ក្រុមគោព្រៃកម្ពុជា ត្រៀមស្វាគមន៍ក្រុមជម្រើសជាតិមីយ៉ាន់ម៉ា ក្នុងជំនួបមិត្ដភាពអន្តរជាតិ នាខែវិច្ឆិកា ខាងមុខ

ភ្នំពេញ៖ បើយោងតាមប្រភពពីសហព័ន្ធបាល់ទាត់របស់ប្រទេសមីយ៉ាន់ម៉ា បានឲ្យដឹងថា ក្រុមជម្រើសជាតិមីយ៉ាន់ម៉ា នឹងធើ្វដំណើរមកកាន់រាជធានីភ្នំពេញ ប្រទេសកម្ពុជា ដើម្បីធើ្វការប្រកួតមិត្ដភាពអន្ដរជាតិ។

ការប្រកួតមិត្ដភាពរវាងក្រុមជម្រើសជាតិកម្ពុជា នឹងក្រុមជម្រើសជាតិមីយ៉ាន់ម៉ា ត្រូវបានគេរំពឹងថានឹងអាចធើ្វឡើងនៅថៃ្ងទី៩ ខែវិច្ឆិកា ដែលចំថៃ្ងទិវាបុណ្យឯករាជ្យជាតិរបស់ប្រទេសកម្ពុជា ផងដែរ។

ការប្រកួតចុងក្រោយបំផុតរវាងក្រុមទាំង២គឺ មីយ៉ានម៉ា បានយកឈ្នះកម្ពុជា ៣-១ ក្នុងពានរង្វាន់ AFF Suzuki Cup ឆ្នាំ២០១៦ ដែលពេលនោះក្រុមដែលមានរហ័្សសនាមថា គោព្រៃ ស្ថិតក្រោមការដឹកនាំរបស់គ្រូសញ្ជាតិកូរ៉េខាងត្បូង Lee Tae-hoon ខណៈបច្ចុប្បន្ននេះ គឺគ្រូសញ្ជាតិប្រេស៊ីល លោក Leonardo Vitorino បានឡើងមកកាន់ដំណែងជំនួសវិញ កាលពីខែមិនា កន្លងទៅ។

សូមបញ្ជាក់ផងដែរថា ក្រុមបាល់ទាត់ជម្រើសជាតិកម្ពុជានឹងទទួលស្វាគមន៍ក្រុមជម្រើសជាតិឥណ្ឌូណេស៊ីនាថ្ងៃទី០៨ ខែមិថុនា ឆ្នាំ២០១៧ នៅពហុកីឡដ្ឋានជាតិអូឡាំពិកក្នុងការប្រកួតមិត្តភាពអន្តរជាតិ បន្ទាប់មកក្រុមជម្រើសជាតិកម្ពុជាត្រូវទទួលស្វាគមន៍ក្រុមខ្លាំងអាហ្វហ្គានីស្ថានក្នុងការប្រកួតពានរង្វាន់ទ្វីបអាស៊ី (Asian Cup) វគ្គជម្រុះជុំទី៣ក្នុងពូល C ជាបន្ដ៕

ប្រភព៖ football-tribe