គ្រូបារាំង បំបែកកំណត់ត្រាពិសេសមួយក្រោយក្រុមលើកពានយប់មិញ

រុស្ស៊ី៖ លោក Didier Deschamps បានក្លាយជាបុគ្គលទី៣ប៉ុណ្ណោះ ក្នុងលោកដែលអាចឈ្នះពានរង្វាន់ World Cup ក្នុងនាមជាកីឡាករ និងគ្រូបង្វឹក ក្រោយពីលោកដឹកនាំបារាំង បំបាក់ក្រូអាត ៤-២ នៅវគ្គផ្ដាច់ព្រ័ត្រកាលពីយប់មិញនេះ។ 

Deschamps បានលើកពានជាមួយបារាំង កាលពីឆ្នាំ១៩៩៨ គ្រាដែលលោកជាប្រធានក្រុមមានគក់នេះ ហើយកាលពីយប់មិញ រូបលោកបានដឹកនាំក្រុមដែលសម្បូរដោយយុវជនពេញកម្លាំងឲ្យលើកពានរង្វាន់ដ៏ធំជាងគេលើលោកនេះ ជាលើកទី២ ក្នុងប្រវត្ដិសាស្រ្ដរបស់ប្រទេសបារាំង។ 

បុរសវ័យ ៤៩ឆ្នាំនេះ បានក្លាយជាបុគ្គលទី៣ បន្ទាប់ពីលោក Mario Zagallo និងលោក Franz Beckenbauer ដែលអាចឈ្នះពានមួយនេះក្នុងនាមជាកីឡាករ និងគ្រូបង្វឹក។

សូមបញ្ជាក់ថា លោក Didier Deschamps ក៏បានបំបែកកំណត់ត្រាមួយទៀតផងដែរ គឺក្លាយជាអ្នកចាត់ការដំបូងគេដែលអាចនាំក្រុមឡើងទៅលេងវគ្គផ្ដាច់ព្រ័ត្រ Euro និង World Cup ជាប់គ្នា ដោយកាលពី២ឆ្នាំមុន បារាំងក្រោមការដឹកនាំរបស់លោកក៏បានឡើងវគ្គផ្ដាច់ព្រ័ត្រ Euro ដែរ ប៉ុន្ដែបែរជាភ្លាត់ចាញ់ព័រទុយហ្គាល់ ១-០ ទោវិញ៕