អេស្ប៉ាញ៖ អតីតគ្រូបង្វឹករបស់ក្រុម Athletic Bilbao លោក Ernesto Valverde ត្រូវបានក្រុមអ្នកមានបុណ្យ FC Barcelona ប្រកាសតែងតាំងជាគ្រូបង្វឹក ក្នុងកុងត្រារយៈពេល២ឆ្នាំ ក្រោយលោក Luis Enrique សម្រេចលាលែងចេញពីតំណែង។
លោក Valverde ដែលនឹងត្រូវបង្ហាញខ្លួនផ្លូវការនៅថៃ្ងព្រហស្បតិ៍ខាងមុខនេះ ក៏ធ្លាប់លេងឲ្យក្រុម Barcelona ផងដែរ ក្នុងចន្លោះពីឆ្នាំ ១៩៨៨ ដល់ឆ្នាំ ១៩៩០ ក្នុងនាមជាខែ្សប្រយុទ្ធ ក្រោមការដឹកនាំរបស់គ្រូបង្វឹកលោក Johan Cruyff ។
ប្រធានក្លិបរបស់ក្រុម Barcelona លោក Josep Maria Bartomeu បានមានប្រសាសន៍ក្នុងសន្និសីទសារព័ត៌មានស្ដីពីការប្រកាសនូវគ្រូបង្វឹកថ្មីថា៖ «លោក Valverde ពិតជាមានការត្រេកអរណាស់, លោកមានសមត្ថភាព បទពិសោធន៍ និងមានចំណេះដឹងទៅលើការងារនេះ»។
«លោក Valverde ស្រលាញ់ និងមានទេពកោសល្យខាងបាល់ទាត់ ហើយគេនឹងមានយុទ្ធសាស្រ្ដដ៏ត្រឹមត្រូវសម្រាប់ដឹកនាំក្លិប និងស្គាល់ច្បាស់អំពីក្លិបនេះ។ កម្រិតនៃការងាររបស់គេគឺល្អ ហើយរូបគេមានសុច្ឆន្ទៈក្នុងពិភពបាល់ទាត់ ជាពិសេសគឺចាប់អារម្មណ៍ទៅនឹងការធើ្វការងារជាមួយនឹងប្រព័ន្ធអេឡិចត្រូនិចចុងក្រោយ» ប្រធានក្លិប Barcelona បន្ថែម។
លោក Ernesto Valverde នឹងចាប់ផ្ដើមដឹកនាំក្រុមក្នុងការប្រកួតផ្លូវការ គឺក្នុងជំនួប Spanish Super Cup ជើងទី១ ទល់នឹងក្រុមគូប្រជែង Real Madrid ក្នុងកីឡដ្ឋាន Nou Camp ក្នុងខែកក្កដា ខាងមុខ៕
ប្រភព៖ EuroSport
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]