រាជធានីភ្នំពេញ ៖ ព្រឹកថ្ងៃទី១៥ ខែកញ្ញា សាលាដំបូងរាជធានីភ្នំពេញ បានប្រកាសសាលក្រមលើសំណុំរឿងស្ត្រីជនជាតិវៀតណាមម្នាក់ ដែលផ្តើមគំនិតជួលជនដៃដល់ឱ្យបោកគ្រាប់បែកប៉ុនប៉ងសម្លាប់ប្រុសស្នេហ៍បែកចិត្ត ក្នុងនោះបានផ្តន្ទាទោស៣នាក់ដាក់ពន្ធនាគារកំណត់មួយជីវិត និង២នាក់ក្នុងម្នាក់ៗ៣០ឆ្នាំ ។
សាលក្រមនេះ បានផ្តន្ទាទោសលើជនជាប់ចោទ ១-ឈ្មោះ សុខ គឹមលី ភេទស្រី អាយុ៤១ឆ្នាំ អ្នកផ្តើមគំនិតក្នុងអំពើឃាតកម្មគិតទុកជាមុន ដាក់ពន្ធនាគារអស់មួយជីវិត ២-ឈ្មោះ សាក់ ម៉ាប់ ភេទប្រុស អាយុ៣៦ឆ្នាំ ៣-ឈ្មោះ ប៊ុន ភក្តី ភេទប្រុស អាយុ៣២ឆ្នាំ (២នាក់នេះជាជនដៃដល់បោកគ្រាប់បែក) ដាក់ពន្ធនាគារអស់មួយជីវិត ៤-ឈ្មោះ ប៊ូ សុភាព ភេទស្រី អាយុ២៥ឆ្នាំ និង៥-ឈ្មោះ នូ សំបាន ភេទប្រុស អាយុ៣៣ឆ្នាំ (២នាក់នេះជាអ្នកសមគំនិតក្នុងអំពើឃាតកម្មគិតទុកជាមុន) ផ្តន្ទទោសដាក់ពន្ធាគារម្នាក់ៗ៣០ឆ្នាំ ។ ទោះបីជាបែបណា សាលក្រមនេះបានទុកសិទ្ធិបើកផ្លូវឱ្យជនជាប់ចោទប្តឹងឧទ្ធរណ៍តាមកំណត់ច្បាប់ ។
គួររំលឹកថា កាលពីវេលាម៉ោងជាង៧យប់ថ្ងៃទី៦ ខែកញ្ញា ឆ្នាំ២០១៦ មានករណីវាយប្រហារដោយគ្រាប់បែកនៅក្នុងសង្កាត់បឹងកេងកងទី៣ ខណ្ឌចំការមន រាជធានីភ្នំពេញ បណ្តាលឱ្យប្រជាពលរដ្ឋប្រុសស្រីចំនួន៤នាក់រងរបួសធ្ងន់ និងស្រាល ។ ករណីនេះ ដំបូងគេសង្ស័យថាជារឿងនយោបាយ ប៉ុន្តែមិនបានប៉ុន្មានផង នគរបានព្រហ្មទណ្ឌក្រសួងមហាផ្ទៃ ធ្វើការស្រាវជ្រាវ និងឈានដល់ឃាត់ខ្លួនម្ចាស់គ្រាប់បែករួមទាំងជនដៃដល់៥នាក់ ទើបដឹងថាជារឿងស្នេហាត្រីកោណ ពោលគឺស្ត្រីជនជាតិវៀតណាមម្នាក់ឈ្មោះ សុខ គឹមលី ខឹងប្រុសស្នេហ៍បែកចិត្ត ក៏ជួលជនដៃឱ្យទៅបោកគ្រាប់ប៉ុនប៉ងសម្លាប់ ដែលជារឿងឃាតកម្មគិតទុកជាមុន ។
ក្រោយពីត្រូវចាប់ខ្លួន ស្ត្រីឈ្មោះ សុខ គឹមលី សារភាពថា ខ្លួនពិតជាអ្នករៀបចំគម្រោង និងជួលមនុស្សឱ្យទៅសម្លាប់ឈ្មោះ អៀ លីហួរ ដែលជាប្រុសស្នេហ៍ ស្រឡាញ់គ្នាលួចលាក់ពីប្តីជនជាតិសិង្ហបុរី ។ ការប៉ុនប៉ងសម្លាប់ឈ្មោះ អៀ លីហួរ ជាប្រុសស្នេហ៍នោះ មិនមែនតែមួយលើកនេះទេ គឺ២លើកមកហើយ ដោយបានចំណាយប្រាក់អស់ដល់ទៅ៣មឺុនដុល្លារអាមេរិក ។ លើកទី១-បានទិញកាំភ្លើងខ្លី១ដើម និងជួលមនុស្ស២នាក់ឱ្យទៅបាញ់សម្លាប់ឈ្មោះ អៀ លីហួរ ប៉ុន្តែពេលនោះ អៀ លីហួរ ដឹងខ្លួនក៏បែកការណ៍អស់ទៅ ។ លើកទី២-បានទាក់ទងជាងសំណង់ និងអ្នករត់ម៉ូតូឌុប ឱ្យរកទិញគ្រាប់បែកទៅបោកសម្លាប់ អៀ លីហួរ ម្តងទៀត ដោយសារតែរូបគេកើតទុកមិនសុខចិត្តនូវទង្វើរបស់ប្រុសស្នេហ៍ដែលហ៊ានបែកចិត្ត ។ ខ្លួនសុខចិត្តក្បត់ប្តីជាថៅកែជនជាតិសិង្ហបុរី ហើយលួចលាក់លុយកាក់យកមកចិញ្ចឹមប្រុសស្នេហ៍ តែទីបំផុតប្រុសស្នេហ៍បែរជាបែកចិត្តរកថ្មី បានជាកើតគំនិតតាមធ្វើឃាតនោះ។
នៅថ្ងៃកើតហេតុ លោក អៀ លីហួរ កំពុងបើកទ្វារផ្ទះ ពេលនោះជនដៃដល់ជិះម៉ូតូទៅក្បែរហើយម្នាក់ជិះខាងក្រោយបានចោលគ្រាប់បែកសំដៅទៅ អៀ លីហួរ ប៉ុន្តែគ្រាប់បែកនោះ បានហោះទៅត្រូវទ្រូងបក្សពួកដែលជិះម៉ូតូតាមក្រោយ បណ្តាលឱ្យធ្លាក់កណ្តាលផ្លូវហើយក៏ផ្ទុះលាន់កក្រើក និងមានមនុស្ស៤នាក់រងរបួស ព្រមទាំងរថយន្ត៤គ្រឿងក៏ខូចខាតដែរ ធ្វើឱ្យមានការភ្ញាក់ផ្អើលឡើង ។ ចំណែកលោក អៀ លីហួរ មិនមានរងរបួសទេ ថែមទាំងមិនបានដឹងខ្លួនថា គ្រាប់បែកនោះគឺក្រុមឃាតករយកទៅបោកប៉ុនប៉ងផ្តាច់ជីវិតខ្លួននោះឡើយ ។
ក្រោយពីឃុំខ្លួនអស់រយៈពេលជាច្រើនខែសំណុំរឿងនេះត្រូវបានសាលាដំបូងរាជធានីភ្នំពេញ លើកយកមកបើកសវនាការជំនុំជម្រះទោស ដែលដឹកនាំដោយលោក លី សុខលេង ប្រធានក្រុមប្រឹក្សាជំនុំជម្រះ លោក សេង រិទ្ធីលោក ម៉ុង មុនីសោភា ចៅក្រមអម និងលោកស្រី សឺុ វណ្ណី ព្រះរាជអាជ្ញារង ជាតំណាងអយ្យការ ។ សវនាការលើអង្គសេចក្តីនេះ ក្នុងសំណុំរឿងផ្តើមគំនិតក្នុងអំពើឃាតកម្មគិតទុកជាមុន ដែលមានជនជាប់ចំនួន៥នាក់ បានបង្ហាញមុខនៅក្នុងរង្វង់ក្រចកសេះ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]