រាជធានីភ្នំពេញ ៖ ព្រោះតែភាពក្រីក្រទីទ័លលំបាកបុរសម្នាក់បានសម្រេចចិត្តចាកចេញពីស្រុកកំណើតទៅធ្វើការនៅភ្នំពេញ បែរជាត្រូវគេបោកមិនបើកប្រាក់ខែឲ្យគ្មានលុយទិញបាយហូប ក៏ត្រូវខ្យល់.គដួលសន្លប់តាមដងផ្លូវសាធារណៈ បង្កឲ្យមានការភ្ញាក់ផ្អើលឡើងកាលពីវេលាម៉ោង០៦និង១០នាទីយប់ ថ្ងៃទី១២ ខែធ្នូ ឆ្នាំ២០១៧ ត្រង់ចំណុចខាងកើតខ្លោងទ្វារវត្តអង្គត់បូរី តាមបណ្ដោយផ្លូវសហព័ន្ធរុស្ស៊ី ស្ថិតក្នុងសង្កាត់ទឹកថ្លា ខណ្ឌសែនសុខ ។ បុរសរងគ្រោះខាងលើមានឈ្មោះ ភី អាយុ៣៩ឆ្នាំ មានស្រុកកំណើតស្រុកក្រវ៉ាញ ខេត្តពោធិ៍សាត់ ។
តាមប្រភពព័ត៌មានពីកន្លែងកើតហេតុ បានឲ្យដឹងថា នៅពេលកើតហេតុ គេឃើញបុរសរងគ្រោះដើរស្ពាយកាបូបនៅខឿនតាមបណ្ដោយផ្លូវសហព័ន្ធរុស្ស៊ី ក្នុងទិសដៅពីលិចទៅកើត ។ លុះមកដល់ចំណុចកើតហេតុ ស្រាប់តែបុរសខាងលើបានដួលផ្កាប់មុខទៅនឹងដីសន្លប់ស្តូកស្តឹងបាត់មាត់បាត់.ក បង្កឲ្យមានការភ្ញាក់ផ្អើលដល់ប្រជាពលរដ្ឋដែលធ្វើដំណើរឆ្លងកាត់ឈប់ចោមរោមមើល និងរាយការណ៍ប្រាប់សមត្ថកិច្ចមូលដ្ឋានចុះមកអន្តរាគមន៍ ។
បើតាមសម្តីពីបុរសខាងលើបានរៀបរាប់ប្រាប់ឲ្យដឹងថា នៅមុនពេលកើតហេតុ គាត់បានចាកចេញពីខេត្តពោធិ៍សាត់ដែលជាស្រុកកំណើតមកធ្វើការនៅឯទីក្រុងភ្នំពេញ គាត់បានធ្វើជាកម្មករសំណង់ឲ្យគេនៅម្តុំវត្តលំពែង ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ អស់រយៈពេលជាងកន្លះខែមកហើយ តែមិនឃើញមេការសំណង់បើកលុយឲ្យគាត់សោះ ធ្វើឲ្យគាត់គ្មានលុយទិញបាយហូបអស់រយៈពេលជាច្រើនថ្ងៃមកហើយ រហូតដល់ថ្ងៃកើតហេតុ គាត់ក៏បានសម្រេចចិត្តដើរត្រលប់ទៅផ្ទះនៅឯស្រុកកំណើតវិញ លុះដើរមកដល់ត្រង់ចំណុចកើតហេតុ ដោយសារតែការអត់បាយហេវហត់អស់កម្លាំងខ្លាំងពេកក៏ដួលសន្លប់តែម្តងទៅ ។
ក្រោយពេលកើតហេតុ ប្រជាពលរដ្ឋរួមទាំងសមត្ថកិច្ចមូលដ្ឋានបាននាំគ្នាជួយធ្វើការសង្គ្រោះបឋមទៅលើបុរសរងគ្រោះបណ្ដាលឲ្យបុរសរងគ្រោះរាងធូរស្បើយដឹងខ្លួនឡើងវិញ ហើយប្រជាពលរដ្ឋរួមទាំងសមត្ថកិច្ចមូលដ្ឋានបានឲ្យលុយទៅបុរសខាងលើម្នាក់បន្តិចៗ ដើម្បីធ្វើជាសោហុយជិះរថយន្តឈ្នួលត្រលប់ទៅផ្ទះវិញ បន្ទាប់មកក៏មានបុរសជាអ្នករត់ម៉ូតូឌុបចិត្តធម៌ម្នាក់បានស្ម័គ្រចិត្តដឹកបុរសខាងលើ ដោយមិនគិតថ្លៃទៅដាក់ចំណតរថយន្តឈ្នូល ដើម្បីធ្វើដំណើរទៅស្រុកកំណើតវិញ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
