អាមេរិក: កីឡាករប្រដាល់មិនដែលចាញ់ Floyd Mayweather កំពុងពិចារណាចូលទៅក្នុង UFC ដើម្បីសាកល្បងកម្លាំងជាមួយនឹងកីឡាករ Conor McGregor ជាលើកទី២ ខណៈពេលដែលប្រធានគ្រប់គ្រង UFC លោក Dana White កំពុងខ្នះខ្នែងដៃជើងធ្វើឲ្យរឿងមួយនេះកើតឡើង។
កីឡាករវ័យ៤១ឆ្នាំរូបនេះមានប្រវត្តិលើសង្វៀនប្រដាល់ល្អឥតខ្ចោះដោយប្រកួត៥០ដង ឈ្នះទាំង៥០ដង ដោយក្នុងនោះផ្តួលគូប្រកួតឲ្យសន្លប់២៧ដង បើរាប់ទាំងការប្រកួតជាមួយ McGregor។
ទោះបីជាការប្រកួតរវាង Floyd Mayweather និង Conor McGregor បានបញ្ចប់ទៅជិតមួយឆ្នាំក្តីក៏សង្គ្រាមសម្តីរវាងកីឡាករទាំងពីរមិនទាន់បញ្ចប់ដែរដោយកីឡាករទាំងពីរនាក់នេះបានបង្ហោះរូបឌឺដង លេបខាយសម្តីដាក់គ្នាធ្វើឲ្យអ្នកតាមដានកាន់តែជក់ចិត្តនិងចង់ឃើញកីឡាករទាំងពីរនាក់ប្រកួតគ្នាម្តងទៀតដោយលើកនេះគឺអ្នកទស្សនាចង់ឃើញ Floyd ឡើងទៅកាន់សង្វៀន Octagon ម្តងដោយការប្រកួតលើកមុនគឺ McGregor ចូលទៅកាន់សង្វៀនប្រដាល់ ហើយត្រូវ Floyd ផ្ចាញ់បាននៅជុំទី១០។
អ្នកវិភាគមួយចំនួនបាននិយាយថា ការប្រកួតលើកទីពីររវាង Floyd និង McGregor អាចនឹងមានសង្ឃឹមខ្ពស់ ព្រោះការប្រកួតនោះនឹងនាំចំណូលចូលមក UFC យ៉ាងច្រើនមកពីការលក់សំបុត្រ លក់សិទ្ធិផ្សាយផ្ទាល់ និង របស់ពាក់ព័ន្ធមួយចំនួនទៀតដោយគេគិតតួលេខថា ការប្រកួតលើកទី២នោះនឹងអាចរកចំណូលបានដល់ទៅ ៣៦០លានអ៊ឺរ៉ូ (ស្មើនឹង ៤៤០លានដុល្លាអាមេរិក)៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
