ហូឡង់ លុត ព័រទុយហ្គាល់ យ៉ាងចាស់ដៃ ក្នុងជំនួបមិត្តភាពយប់មិញ (មានវីដេអូ)

ព័រទុយហ្គាល់៖ ជម្រើសជាតិព័រទុយហ្គាល់បានបើទ្វារកីឡដ្ឋាន Stade de Geneve ស្វាគមន៍ក្រុមជម្រើសជាតិហូឡង់ កាលពីយប់មិញ ដោយការប្រកួតនេះបានបញ្ចប់ទៅក្នុងលទ្ធផល ហូឡង់ ៣ ទល់នឹង ព័រទុយហ្គាល់ ០។

ចាប់ផ្តើមការប្រកួតមិនទាន់បានប៉ុន្មានផង ពោលគឺនៅនាទី១១ កីឡាករ Donny van de Beek បានបញ្ជូនបាល់យ៉ាងល្អឲ្យ កីឡាករ Memphis Depay ស៊ុតបញ្ចូលទីនាំមុខមុន។

លុះដល់នាទី ទី៣២ កីឡាករ Matthijs de Ligt បានលើកបាល់ឲ្យកីឡាករ Ryan Babel តែតបញ្ចូលទីមួយគ្រាប់ទៀត ជួយឲ្យហូឡង់នាំមុខ ២ទល់០។ ជិតចប់តង់ទី១ទៅហើយ នៅនាទីទី៤៥+២ កីឡាករ Virgil van Dijk ស៊ុតមួយគ្រាប់ទៀត ជួយឲ្យក្រុមជម្រើសជាតិហូឡង់ ឈ្នះជម្រើសជាតិព័រទុយហ្គាល់ ៣ទល់០។

គួរឲ្យដឹងផងដែរថា កីឡាករឆ្នើមរបស់ព័រទុយហ្គាល់ Cristiano Ronaldo បានចូលលេងក្នុងការប្រកួតនេះ តែរូបគេមិនបានស៊ុតឲ្យចំគោលដៅសូម្បីតែម្តង។ ហើយនេះក៏ជាលើកទីមួយដែរ ក្នុងរដូវកាលនេះ ដែលទម្រង់លេងរបស់កីឡាកររូបនេះ បានធ្លាក់ចុះខ្លាំងបែបនេះ ៕

ខាងក្រោមនេះ ជាវីដេអូ Highlight នៃការប្រកួតកាលពីយប់មិញ៖ 

• វីដេអូ