រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ លោក លី លីបម៉េង នៅរសៀលថ្ងៃទី២៣ ខែកញ្ញា ឆ្នាំ២០១៧នេះ បានសម្រេចចេញដីកាឃុំខ្លួនបុរសម្នាក់ពាក់ព័ន្ធទទួលបញ្ញើគ្រាប់បែក យកទៅទុកនៅកន្លែងទទួលផ្ញើម៉ូតូ ក្នុងមន្ទីរពេទ្យជោរៃភ្នំពេញ ដែលធ្វើឲ្យមានការភ្ញាក់ផ្អើល។ ការសម្រេចឃុំខ្លួនរបស់លោកចៅក្រមស៊ើបសួរនេះ គឺយោងទៅលើការចោទប្រកាន់របស់តំណាងអយ្យការ ពីបទការដឹកជញ្ជូនការកាន់កាប់គ្រាប់រំសេវ និងគ្រឿងផ្ទុះដោយគ្មានការអនុញ្ញាតតាមមាត្រា៤៩០ នៃក្រមព្រហ្មទណ្ឌ។ ជនសង្ស័យមានឈ្មោះ ឡូ ពិនដារិទ្ធ ហៅទូច ភេទប្រុស អាយុ៣៣ឆ្នាំ មានទីលំនៅផ្ទះជួល ភូមិបឹងឈូក សង្កាត់ទឹកថ្លា ខណ្ឌសែនសុខ និងមានមុខរបរជាបុគ្គលិកក្រុមហ៊ុន។
ទាក់ទិននឹងការឃុំខ្លួនជនសង្ស័យខាងលើនេះ តាមប្រភពព័ត៌មានបានឲ្យដឹងថា កាលវេលាម៉ោងប្រមាណ១១យប់ ថ្ងៃទី២០ កញ្ញា ២០១៧ មានការភ្ញាក់ផ្អើលមួយកើតឡើងនៅមន្ទីរពេទ្យជោរៃ ភ្នំពេញ ស្ថិតនៅតាមបណ្តោយផ្លូវជាតិលេខ១ ភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញ ដោយសន្តិសុខយាមម៉ូតូ បានប្រទះឃើញគ្រាប់បែក១គ្រាប់ ពណ៌ខ្មៅរុំស្កុតពីក្រៅជិត ដែលគេដាក់ក្នុងឃ្លុបម៉ូតូស្កុបពី ពណ៌ក្រហមមួយគ្រឿង។ ប្រភពបន្តថា ដំបូងឡើយគេសន្និដ្ឋានមានជនមិនស្គាល់មុខ យកគ្រាប់នោះទៅដាក់បង្កៃឲ្យផ្ទុះ នៅក្នុងមន្ទីរពេទ្យជោរៃ តែក្រោយពីស្រាវជ្រាវទើបដឹងថា ម្ចាស់ម៉ូតូភ្លេចដកសោ ត្រូវអ្នកយាមប៉ុនប៉ងលួចយកទ្រព្យសម្បត្តិ ក្នុងឃ្លុបម៉ូតូនោះ ប៉ុន្តែដល់ពេលរើយកអីវ៉ាន់ទៅក៏ឃើញគ្រាប់បែកបានជាមានការភ្ញាក់ផ្អើល។
ក្រោយពីមានការភ្ញាក់ផ្អើល សមត្ថកិច្ចបានធ្វើការឃាត់ខ្លួនឈ្មោះ ឡូ ពិនដារិទ្ធ ដែលជាម្ចាស់ម៉ូតូស្កុបពីមានលាក់ទុកគ្រាប់បែក១គ្រាប់នៅក្រោមកែម៉ូតូនោះ។ នាយឧត្តមសេនីយ៍ គៀត ច័ន្ទថារិទ្ធ អ្នកនាំពាក្យក្រសួងមហាផ្ទៃ បានបញ្ជាក់ថា តាមការស្រាវជ្រាវជំហានដំបូង មុខសញ្ញាដែលជាម្ចាស់ម៉ូតូ ត្រូវបានបងថ្លៃឲ្យយកគ្រាប់បែកនេះ ទៅបន្ទាយនៅខាងលិចកំពង់ស្ពឺ ម្តុំត្រែងត្រយឹង ក្នុងស្រុកកំពង់សិលា ប៉ុន្តែដោយសារឪពុកឈឺធ្ងន់នៅមន្ទីរពេទ្យជោរៃ ភ្នំពេញ ម្ចាស់ម៉ូតូបានដាក់គ្រាប់បែកនៅក្នុងឃ្លុបម៉ូតូ ហើយប្រញាប់ប្រញាល់ចូលទៅមើលឪពុកឈឺធ្ងន់ ដែលមិនទាំងបានដកសោម៉ូតូទុកផង។ ដូច្នោះហើយទើបសន្តិសុខយាមការពារនៅមន្ទីរពេទ្យ បានយកសោទៅចាក់បើកឃ្លុបម៉ូតូ ក៏ឃើញមានថង់មួយរុំជិត រួចយកថង់នោះទៅបើកមើលក្នុងគោលបំណងចង់យករបស់គេ លុះបើកទៅឃើញគ្រាប់ទើបឆោឡោ។
សរុបមកវិញករណីនេះ មិនមែនជារឿងដាក់គ្រាប់បែកបង្កៃឲ្យផ្ទុះ ឬក៏ប៉ុនប៉ងធ្វើឲ្យផ្ទុះនៅក្នុងមន្ទីរពេទ្យជោរៃ ភ្នំពេញ ទេ។ ទោះជាយ៉ាងណាក្តីសមត្ថកិច្ចនគរបាលព្រហ្មទណ្ឌរាជធានីភ្នំពេញ បានកសាងសំណុំរឿង បញ្ជូនម្ចាស់ម៉ូតូ និងគ្រាប់បែកទៅកាន់សាលាដំបូងរាជធានីភ្នំពេញ តាមនីតិវិធី ទើបជនសង្ស័យជាម្ចាស់ម៉ូតូ ដែលមានដាក់គ្រាប់បែកក្នុងឃ្លុបនោះ ត្រូវបានតុលាការចេញដីកា សម្រេចឃុំខ្លួនដាក់ពន្ធនាគារជាបណ្តោះអាសន្ននេះ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]