ភ្នំពេញៈ តារាសម្ដែងចង្ការស្រួចមុខដូចកាត់អឺរ៉ុប កញ្ញា អ៊ុន អាលីហ្សា បានសម្រេចបំណងប្រាថ្នា តាំងពីកុមារម្ល៉េះ ក្នុងការបំពេញការងារ ជាអង្គរក្សស្រីឬមន្ត្រីប៉ូលីស ខណៈដែលប្រឡងជាប់ជាមន្ត្រីប៉ូលីស អស់រយៈពេលជិតមួយឆ្នាំ ក្រោយការហ្វឹកហាត់ជំនាញ ផ្នែកការពារក្នុងតួនាទីជាមន្ត្រីអង្គរក្សស្រី ជាផ្លូវការហើយ ។
តារាសម្តែងនិយមភាពសិចស៊ី កញ្ញា អ៊ុន អាលីហ្សា បានឲ្យដឹងថា នាងសម្រេចចិត្តផ្អាកការងារសិល្បៈ ទាំងការសម្តែង និងច្រៀងចោលមួយអន្លើ ក្រោយពីនាងជាប់ឈ្មោះជាមន្ត្រី។ វាគឺជាក្តីបំណងប្រាថ្នាតាំងពីកុមារម្ល៉េះ ក្នុងការបំពេញការងារជាអង្គរក្សស្រី ឬមន្ត្រីប៉ូលីសនេះ ហើយគ្រាដែលនាងជាប់ការងារនេះ គឺជាសមត្ថភាពក្នុងការប្រឡង បូករួមទាំងការពិនិត្យកាយសម្បទារ សមរម្យនឹងអាចបំពេញការងារនេះបាន។
តារាស្រីវ័យ២៩ឆ្នាំស្រីស្អាតមុខខ្ជូតរូបនេះបន្តថា ការងារសិល្បៈទាំងអស់ ត្រូវបានសម្រាក ព្រោះតែនាងត្រូវចូលរួមការហ្វឹកហាត់ ដោយងើបចេញដំណើរ ចាប់តាំងពីម៉ោង៥ភ្លឺ ជាច្រើនទាំងការការពារ ការហ្វឹកហាត់តៃក្វាន់ដូ បាញ់កាំភ្លើង និងជំនាញជាច្រើនទៀត នាសាលាហ្វឹកហ្វឺនមន្ត្រីនគរបាល នាតំបន់ដីឥដ្ឋ ស្រុកកៀនស្វាយ ខេត្តកណ្តាល។ ក្រោយរៀនចប់នាងនឹងបំពេញការងារ លើផ្នែកការពារថ្នាក់ដឹកនាំ ឬគណប្រតិភូអន្តរជាតិ ជាដើម។ ខែក្រោយនេះ នាងនឹងបញ្ចប់ការហ្វឹកហាត់ និងទទួលយកការងារជាច្រើន ដែលថ្នាក់លើដាក់ឲ្យ។
ទោះជាយ៉ាងណា អាលីហ្សា នៅតែបន្តការងារសិល្បៈឡើងវិញ ក្រោយពីនាងហ្វឹកហាត់ចប់ ហើយមានពេលទំនេរពីការងារ។ សម្រាប់អាជីពសម្អាងការ នៅខេត្តកំពង់ធំ គឺនាងនៅតែបន្តបើកដដែល ដោយឲ្យបងប្រុស ជាអ្នកមើលការខុសត្រូវជំនួស។ រឿងរ៉ាវបេះដូងវិញ តារាស្រីរូបនេះបញ្ជាក់ថា នាងមិនមានស្នេហាថ្មីនោះដែរ ក្រោយពីបែកសង្សា ជាថៅកែហាងកាហ្វេ កាលពីកន្លងទៅ។
សូមរំលឹកថា តារាសម្ដែង អ៊ុន អាលីហ្សា ចេញមុខបកស្រាយ ដែលចូលរួមសម្ដែង ក្នុងបទថ្មី «ផ្កាយព្រឹក»ថា នាងមិនបានដឹងទាល់តែសោះថា តួប្រុសត្រូវថតអាក្រាយកាយ ព្រោះតែអ្នកដឹកនាំ មិនបានប្រាប់ឲ្យដឹងមុន ហើយហួសចិត្តនោះ មិនបានដឹងថា តួប្រុសហ៊ានថតស្រាត ក្នុងបទច្រៀងនេះឡើយ ។ ចំពោះការរិះគន់ ពីសំណាក់មហាជន ខណៈដែលនាង បានចូលរួមសម្ដែង ក្នុងបទថ្មី «ផ្កាយព្រឹក» ដែលត្រូវបានលោក ម៉ៃ សុគន្ធ យកមកច្រៀងឡើងវិញ ហើយថតជា MV ថ្មី មានលក្ខណៈសិចស៊ី ហួសពីការស្មាន និងខុសពីអត្ថន័យដើម៕
ប្រភព៖ ដើមអម្ពិល
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
