ក្រុមហ៊ុន Microsoft បានបញ្ឈប់ការ Update នៅលើទូរស័ព្ទដែលប្រើប្រាស់ Windows 8.1

បរទេស៖  ព័ត៌មានផ្លូវការចេញមកពីក្រុមហ៊ុន Microsoft បានឲ្យដឹងថា បន្ទាប់ពីការដាក់ឲ្យប្រើប្រាស់តាំងពីឆ្នាំ២០១៤មក អស់ពេល៣ឆ្នាំ ទូរស័ព្ទដែលប្រើប្រាស់ ប្រព័ន្ធប្រតិបត្តិការ Windows 8.1 នឹងគ្មានការអភិវឌ្ឍបន្ត (Support) ពីក្រុមហ៊ុន Microsoft ទៀតទេ ដែលចាប់ពីពេលនេះទៅ ទូរស័ព្ទទាំងនោះនឹងមិនទទួលការ Update ទៀតទេ។

ប៉ុន្តែនេះមិនមែនមានន័យថា ក្រុមហ៊ុនMicrosoft នឹងបញ្ឈប់់មហិច្ចតាក្នុងការវាយលុកទីផ្សាទូរស័ព្ទឡើយ ព្រោះថាទូរស័ព្ទដែលប្រើប្រាស់ Windows 10 នៅដំណើរការតាមធម្មតាដដែល។

ក្រឡេកមកមើលកាលពីឆ្នាំ ២០១០វិញ ការបង្កើតទូរស័ព្ទប្រើប្រាស់ Windows 7 គឺដើម្បីប្រកួតប្រជែងជាមួយក្រុមហ៊ុន Apple និងSamsung ដែលប្រើប្រាស់ប្រព័ន្ធប្រតិបត្តិការ iOS និង Android  ប៉ុន្តែ Microsoft ដូចជានៅមានកង្វះខាតនៅឡើយ បើប្រៀបធៀបទៅនឹងដៃគូប្រជែងរបស់ខ្លួន។

ការបាត់បង់ទំនុកចិត្តពីអតិថិជនកើនឡើង បន្ទាប់ពីការដាក់ឲ្យ Update ឡើង Windows 8 ប៉ុន្តែក្នុងពេលនោះគឺឧបករណ៍ដែលប្រើប្រាស់ Windows 7  មិនអាច Update បាន ដែលធ្វើឲ្យអតិថិជនរាប់លាននាក់ លែងទុកចិត្តលើទូរស័ព្ទដែលប្រើប្រាស់ Windows តទៅទៀត។

គួរបញ្ចាក់ផងដែរថាការឈប់ Support ពីក្រុមហ៊ុន Microsoft មិនមែនមានន័យថាទូរស័ព្ទដែលប្រើប្រាស់ Windows 8.1 ចុះក្រោម នឹងក្លាយទៅជាដុំថ្មនោះទេ ព្រោះថាទោះបីជា Update មិនបាន ក៏ទូរស័ព្ទទាំងនោះនៅតែអាចប្រើបានធម្មតា គ្រាន់តែគ្មានការ Update អ្វីថ្មីទៀតប៉ុណ្ណោះ៕