ខេត្ដបាត់ដំបង ៖ យោងតាមព័ត៌មាន ពីសមត្ថកិច្ចបានឲ្យដឹងថា លោកគ្រូបង្រៀនថ្នាក់ទី៣ម្នាក់បានចងកសម្លាប់ខ្លួន នៅក្នុងសាលារៀនមួយកន្លែង ក្នុងស្រុកបាណន់ រីឯក្មេងស្រីម្នាក់អាយុ១០ឆ្នាំ រៀនថ្នាក់ទី៣ ក៏បានចងកសម្លាប់ខ្លួនដែរនៅក្នុងផ្ទះរបស់នាង ក្នុងស្រុកសង្កែ ។ អ្វីដែលគួរឲ្យកត់សម្គាល់នោះ គឺករណីនេះបានកើតឡើងក្នុងចន្លោះពេលគ្នាតែជាង២ម៉ោងប៉ុណ្ណោះ ក្នុងថ្ងៃតែមួយ ។
ប្រភពពីសមត្ថកិច្ច បានឲ្យដឹងទៀតថា លោកគ្រូ សំ រស់ អាយុ៤៣ឆ្នាំ បង្រៀនថ្នាក់ទី៣នៅសាលាបឋមសិក្សាតាគ្រាម រស់នៅក្នុងភូមិក្រពើខាងជើង ឃុំភ្នំសំពៅ ស្រុកបាណន់ បានចងកសម្លាប់ខ្លួននៅវេលាម៉ោង៦ព្រឹក ថ្ងៃទី២៣ ខែមីនា ។ លោកគ្រួបង្រៀនរូបនេះ បានយកខ្សែអង្រឹងចងកជាប់នឹងធ្នឹមនៅក្នុងបន្ទប់ដេកយាមសាលាដែលគាត់បង្រៀន នៅក្នុងភូមិតាគ្រាម ឃុំតាគ្រាម ស្រុកបាណន់ ហើយត្រូវលោកគ្រូអ្នកគ្រួ និងសិស្សានុសិស្សប្រទះឃើញពេលពួកគេទៅដល់សាលា ។
ប្រភពដដែលបញ្ជាក់ថា ទាំងសាច់ញាតិនិងសាក្សីនានា នៅមិនទាន់ដឹងពីមូលហេតុដែលនាំឲ្យលោកគ្រូ សំ រស់ ចងកសម្លាប់ខ្លួននោះទេ តែលោកគ្រូបានបន្សល់ពាក្យមួយឃ្លាដែលគេរកឃើញនៅលើក្រដាសមានខ្លឹមសារថា «សុំដើរមួយថ្ងៃទៀតហើយ» ។ ទោះជាយ៉ាងណា ពុំទាន់មានអ្នកណាម្នាក់ យល់អំពីខ្លឹមសារដែលលោកគ្រូបង្រៀនរូបនេះបន្សល់ទុកនោះឡើយ ។
ខណៈមន្ត្រីជំនាញមិនទាន់បញ្ចប់ការពិនិត្យធ្វើកោសល្យវិច័យសពលោកគ្រូបង្រៀនថ្នាក់ទី៣ នៅស្រុកបាណន់រួចរាល់ផង ស្រាប់តែមានសេចក្ដីរាយការណ៍មួយផ្សេងទៀតថា ក្មេងស្រីម្នាក់ឈ្មោះ ជាចំរើន អាយុ១០ឆ្នាំ រៀនថ្នាក់ទី៣ដែរ បានចងកសម្លាប់ខ្លួននៅក្រោមផ្ទះរបស់នាង នាម៉ោង៨និង១៥នាទីព្រឹក ថ្ងៃទី២៣ ខែមីនា ស្ថិតក្នុងភូមិអន្លង់វិល
ឃុំអន្លង់វិល ស្រុកសង្កែ ដោយមិនដឹងពីមូលហេតុ។
មន្ត្រីស្រុកសង្កែនិយាយថា ក្មេងស្រីនេះបានដាក់កៅអីជ័រឡើងឈរ រួចយកកន្សែងចងកភ្ជាប់នឹងរតផ្ទះ ខណៈឪពុកមិននៅ ហើយម្ដាយនាងក៏រវល់ទៅផ្សារដែរ ។ លោក វ៉ាត់ ជា អាយុ៤៨ឆ្នាំ និយាយថា គាត់មិនទាន់ដឹងពីមូលហេតុដែលនាំឲ្យកូនស្រីជាទីស្រឡាញ់របស់គាត់ចងកសម្លាប់ខ្លួននោះទេ ។ គាត់និយាយទាំងទឹកភ្នែកថា គ្មាននរណាបានស្ដីបន្ទោសនាងពីរឿងអ្វីនោះឡើយ ស្រាប់តែនៅសុខៗនាងយកកន្សែងទៅចងកសម្លាប់ខ្លួន ។ គាត់សែនរន្ធត់ចិត្តមែនទែន ឬក៏នាងធ្វើនេះដោយកំរោលចូល គឺគាត់មិនយល់ទាល់តែសោះ ។
ទោះជាយ៉ាងណា បើតាមសមត្ថកិច្ចនិយាយថា មន្ត្រីជំនាញបាននិងកំពុងពិនិត្យសពជនរងគ្រោះ និងសួរនាំសាច់ញាតិជនរងគ្រោះទាំង២ករណីនេះ ដើម្បីស្វែងរកពីមូលហេតុពិត ខណៈក្រុមគ្រួសារកំពុងសោយសោកនិងកំពុងរៀបចំធ្វើបុណ្យតាមប្រពៃណី ៕
ប្រភព៖ កោះសន្តិភាព
ដោយឡែក ព័ត៌មានចាប់អារម្មណ៍មួយផ្សេងទៀត៖
អស្ចារ្យ... រៀនពេទ្យចប់ភ្លាម បើកផ្ទះព្យាបាលជំងឺភ្លាម
ខេត្តកំពង់ស្ពឺ ៖ កាលពីរសៀលថ្ងៃទី២៣ ខែមីនា ឆ្នាំ២០១៧ សមត្ថកិច្ចចម្រុះមួយក្រុមដឹកនាំដោយលោកវេជ្ជបណ្ឌិត ជិន កែវសុវណ្ណ អនុប្រធានមន្ទីរសុខាភិបាលខេត្តកំពង់ស្ពឺ និងជាប្រធានក្រុមការងារថ្នាក់ខេត្ត បានចុះពិនិត្យកន្លែងព្យាបាលជំងឺទូទៅរបស់និស្សិតពេទ្យម្នាក់ ដែលទើបនឹងបញ្ចប់ការសិក្សាបានយកសញ្ញាប័ត្ររបស់ខ្លួនមកដាក់តាំង ហើយបើកបន្ទប់ពិគ្រោះព្យាបាលជំងឺ ព្រមទាំងចេញលិខិតផ្សេងៗដល់អ្នកជំងឺទៀតផង។
គ្រូពេទ្យរូបនេះឈ្មោះ ញ៉ែម សុខម៉េង ភេទប្រុស អាយុ២៨ឆ្នាំ ស្នាក់នៅ និងបើកកន្លែងព្យាបាលជំងឺ ស្ថិតនៅភូមិរំដួល៨៨ ហៅផ្សារតាឡាត់ ឃុំអូរ ស្រុកភ្នំស្រួច ខេត្តកំពង់ស្ពឺ។
អ្វីដែលជាការកត់សម្គាល់ របស់សមត្ថកិច្ចចម្រុះនោះត្រង់ថា លោកគ្រូពេទ្យរូបនេះ បានបោះពុម្ពក្រដាសវេជ្ជបញ្ជា ដោយយកឈ្មោះមន្ទីរសុខាភិបាលខេត្តកំពង់ស្ពឺ មកដាក់ទៀតផង ដែលការដាក់ដូច្នេះត្រូវបានចាត់ទុកថា ខុសច្បាប់ ព្រោះតែរូបគាត់មិនមែនជាមន្ត្រីរាជការ ដែលបម្រើការក្នុងអង្គភាពរដ្ឋ ។ ការបើកអាជីវកម្មរកស៊ីបែបនេះ ត្រូវបានមន្ត្រីប្រាប់ថា វាជារឿងមិនត្រឹមត្រូវឡើយ ករណីនេះអាចហៅបានថា រកស៊ីបន្លំមហាជន ជាពិសេសប្រជាពលរដ្ឋ ដែលរស់នៅតំបន់ខាងលើតែម្តង។
ក្នុងការពិនិត្យនេះដែរ ក្រុមចម្រុះរកឃើញថា កន្លែងព្យាលជំងឺរបស់លោក ញ៉ែម សុខម៉េង បើកមិនត្រឹមត្រូវតាមស្តង់ដា និងខ្វះអនាម័យ ជាពិសេស គឺទូដាក់ថ្នាំតែម្តង។ ក្នុងការត្រួតពិនិត្យគណៈកម្មការចម្រុះបានណែនាំដល់គ្រូពេទ្យរូបនេះ ព្រមទាំងឱ្យធ្វើកិច្ចសន្យា៣ចំណុច ៖
ទី១-ឱ្យកាត់បន្ថយចំនួនគ្រែពីច្រើនមកតិច អាចនៅត្រឹម២គ្រែ កាត់បន្ថយមុខឱសថ ព្រមទាំងអនាម័យក្នុង និងក្រៅបរិវេណ ព្រមទាំងត្រួតពិនិត្យទុយោទីបអុកស៊ីហ្សែនផងដែរ
ទី២-ឈប់យកវេជ្ជបញ្ជាជ្រកក្រោមស្លាកមន្ទីរសុខាភិបាលមកប្រើប្រាស់ចាប់ពីថ្ងៃធ្វើកិច្ចសន្យានេះតទៅ
ទី៣-បើសិនជាថ្ងៃក្រោយលោក ញ៉ែម សុខម៉េង មិនគោរពតាមកិច្ចសន្យានេះទេ លោកសូមទទួលខុសត្រូវចំពោះមុខច្បាប់ទាំងស្រុង។
បើតាមគ្រូពេទ្យមួយរូបលើកឡើងថា តាមពិតនិស្សិតពេទ្យដែលទើបបញ្ចប់ការសិក្សាសាលារដ្ឋក្តី ឯកជនក្តី ត្រូវចុះធ្វើកម្មសិក្សារយៈពេល៣ឆ្នាំយ៉ាងតិច ទើបអាចសុំច្បាប់បើកអាជីកម្មបាន មិនមែនរៀនចប់ភ្លាមមកបើកភ្លាមនោះទេ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]