អ្នកប្រាជ្ញរូបវិទ្យាដ៏ល្បីព្រមានថា វិទ្យាសាស្ត្រនឹងធ្វើឲ្យពួកមនុស្សយន្ត ប្រជែងឈ្នះមនុស្សជាតិ នាពេលអនាគតខាងមុខ

បរទេស៖  រយៈពេលថ្មីៗនេះ អ្នកប្រាជ្ញរូបវិទ្យា ដ៏ល្បីគឺលោក Stephen Hawking បានព្រមានថា នាពេលអនាគតខាងមុខ ពួកមនុស្សយន្តនឹងមានសមត្ថភាពខ្លាំងអស្ចារ្យនឹកស្មានមិនដល់ ដែលនេះជាក្តីបារម្ភមួយសម្រាប់អំបូរមនុស្ស។

លោក Stephen Hawking មានវ័យ ៧៥ ឆ្នាំ គឺជាអ្នកប្រាជ្ញរូបវិទ្យាដ៏ល្បីបំផុតមួយរូបក្នុងពិភពលោក។ លោក Stephen កំពុងមើលឃើញថា មនុស្សយន្តនឹងមានការវិវឌ្ឍខ្លួនគួរឲ្យកត់សម្គាល់  ស្របពេល ក្រុមហ៊ុន Hanson Robotics បានបង្ហាញនូវមនុស្សយន្តមួយប្រភេទ ដែលមានរូបរាងដូចទៅនឹង លោក Albert Einstein ដែលពិភពលោកទទួលស្គាល់ថាជា កំពូលអ្នកប្រាជ្ញរូបវិទ្យាដ៏ល្បីល្បាញម្នាក់ក្នុងប្រវត្តិសាស្ត្រ។

គួរឲ្យដឹងថា ក្រុមហ៊ុនដដែលនេះ ធ្លាប់បានបង្ហាញនូវប្រភេទមនុស្សយន្ត ដែលគេឲ្យឈ្មោះថា Sofia ដែលមានសមត្ថភាពអស្ចារ្យនឹកស្មានមិនដល់ ពោលគឺអាចរៀនយល់ និងប្រាស្រ័យទាក់ទងជាមួយមនុស្ស ក្នុងលក្ខខណ្ឌដ៏ពិសេសជាច្រើន ហើយត្រូវគេជឿជាក់ថាអាចនឹងជំនួស ឬដណ្តើមការងារជាច្រើនរបស់មនុស្សបាន នេះគឺដោយសារតែសមត្ថភាព ក៏ដូចជាភាពវ័យឆ្លាតរបស់វា។

អ្វីដែលគួរឲ្យចាប់អារម្មណ៍ជាខ្លាំង Sofia ត្រូវបានប្រទេសអារ៉ាប៊ី សាអូឌីត ផ្តល់នូវសញ្ញាតិជាផ្លូវការ ក្លាយជាមនុស្សយន្តដំបូងគេបង្អស់លើលោក ក្នុងនាមជាពលរដ្ឋមួយរូប ដូចមនុស្សធម្មតាដែរ។

ដោយសារបែបនេះហើយ លោក Stephen Hawking បានបន្តថាមិនយូរមិនឆាប់ទេ ប្រភេទមនុស្សយន្តនឹងវិវឌ្ឍខ្លួនវៃឆ្លាតជាងមនុស្សធម្មតា ហើយថែមទាំងអាចបង្កបញ្ហាប្រឈមដ៏ធំមួយ (ជំនួស ឬក៏លុបបំបាត់អំបូរមនុស្ស) ចំពោះមនុស្សជាតិនាពេលអនាគត៕

សូមទស្សនាវីដេអូខាងក្រោម៖

• វិទ្យាសាស្រ្ត
• អនាគត