រំភើបចិត្តមិនស្ទើរ! John Cena សុំមិត្តស្រីរៀបការ នៅកណ្តាលសង្វៀន ធ្វើឲ្យអ្នកគាំទ្រជាច្រើនមានការភ្ញាក់ផ្អើល (មានវីដេអូ)

អាមេរិក៖ ជារឿងមួយដ៏គួរឲ្យរំភើប និងភ្ញាក់ផ្អើល ក្រោយពីរង់ចាំអស់រយៈពេលយូរ នៅពេលនេះអ្នកកីឡាកាស John Cena បានសម្រេចចិត្តសុំមិត្តស្រីរបស់ខ្លួនរៀបការហើយ នៅកណ្តាលសង្វៀន ក្នុងព្រឹត្តការណ៍ដ៏ធំ Wrestlemania ក្រោមក្រសែភ្នែកអ្នកចូលរួមទស្សនាជាង ៧មឺុននាក់ ក្នុងទីក្រុង Orlando រដ្ឋ Florida សហរដ្ឋអាមេរិក។

តាមប្រភពព័ត៌មានបានឲ្យដឹងថា អ្នកកីឡាកាសអាជីពមកពីស្ថាប័ន WWE រូបនេះ បានលុតជង្គង់សុំមិត្តស្រីរបស់ខ្លួនរៀបការ បន្ទាប់ពួកគេបានចាប់ដៃគូគ្នាប្រកួតឈ្នះ The Miz និង Maryse ក្នុងព្រឹត្តការណ៍ប្រចាំឆ្នាំ Wrestlemania ។

នៅចំកណ្តាលសង្វៀន ក្រោមក្រសែភ្នែកអ្នកទស្សនាជាច្រើនមឺុននាក់ John បាននិយាយទៅកាន់ Nikka ថា «ខ្ញុំបានរង់ចាំពេលនេះ អស់ជាច្រើនឆ្នាំហើយ…ខ្ញុំក៏ធ្លាប់បានសន្យាដែរថានឹងសុំនាងរៀបការ នៅពេលវេលាសមស្របណាមួយ» ។

ក្រោយពីបានថ្លែងពាក្យពេជន៍ដ៏ផ្អែមល្ហែមអស់ជាច្រើនរួចមក John ក៏បានលុតជង្គង់សុំនាងរៀបការ ធ្វើឲ្យ Nikki ដែលជាមិត្តស្រីរំភើបចិត្តខ្លាំង ក៏ឆ្លើយយល់ព្រមភ្លាមៗតែម្តង។

គួរឲ្យដឹងថា John Cena និងនាង Nikki Bella បានស្គាល់ និងស្រលាញ់គ្នាតាំងពីឆ្នាំ២០១២មកម្ល៉េះ បន្ទាប់ពី John បានសម្រេចចែកផ្លូវលែងលះគ្នាជាមួយអតីតភរិយានាង Elizabeth។

ដោយឡែកចំពោះ Nikki វិញ បន្ទាប់ពីបានយល់ព្រមរៀបការហើយនោះ នាងបានបង្ហាញពីអារម្មណ៍របស់នាងទៅកាន់អ្នកគាំទ្រនៅក្នុងបណ្តាញសង្គមថា «រីករាយទាំងទឹកភ្នែក!! ខ្ញុំមានអារម្មណ៍ថា ពួកយើងបានរៀបការរួចទៅហើយ…ស្វាគមន៍មកកាន់គ្រួសាររបស់យើង @JohnCena» ៕

ប្រភព៖ Dailymail

ដោយឡែក ព័ត៌មានគួរឲ្យចាប់អារម្មណ៍មួយផ្សេងទៀត៖  អស្ចារ្យមែន! Real Madrid ក្លាយជាក្រុមបាល់ទាត់ដំបូងគេ ដែលមានអ្នកគាំទ្ររហូតដល់១០០លាននាក់ លើហ្វេសប៊ុក

អេស្ប៉ាញ៖ ក្លិបយក្សរបស់អេស្ប៉ាញ Real Madrid មិនត្រឹមតែនាំមុខក្នុងតារាងចំណាត់ថ្នាក់នៃលីកបាល់ទាត់កំពូលអេស្ប៉ាញនោះទេ មិនតែប៉ុណ្ណោះគឺជាក្រុមដែលមានអ្នកគាំទ្រច្រើនជាងគេទៀតផងនៅលើពិភពលោក មិនថានៅខាងក្រៅ ឬនៅក្នុងបណ្តាញសង្គម។

ទាក់ទងនឹងបណ្តាញសង្គមនេះដែរ ថ្មីៗនេះ ម្ចាស់ជើងឯក១១សម័យនៃពានរង្វាន់ UEFA Champions League ក្លិប Real Madrid បានក្លាយជាក្លិបដំបូងគេបង្អស់ ដែលមានអ្នកគាំទ្ររហូតដល់១០០.៤៦លាននាក់ នៅក្នុងបណ្តាញសង្គមហ្វេសប៊ុក តាមពីក្រោយដោយក្លិប Barcelona ដែលមានអ្នកគាំទ្រ ១០០.២លាននាក់ តិចជាង Real Madrid ។ នេះបើយោងតាមការបង្ហោះក្នុងទំព័រហ្វេសប៊ុករបស់ក្លិប Real Madrid និង Barcelona។

គួរឲ្យដឹងផងដែរថា បន្ទាប់ពីក្លាយជាក្លិបដំបូងគេដែលមានអ្នកគាំទ្ររហូតដល់១០០លាននាក់នៅលើបណ្តាញសង្គមហ្វេសប៊ុកហើយនោះ Real Madrid ក៏បានផ្តល់ជូននូវជ័យជំនះមួយផងដែរ ដោយបានបំបាក់ក្រុម Alaves ក្នុងលទ្ធផល ៣-០ ក្នុងជំនួបនៃលីក La Liga កាលពីយប់មិញ។

ដូចគ្នានេះដែរ Barcelona ក៏ទទួលបានជ័យជំនះទៅលើក្រុមម្ចាស់ផ្ទះ Granada ក្នុងលទ្ធផល ៤-១ ផងដែរ ដោយក្នុងនោះ Neymar បានបង្កើតប្រវត្តិសាស្ត្រមួយ ក្លាយជាកីឡាករប្រស៊ីលទី៣ ដែលស៊ុតចូលបាន១០០គ្រាប់ ឲ្យក្លិបអ្នកមានបុណ្យ Barcelona ។

ដូច្នេះជាមួយលទ្ធផលជ័យជំនះ កាលពីយប់មិញនេះ Real នៅតែបន្តឈរលេខ១ មាន៦៨ពិន្ទុ ក្នុងតារាងចំណាត់ថ្នាក់ដដែល តាមពីក្រោយដោយក្រុម Barcelona មាន៦៦ពិន្ទុ ស្ថិតក្នុងចំណាត់ថ្នាក់លេខ២ ៕ 

• ស្នេហា