Thibaut Courtois៖ បេះដូងរបស់ខ្ញុំស្ថិតនៅក្នុងទីក្រុង Madrid

បរទេស៖ ក្លិប Chelsea បានបង្ហាញពីចំណាប់អារម្មណ៍ ក្នុងការបន្តកុងត្រាឲ្យកីឡាករ Thibaut Courtois ប៉ុន្តែកិច្ចពិភាក្សាររវាងភាគីទាំង២ ហាក់នៅមិនទាន់បានលទ្ធផលជាផ្លែផ្កា។

យ៉ាងណាមិញ កាលពីពេលថ្មីៗនេះ Courtois បានបង្ហើបថា ខ្លួនចាប់អារម្មណ៍ ក្នុងការផ្ទេរទៅកាន់ក្លិបអធិរាជស Real Madrid ដែលធ្វើឲ្យប៉ះពាល់អារម្មណ៍អ្នកគាំទ្រក្លិប Chelsea យ៉ាងខ្លាំង។

នៅក្នុងបទសម្ភាសន៍មួយ អ្នកចាំទីសញ្ជាតិប៊ែលហ្សិករូបនេះ បានសារភាពថា ការជួបជុំជាមួយក្រុមគ្រួសារ នៅក្នុងប្រទេសអេស្ប៉ាញ គឺជារឿងមួយដែលទាក់ទាញចិត្តរបស់ខ្លួន។ ដូច្នេះស្ថានភាពផ្ទាល់ខ្លួនរបស់គេ នឹងអាចជួយជម្រុញដល់ការផ្ទេរទៅកាន់ក្លិប Real Madrid ។

កីឡាករ Courtois បានបន្តថា មិត្តស្រី និងកូនពីរនាក់របស់ខ្លួន កំពុងតែរស់នៅក្នុងទីក្រុង Madrid ដូច្នេះអាចនិយាយបានថា បេះដូងរបស់លោក គឺនៅក្នុងទីក្រុង Madrid ផ្ទាល់តែម្តង។

អ្នកចាំទីរូបនេះបានបន្ថែមទៀតថា «គ្រួសារមានតម្លៃខ្ពស់ មិនអាចកាត់ថ្លៃបានឡើយ ប៉ុន្តែខ្ញុំសូមប្រាប់អ្នកម្តងហើយម្តងទៀតថា ក្នុងពេលនេះ ខ្ញុំកំពុងតែរវល់ពិភាក្សាជាមួយក្លិបតោខៀវដើម្បីបន្តកុងត្រា» ៕