បើកបរសូមប្រុងប្រយ័ត្ន! រថយន្តកុងតឺន័រក្រុមហ៊ុន «ផែស្ងួតតិចស្រ៊ុន» បុកចូល ផ្ទះប្រជាពលរដ្ឋនៅស្រុកកៀនស្វាយ បណ្តាលឲ្យរងរបួសធ្ងន់ស្រាលចំនួន៧នាក់ និងខូចខាតសម្ភារមួយចំនួនធំ

(កណ្តាល)៖ មានករណីគ្រោះថ្នាក់ចរាចរណ៍ ដោយរថយន្តកុងតឺន័របុកចូលផ្ទះអ្នកលក់ដូរ នៅតាមផ្លូវជាតិលេខ១ នៅម្តុំផ្សារគគីរ ឃុំគគីរ ស្រុកកៀនស្វាយ ខេត្តកណ្តាល បណ្តាលឲ្យមនុស្សចំនួន៧នាក់រងរបួសធ្ងន់ស្រាល ខណៈផ្ទះ១ខ្នង ខូចខាតស្ទើរទាំងស្រុង និង២ខ្នងទៀត ខូចខាតបន្តិចបន្តួច ព្រមទាំងខូចខាតសម្ភារមួយចំនួនធំ។

តាមសម្តីរបស់សាក្សីនៅកន្លែងកើតហេតុ បានថ្លែងប្រាប់ភ្នាក់ងារ Fresh Nesw បានឱ្យដឹងថា នៅយប់រំលងអាធ្រាត្រចូលថ្ងៃទី១៧ ខែសីហា ឆ្នាំ២០១៧ មុនពេលកើតហេតុ គេឃើញមានរថយន្ដកុងតឺន័រ របស់ក្រុមហ៊ុន «ផែស្ងួតតិច​ស្រ៊ុន» មួយគ្រឿងបើកបរពីភ្នំពេញ ទៅអ្នកលឿងខេត្តព្រៃវែង ប្រហែលតៃកុងឡានងងុយដេកក៏រេចង្កូតបុកចូលផ្ទះ របស់ប្រជាពលរដ្ឋដែលលក់ដូរនៅតាមដងផ្លូវ តែម្តង។

ក្រោយកើតហេតុ អ្នកបើកបររថយន្ត និងរថយន្តត្រូវសមត្ថកិច្ចឃាត់បានភ្លាមៗ រួចនាំខ្លួនទៅសួរនាំនៅអធិការដ្ឋាននគរបាលស្រុកកៀនស្វាយ ដើម្បីដោះស្រាយតាមនីតិវិធីច្បាប់៕

ប្រភព៖ Fresh News