Lukaku ថា Mourinho ជាអ្នកធើ្វឲ្យខ្លួនក្លាយជាកីឡាករល្អ តាំងពីនៅ Chelsea មកម្ល៉េះ

អាមេរិក៖ ខែ្សប្រយុទ្ធថ្មីរបស់ក្រុមបិសាចក្រហម Manchester United កីឡាករ Romelu Lukaku ជឿថា គ្រូបង្វឹកលោក Jose Mourinho នឹងធើ្វឲ្យរូបគេកាន់តែល្អថែមទៀត។

សមាជិកក្រុមជម្រើសជាតិបែលហ្ស៊ិក វ័យ២៤ឆ្នាំ រូបនេះ ទើបតែធើ្វការផ្លាស់ពីក្លិប Everton មកចូលរួមជាមួយ Man Utd កាលពីសប្ដាហ៍មុនក្នុងតម្លៃ ៧៥លានផោន (៩៧លានដុល្លារ)។ 

Lukaku បានស៊ុតគ្រាប់បញ្ចូលទីលើកដំបូងឲ្យ Man Utd ក្នុងជ័យជម្នះ ២-១ លើក្រុម Real Salt Lake កាលពីម្សិលមិញ។

Lukaku ដែលស៊ុតបាន២៥គ្រាប់ក្នុង Premier League រដូវកាលមុន បាននិយាយថា កាលលោក Jose Mourinho នៅដឹកនាំ Chelsea គឺលោកធ្លាប់អភិវឌ្ឍន៍រូបគេម្ដងរួចទៅហើយ។

«គាត់ដឹងថាអ្វីដែលខ្ញុំអាចនាំមកឲ្យក្រុម ហើយគាត់ក៏ជាមនុស្សម្នាក់ដែលចូលចិត្ដលើកទឹកចិត្ដខ្ញុំដែរ» Lukaku និយាយទៅកាន់កាសែតមួយរបស់ចក្រភពអង់គ្លេស។

កីឡាកររូបនេះបន្ដទៀតថា៖ «ខ្ញុំក៏ព្យាយាមលើកទឹកចិត្ដខ្លួនឯងដែរ ប៉ុន្ដែគាត់គឺជាមនុស្សម្នាក់ដែលធើ្វឲ្យខ្ញុំក្លាយជាកីឡាករល្អ។ ខ្ញុំគិត និងរៀនច្រើនពីគាត់ កាលពីសប្ដាហ៍មុន ហើយខ្ញុំពិតជារីករាយដែលអាចធើ្វការជាមួយគាត់ម្ដងទៀត''។

Man Utd នឹងត្រូវប៉ះក្រុមប្រជែង  Man City ក្នុងជំនួបពានរង្វាន់មិត្ដភាព International Champions Cup នៅថៃ្ងព្រហស្បតិ៍ សែ្អកនេះ៕

ប្រភព៖ Goal