លោក ប្រាក់ សុវណ្ណារ៉ា បង្ហាញអារម្មណ៍ពិត ក្រោយដឹកនាំ កម្ពុជា ឈ្នះ ឡាវ ប៉ុន្មានថៃ្ងមុន

ភ្នំពេញ៖ គ្រូបង្វឹកក្រុមជម្រើសជាតិកម្ពុជា លោក ប្រាក់ សុវណ្ណារ៉ា មានក្ដីសប្បាយរីករាយយ៉ាងខ្លាំង ជាមួយនឹងលទ្ធផល ១-០ ដែល កម្ពុជា បានយកឈ្នះ ឡាវ ក្នុងជំនួបមិត្ដភាព កាលពី ២ថៃ្ងមុន។ 

កម្ពុជា អាចរកជ័យជម្នះរបស់ខ្លួនជាលើកដំបូង ក្នុងឆ្នាំ២០១៨ ក្រោយពីយកឈ្នះក្រុមម្ចាស់ផ្ទះឡាវ ១-០ ក្នុងការប្រកួតមិត្ដភាពកម្ដៅសាច់ដុំ មុនពេលបន្ដប៉ះ អាហ្គានីស្ថាន ក្នុងការប្រកួតជម្រុះពានរង្វាន់ AFC Asian Cup។

អតីតគ្រូបង្គោលក្រុមបឹងកេត ដែលដឹកនាំក្រុមលើកពានលីកកំពូលកម្ពុជា ឆ្នាំ២០១៦ មានអារម្មណ៍រីករាយ ក្រោយក្រុមរបស់លោកទទួលជ័យជម្នះ ទៅលើក្រុមក្បែរខាង ទោះកីឡាករមួយចំនួននៅមានបទពិសោធន៍តិច និងទម្រង់លេងមិនសូវជាល្អប៉ុន្មានក៏ដោយ។  

«វាជាការប្រកួតដ៏ល្អ ដោយសារតែ យើងប្រើប្រាស់កីឡាករក្មេងៗច្រើន ហើយទទួលបានជ័យជម្នះជាលើកដំបូងក្នុងទីក្រុងរៀងច័ន្ទ។ យ៉ាងណាក្ដី យើងត្រូវតែព្យាយាមកែសម្រួលប្រព័ន្ធការពារឡើងវិញ ដោយពង្រឹងបាល់ខាងលើ និងការស៊ុតពីចម្ងាយ» លោក ប្រាក់ សុវណ្ណារ៉ា បានលើកឡើង៕