រាជធានីភ្នំពេញ ៖ សេចក្តីរាយការណ៍ឱ្យដឹងថា ក្មេងប្រុសជាសិស្សសាលាគោកបញ្ជាន់ម្នាក់ ត្រូវបានលង់ទឹកស្លាប់យ៉ាងអាណោចអាធ័ម បង្កការភ្ញាក់ផ្អើលកាលពីវេលាម៉ោង០៩ និង៣០នាទីព្រឹកថ្ងៃទី២២ មីនា នេះ ស្ថិតត្រង់ចំណុចស្រះទឹកក្នុងវត្តគោកបញ្ជាន់ ភូមិគោកបញ្ជាន់ សង្កាត់ចោមចៅ ខណ្ឌពោធិ៍សែនជ័យ ។
ប្រភពឱ្យដឹងថា ក្មេងប្រុសរងគ្រោះខាងលើ ឈ្មោះទ្រី សុបញ្ញា អាយុ១៣ឆ្នាំ ជាសិស្សាសាលាបឋមសិក្សាគោកបញ្ជាន់ ។ ប្រភពបន្តថា មុនពេលកើតហេតុ ក្មេងប្រុសចេញពីផ្ទះទៅសាលារៀនធម្មតា តែព្រឹកនេះ ត្រូវអ្នកគ្រូសុំច្បាប់មិនបានមកបង្រៀនទេ។ ស្រាប់តែក្រុមក្មេងទាំងនេះមិនត្រឡប់ទៅផ្ទះ បែរជានាំគ្នាទៅមុជទឹកស្រះក្នុងសាលានោះដែលមានជម្រៅ៥ម៉ែត្រ ។ ខណៈកំពុងហែលលេងសុខៗ ក្មេងប្រុសរងគ្រោះបានរមួលក្រពើ ក៏លង់ក្នុងទឹកបាត់តែម្តង ។ ពេលនោះ ត្រូវក្មេងៗដូចគ្នាបានស្រែកបង្កការភ្ញាក់ផ្អើលឆោឡោឡើង ។
ប្រភពបន្តទៀតថា គិតត្រឹមវេលាម៉ោង១០ និង២០នាទីព្រឹកថ្ងៃដដែលនេះ សាកសពក្មេងប្រុសរងគ្រោះ មិនទាន់ត្រូវបានរកឃើញនៅឡើយ ខណៈសមត្ថកិច្ចកំពុងស្វែងរក ។ អ្វីដែលគួរឱ្យសង្វេគនោះ គឺគេឃើញម្តាយក្មេងរងគ្រោះ បានស្រែកទ្រហោយំពេញកន្លែងកើតហេតុ ។
ប្រភព៖ កោះសន្តិភាព
ដោយឡែក ព័ត៌មានគួរឲ្យចាប់អារម្មណ៍មួយផ្សេងទៀត៖
គួរឲ្យអាណិត! ដំរីមួយក្បាលត្រូវខ្សែភ្លើងឆក់ងាប់ នៅជើងភ្នំតំបន់គីរីរម្យ ស្រុកកំពង់សីលា ខេត្តព្រះសីហនុ
(ព្រះសីហនុ)៖ ដំរីដ៏ធំមួយក្បាលត្រូវបានប្រជាពលរដ្ឋមូលដ្ឋាន ប្រទះឃើញដេកងាប់ នាព្រឹកថ្ងៃទី២២ ខែមីនា ឆ្នាំ២០១៧នេះ ស្ថិតនៅតាមជើងភ្នំតំបន់គីរីរម្យជាប់ ក្នុងទឹកដីស្រុកកំពង់សីលា ខេត្តព្រះសីហនុ ព្រំប្រទល់ស្រុកភ្នំស្រួច ខេត្តកំពង់ស្ពឺ។
បើតាមរបាយការណ៍របស់មន្ទីរព័ត៌មាន ខេត្តព្រះសីហនុ មន្ត្រីឧទ្យានុរក្ស នៃមន្ទីរបរិស្ថានខេត្ត ព្រះសីហនុ បានបញ្ជាក់ថា មូលហេតុដែលនាំឲ្យដំរីមួយក្បាលនេះ ដេកងាប់ដោយសារត្រូវខ្សែភ្លើងឆក់។
មន្រ្តីឧទ្យានុរក្សបានបន្តថា «ហ្វូងសត្វដំរីវា បានចុះពីព្រៃមកត្រដុះនឹងបង្គោលភ្លើង ដែលកន្លងមក ហ្វូងសត្វដំរីទាំងនោះតែងតែចុះពីភ្នំមកស៊ីដំណាំក្នុងចំាការរបស់ប្រជាពលរដ្ឋ នៅពេលយប់ និងធ្លាប់បានធ្វើឲ្យបង្គោលភ្លើងកម្លាំងខ្លាំង អូតង់ស្យុង បាក់រលំកន្លងរួចមកហើយ»។
ក្រោយទទួលបានព័ត៌មានពីអ្នកស្រុក មន្រ្តីឧទ្យានុរក្ស នៃមន្ទីរបរិស្ថាន និងសមត្ថកិច្ចមូលដ្ឋានបានចុះទៅពិនិត្យមើលផ្ទាល់ ដើម្បីចាត់ចែងតាមនីតិវិធី៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
