រាជធានីភ្នំពេញ ៖ ស្ត្រីម្នាក់បានរងរបួសរយះប្រអប់ដៃឆ្វេងដេរជាង១០ថ្នេរ ខណៈពេលកំពុងតែរើដុំថ្មនៅលើព្រំដីចេញយកកន្លែងចាក់សាប ស្រាប់តែមានរឿងឈ្លោះប្រកែកគ្នាជាមួយអ្នកជិតខាងរហូតប្រើអំពើហិង្សាកើតឡើងកាលពីវេលាម៉ោង១០យប់ថ្ងៃទី១២ មីនា នៅក្នុងផ្ទះវីឡាលេខ៩០ ផ្លូវលេខ៣១៥ ក្រុម៣៣ ភូមិ៧ សង្កាត់បឹងកក់ទី២ ខណ្ឌទួលគោក ។
ស្ដ្រីរងគ្រោះឈ្មោះគឹម គីមស្រួល អាយុ៤៩ឆ្នាំ ជាអ្នកលក់ដូរបន្ដិចបន្ដួចនៅនឹងផ្ទះស្នាក់នៅខាងលើបានឱ្យដឹងថា ក្នុងវីឡានេះមាន២០គ្រួសាររស់នៅ ដោយខណ្ឌចែកគ្នា ប៉ុន្ដែមិនមានរបងអ្វីទេ ហើយផ្ទះរបស់គាត់នៅជាប់ព្រំគ្នាជាមួយឈ្មោះទូច សាមិត្ដ ភេទប្រុស អាយុ៦០ឆ្នាំ ជាជាងជួសជុលរថយន្ដ។ ប្រភពដដែលបន្ដថា ព្រំដីរបស់គាត់និងឈ្មោះទូច សាមិត្ដ នៅជាប់គ្នា ហើយឈ្មោះទូច សាមិត្ដ បានយកដុំថ្មដាក់គរនៅលើដីរបស់គាត់ ហើយកន្លងមកគាត់បានប្រាប់ជារឿយៗឱ្យយកដុំថ្មនោះចេញ តែមិនព្រមយកចេញសោះ។ លុះនៅយប់កើតហេតុ គាត់និងកូនប្រុសឈ្មោះគិន ភិរម្យ អាយុ២៥ឆ្នាំ បាននាំគ្នារៀបចំចាក់សាប នៅមុខផ្ទះនោះ ហើយក៏រើយកដុំថ្មនៅព្រំដីនោះចេញ ស្រាប់តែឈ្មោះទូច សាមិត្ដ ចេញមករារាំងមិនព្រមឱ្យរើទេ ដោយនិយាយថា ព្រំដីនេះជាដីរបស់គេមិនឱ្យរើដុំថ្មនេះចេញទេ ទើបឈ្លោះប្រកែកគ្នារហូតបង្កជាជម្លោះកើតឡើង ។
ភ្លាមៗនោះប្រភពបន្តឱ្យដឹងទៀតថា ឈ្មោះសំណាង ភេទប្រុស អាយុ២៥ឆ្នាំ ត្រូវជាកូនប្រុសរបស់ឈ្មោះទូច សាមិត្ត បានចេញពីក្នុងផ្ទះយកដាវសាំម៉ូរៃមកប្រុងចាក់កូនប្រុសរបស់គាត់ តែត្រូវគាត់យកដៃទៅចាប់ជាប់ ទើបបណ្តាលឱ្យមុតរយះបាតដៃឆ្វេងហូរឈាមកក្លាក់៕
ដោយ ៖ ប្រុសកោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]