បុណ្យសមុទ្រឆ្នាំនេះ ធ្វើនៅកែប ពីថ្ងៃទី២៩-៣០ ខែធ្នូខាងមុខនេះ

ភ្នំពេញៈ យោងតាមប្រភពព័ត៌មានពីគេហទំព័រ NOCC បានឱ្យដឹងថា កម្មវិធីពិធីបុណ្យសមុទ្រឆ្នាំនេះ គឺ ចាប់ផ្ដើមធ្វើនៅខេត្តកែប ដែលមានរយៈពេល២ថ្ងៃ ចាប់ពីថ្ងៃទី២៩-៣០ ខែធ្នូ ឆ្នាំ២០១២ខាងមុខ ដោយមានការចូលរួម ពីប្រភេទកីឡាចំនួន៩វិញ្ញាសា ដែលគណៈកម្មាធិការ រៀបចំដាក់ឲ្យប្រកួត និងទស្សនា នាពេលនោះ ។

លោក វ៉ាត់ ចំរើន អគ្គលេខាធិការគណៈកម្មាធិការ ជាតិអូឡាំពិកកម្ពុជា (NOCC) បានឱ្យដឹងថា “ព្រឹត្តិការណ៍ដែលធ្វើជារៀងរាល់ឆ្នាំនេះ គិតចាប់ពីឆ្នាំ២០១១ បានធ្វើនៅខេត្តព្រះសីហនុ មានកីឡាចំនួន ៧ប្រភេទ ប៉ុណ្ណោះបានដាក់ឱ្យចូលរួមប្រកួត ហើយនៅឆ្នាំ២០១២នេះ គឺកើនដល់៩ប្រភេទកីឡា ខណៈយើងសង្ឃឹមថា នឹងមានភ្ញៀវទេសចរណ៍កាន់តែច្រើន ចូលមកទស្សនាទាំងជាតិ និងអន្ដជាតិ” ។

លោកបានបន្ថែមថា កីឡា៩ប្រភេទនោះមាន ទី១.ហែលទឹក (ចម្ងាយ ៣-៥ គីឡូម៉ែត្រ) ២.រត់ប្រណាំង (ចម្ងាយ ៥-១០គីឡូម៉ែត្រ) ៣.ប្រណាំងទូក ( ទូកក្តាម ទូកផ្កាចា ទូកកានូ-កាយ៉ាក និងទូកប្រពៃណី) ៤.កីឡាទ្រីយ៉ាត្លុង ឬDOUATHLON ៥.បាល់ទះ នៅលើឆ្នេរខ្សាច់ ៦.ប្រដាល់ក្បាច់គុនបុរាណខ្មែរ (៦គូ) ៧.ជិះម៉ូតូលើទឹក (Jetsky) ៨.Paragliding (មនុស្សជិះម៉ាស៊ីនហោះ) និងទី៩.កីឡារអិលលើក្តារ (Skaterstan) ជាមួយនឹងកីឡាករ-កីឡាការិនីជាង ៣០០នាក់ផងដែរ ។

សូមបញ្ជាក់ថា ព្រឹត្តិការណ៍នៃពិធីបុណ្យសមុទ្រខាងលើនេះ មិនត្រឹមតែជាការរំលឹកដល់ ការជាប់ជា សមាជិកឆ្នេរសមុទ្រ ដ៏ស្រស់ស្អាតបំផុតលើលោក ប៉ុណ្ណោះទេ ថែមទាំងជាការទាក់ទាញភ្ញៀវទេសចរ ឱ្យចូលមកក្នុងប្រទេសយើង កាន់តែច្រើនឡើងៗ ក៏ដូចជាពង្រីកទេសចរណ៍កម្ពុជាកាន់ឱ្យ កាន់តែរីកចម្រើនផងដែរ ហើយជាពិសេសក៏មានការ អញ្ជើញចូលរួមពីប្រមុខ រាជរដ្ឋាភិបាលកម្ពុជា គឺសម្ដេចអគ្គមហាសេនាបតីតេជោ ហ៊ុន សែន នៅក្នុងកម្មវិធីនោះផងដែរ ៕

កីឡា Jetski

កីឡា Paragliding

ទូកកានូ

ផ្នែកមួយនៃកីឡា Triathlon

កីឡា Skateirstan

ដោយ៖ ដើមអម្ពិល(DAP)

ផ្តល់សិទ្ធដោយ ដើមអម្ពិល