ខេត្តកំពត ៖ ក្មេងស្រីជំទង់ម្នាក់បានស្លាប់យ៉ាងរន្ធត់ ខណៈនាងជិះម៉ូតូម្នាក់ឯងហើយត្រូវរថយន្តឡិចស៊ីសបើកបំបុកពីក្រោយយ៉ាងពេញទំហឹងរួចអូសម៉ូតូ និងមនុស្សជាច្រើនម៉ែត្រ បណ្តាលឲ្យម៉ូតូត្រូវរងការខូចខាតយ៉ាងដំណំផងដែរ ។ ហេតុការណ៍នេះបានកើតឡើងនៅវេលាម៉ោង០៥នឹង២០ល្ងាច ថ្ងៃទី១៩ ខែតុលា ឆ្នាំ២០១៧ លើផ្លូវជាតិលេខ៣៣ ត្រង់ចំណុចភូមិកំពង់កេស ឃុំត្រពាំងសង្កែ ស្រុកទឹកឈូ ខេត្តកំពត ។
ក្មេងស្រីជំទង់ដែលបាត់បង់ជីវិតនោះឈ្មោះ យន់ ស្រីសុខ អាយុ១៤ឆ្នាំ មានទីលំនៅភូមិបុសញិញ ឃុំកូនសត្វ ស្រុកទឹកឈូ ខេត្តកំពត ក្មេងស្រីរងគ្រោះជិះម៉ូតូម៉ាក C125 ពណ៌ខ្មៅ ស៊េរីឆ្នាំ២០០៩ ពាក់ស្លាកលេខ កំពត ១C-០៨២៨ ។ ចំណែករថយន្តបង្កហេតុម៉ាកឡិចស៊ីស ពណ៌ស ពាក់ស្លាកលេខ ស្វាយរៀង ២A-២៣៤៥ ម្ចាស់គេចខ្លួនបាត់ស្រមោលឈឹង ។
សាក្សីនៅកន្លែងកើតហេតុបាននិយាយថា មុនពេលជួបហេតុការដ៏រន្ធត់នេះគេឃើញក្មេងស្រីរងគ្រោះជិះម៉ូតូម្នាក់ឯងម៉ាក C125 ពណ៌ខ្មៅ ក្នុងទិសដៅពីកើតទៅលិចដោយប្រើល្បឿនបង្គួរ លុះមកដល់ចំណុចគ្រោះថ្នាក់ក៏មានរថយន្តម៉ាកឡិចស៊ីបោះពួយមកពីក្រោយក្នុងទិសដៅស្របគ្នា ហើយរថយន្តបង្កជ្រុលទៅបុកម៉ូតូពីក្រោយយ៉ាងពេញទំហឹង រួចក៏រេចង្កូចទៅផ្នែកខាងឆ្វេងដៃព្រមទាំងបានអូសទាំងម៉ូតូ និងជនរងគ្រោះទៅជាមួយរហូត២០ម៉ែត្រ ទើបបន្តទៅបុកដើមស្វាយបាក់អស់មួយដើមនៅក្បែរចិញ្ចើមផ្លូវទៅមុខលែងរួចតែម្តង ។ សាក្សីដដែលបានបញ្ជាក់ថា ក្រោយពេលបង្កហេតុបណ្តាលឲ្យមនុស្សស្លាប់ ម្ចាស់រថយន្តក៏គេចខ្លួនបាត់ស្រមោលភ្លាមៗ ដោយបន្សល់ទុករថយន្តនៅកន្លែងកើតហេតុ ។
ទាក់ទិននឹងករណីគ្រោះថ្នាក់ដ៏រន្ធត់ខាងលើសមត្ថកិច្ចដែលមកវាស់វែងបានឲ្យដឹងថា នេះជាឧប្បត្តិហេតុដែលបង្កឡើងដោយសារម្ចាស់រថយន្តបើកបរខ្វះការប្រុងប្រយ័ត្ន ពោលគឺការបើកបរក្នុងល្បឿនលើសល្បឿនកំណត់ដោយមិនពិនិត្យមើលឧបសគ្គនៅខាងមុខ ។ បច្ចុប្បន្នសពក្មេងស្រីជំទង់រងគ្រោះ ត្រូវបានក្រុមគ្រួសារមកទទួលយកទៅកាន់លំនៅឋាន ដើម្បីចាត់ចែងធ្វើបុណ្យតាមប្រពៃណី ដោយឡែកមធ្យោបាយពាក់ព័ន្ធប៉ូលិសចរាចរណ៍បាននាំយកទៅរក្សាទុកនៅក្នុងអធិការដ្ឋាននគរបាលស្រុកទឹកឈូដើម្បីស្រាវជ្រាវរកម្ចាស់ឲ្យចូលខ្លួនមកដោះស្រាយគ្នាតាមច្បាប់ចរាចរណ៍ផ្លូវគោក ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]