញរូប ហើយថានោះទេ ក្នុងចេតនាលេងជាមួយកូននៅចំពោះមុខក្រុមគ្រួសារជុំគ្នាទាំងអស់ ហើយត្រូវប្អូនប្រុសបង្កើតឈ្មោះ សុទ្ធ មុន្នី អាយុ២៤ឆ្នាំ យកទូរស័ព្ទរបស់គាត់ម៉ាក Iphone 7Plush មកថតលេង ហើយក៏មិនបានបង្ហោះហ្វេសប៊ុកទៅណាដែរ។
ក៏ប៉ុន្តែប្រមាណជាកន្លះខែក្រោយ ប្អូនប្រុសជាអ្នកថតរូបភាពនោះជួបគ្រោះថ្នាក់ចរាចរណ៍របួសបោកក្បាលដល់សន្លប់បាត់បង់ទាំងលុយកាក់ បាត់ទាំងទូរស័ព្ទ IPhone 7Plush មួយគ្រឿងរបស់គាត់នោះទៀតផង ។
ប្រភពដដែលបន្តទៀតថា ឆ្លងកាត់រយៈពេលជាង៦ខែមកហើយ ទើបតែក្នុងរយៈពេល២ទៅ៣ថ្ងៃនេះ ស្រាប់តែបែកធ្លាយរូបដែលគាត់យកស្កុតរុំមាត់កូននោះ មកបង្ហោះលើបណ្តាញសង្គមព្រោងព្រាត ថែមទាំងមានមតិរិះគន់ផង លុះរហូតមកដល់ព្រលប់ថ្ងៃទី១១ តុលានេះ ប៉ូលិសប៉ុស្តិ៍ចុះទៅតាមហៅដល់ផ្ទះ សួរនាំរូបភាពខាងលើ ទើបភ្ញាក់ខ្លួនព្រើត មិននឹកស្មានថា រូបភាពតាំងពីជាង៦ខែមុន ហើយក្រោយពីបាត់ទូរស័ព្ទ ទើបមកបែកធ្លាយពេលនេះ ។
តាមស្ត្រីត្រូវជាយាយរបស់ក្មេងស្រីតូចនោះឈ្មោះ ហួន នឿន អាយុ៥៨ឆ្នាំ រស់នៅជាមួយគ្នា ឲ្យដឹងថា ពេលដែលម្តាយលេងរុំស្កុតមាត់កូន ត្រូវបានកូនប្រុសគាត់ម្នាក់ទៀតថតលេងនោះ គាត់និងក្រុមគ្រួសារ នៅជុំគ្នាទាំងអស់ ហើយសកម្មភាពលេងជាមួយកូននេះ មិនមែនម្តាយធ្វើទារុណកម្មកូនទេ គាត់ហ៊ានអះអាងចំពោះមុខសមត្ថកិច្ច ។
ដោយមានមតិរិះគន់ច្រើនក្នុងបណ្តាញសង្គមហ្វេសប៊ុកតាមរយៈរូបភាពត្រូវបានគេបង្ហោះនោះ ទោះជាសាម៉ីខ្លួន រួមទាំងក្រុមគ្រួសារអះអាងនៅចំពោះមុខសមត្ថកិច្ចក្តី ស្ត្រីខាងលើត្រូវបានសម្តែងនូវការសូមទោសជាសាធារណៈ ហើយសមត្ថកិច្ចក៏មិនបានឃាត់ឃាំងអ្វីដែរ ក្រោយសូមទោសរួច ក៏អនុញ្ញាតិឲ្យវិលត្រឡប់ទៅវិញ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]