ទាំងគ្រូបង្វឹក ទាំងកីឡាករ របស់ Juventus នាំគ្នាសរសើរ Ronaldo ទោះក្រុមខ្លួនចាញ់យ៉ាងចាស់ដៃក៏ដោយ

អ៊ីតាលី៖ ក្រោយពីចាញ់ក្រោមដៃ Real Madrid យ៉ាងស្ពឹកមុខកាលពីយប់មិញ ទាំងគ្រូបង្វឹក ទាំងកីឡាកររបស់ Juventus បែរទៅជាសរសើរកីឡាករ Cristiano Ronaldo ទៅវិញ។

ក្រោយការប្រកួត គ្រូបង្វឹករបស់ក្រុម Juventus លោក Massimiliano Allegri បាននិយាយនៅក្នុងសន្និសីទសារព័ត៌មានមួយថា Ronaldo ជាខ្សែប្រយុទ្ធដ៏ល្អបំផុត ជាងមួយទសវត្សរ៍ទៅហើយ ហើយគាត់មិនទាន់បានឃើញកីឡាករណាដែលមានសមត្ថភាពបង្ហាញទម្រង់លេងល្អដូច Ronaldo ទេ។ 

គ្រូបង្វឹកសញ្ជាតិអ៊ីតាលីរូបនេះបានបន្តថា នៅក្នុងពិភពបាល់ទាត់បច្ចុប្បន្ន មានតែក្រុមពីរទេដែលមានទម្រង់លេងល្អ និងខ្លាំងជាងក្រុមដ៏ទៃទៀត ហើយក្រុមទាំងពីរនោះគឺក្រុម Real Madrid និងក្រុម Barcelona ដោយមូលហេតុដែលធ្វើឲ្យក្រុមទាំងពីរនេះខ្លាំងគឺដោយសារតែពួកគេមាន Cristiano Ronaldo និង Lionel Messi។ 

យ៉ាងណាមិញ លោក Allergri បានលើកទឹកចិត្តកូនក្រុមគាត់ឲ្យខំប្រឹងប្រែងឡើងវិញ ដោយសារការប្រកួតនេះមិនទាន់ចប់នៅឡើយ ដោយនៅសល់ជើងទី២ទៀត ដែលត្រូវប្រកួតនៅថ្ងៃទី ១២ខែមេសាខាងមុខនេះ។

ក្រៅពីលោក Allergri កីឡាករ Gianluigi Buffon ក៏បានសរសើរកីឡាករ Ronaldo ផងដែរ ដោយនិយាយប្រាប់អ្នកសារព័ត៌មានថា Ronaldo គឺជាកីឡាករម្នាក់ដែលតែងតែមានទម្រង់លេងល្អ ទោះបីជាអាយុរបស់គេកាន់តែជ្រេក៏ដោយចុះ។ អ្នកចាំទីវ័យចំណាស់បានបន្តទៀតថា គ្រាប់បាល់ទី២របស់ Ronaldo ពិតជាអស្ចារ្យហើយទោះជាគាត់អន់ចិត្តខ្លួនឯងបន្តិចក៏ដោយ ក៏រូបគាត់នៅតែសរសើរសមត្ថភាពរបស់ខ្សែប្រយុទ្ធសញ្ជាតិព័រទុយហ្គាល់រូបនេះ៕