ភ្នំពេញ ៖ នៅវេលាម៉ោង៤រសៀល ថ្ងៃទី២៧ ខែតុលា ឆ្នាំ២០១២ លោក សុះ ម៉ាច ប្រធានសមាគមសិល្បករខ្មែរ បានដឹកនាំអ្នកសិល្បៈ ប្រហែលជិត ២០នាក់ ចូលរួមគោរពព្រះវិញ្ញាណក្ខន្ធ សម្ដេចព្រះ នរោត្ដម សីហនុ ដែល ព្រះអង្គបានយាងចូលទិវង្គត កាលពីថ្ងៃទី១៥ ខែតុលា ឆ្នាំ២០១២ ។
ក្នុងទឹកមុខស្រងូតស្រងាត់ កូនចៅ ចៅទួត ជាអ្នកសិល្បៈ បានស្មឹងស្មាធិ លើកដៃប្រណំ ដោយក្នុងនោះ គេសង្កេត ឃើញសំឡេងខ្សឹកខ្សួល យំអួលដើមក បានបន្លឺឡើងតិចៗ ចេញពីសំណាក់លោក សុះ ម៉ាច , លោក ហម ឈរ៉ា, អ្នកនាង ចន្ទ តារាទី , លោក ចា ឫទ្ធី , លោក យុត្ថារ៉ា ឆានី, នាយក្រឹម, លោក មាស សារ៉ាន់, លោក អៀង ស៊ីធុល, អ្នកនាង ប៉ែន សុផានី, អ្នកនាង កាឡុង កាណារ៉ូ និងតារាជាច្រើនទៀត ខណៈពួកគេបាន នឹកឃើញទៅដល់អនុស្សាវរីយ៍ជាច្រើន ដែលធ្លាប់បានសម្ដែងខ្សែភាពយន្ដនិងច្រៀង ថ្វាយសម្ដេចតា ។
ក្រោយពីក្រាបបង្គំគោរព ព្រះវិញ្ញាណក្ខន្ធ គ្រប់ៗគ្នាហើយ លោក សុះ ម៉ាច បានសរសេរចុះក្នុងសៀវភៅ មរណទុក្ខ និងបានសម្ដែងនូវក្ដីសោកស្ដាយ រកទីបំផុតគ្មាន នៅពេលបាត់បង់ព្រះមហាក្សត្រ ដែលជា្រពះវររាជបិតាជាតិខ្មែរ បូរណភាពទឹកដី និងឯករាជជាតិ និងសូមបួងសួងដល់ព្រះវិញ្ញាណក្ខន្ធ ព្រះអង្គយាងទៅទីឋាន ព្រះបរមសុគតិភព និងសូមឱ្យព្រះវិញ្ញាណក្ខន្ធព្រះអង្គ តាមជួយថែរក្សាប្រជានុរាស្ដ្រ កូនចៅ ចៅទួត នៅក្នុងព្រះរាជាណាចក្រកម្ពុជាទាំងមូល ឱ្យមានសេចក្ដីសុខ និងបូរណភាពទឹកដីផងដែរ៕
ដោយៈ ដើមអម្ពិល(DAP)
ផ្តល់សិទ្ធដោយ ដើមអម្ពិល
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]