បុរសម្នាក់ចង-ក សម្លាប់ខ្លួននៅ​ក្នុងផ្ទះសំណាក់ «មានជ័យ» ដោយពុំដឹង​មូល​ហេតុ

(ភ្នំពេញ)៖ បុរសម្នាក់ត្រូវបានគេប្រទះឃើញចង-ក សម្លាប់ខ្លួននៅក្នុងបន្ទប់ទឹកផ្ទះសំណាក់ «មានជ័យ» ដោយពុំដឹងពីមូល​ហេតុច្បាស់លាស់ គ្រាន់បន្សល់ទុកតែអត្តសញ្ញណប័ណ្ណ២សន្លឹក នៅលើគ្រែពូក។

ហេតុការណ៍ខាងលើនេះ បង្កឲ្យភ្ញាក់ផ្អើលកាលពីវេលាម៉ោង១០ព្រឹក ថ្ងៃទី១៥ ខែមីនា ឆ្នាំ២០១៧ ស្ថិតនៅក្នុងបន្ទប់លេខ៣០៦ ជាន់ទី៣ ផ្ទះសំណាក់យ៉ីហោ «មានជ័យ» ស្ថិតនៅតាមបណ្តោយផ្លូវវេងស្រេង ទល់មុខអាងទឹក ភូមិត្រពាំងថ្លឹង សង្កាត់ចោមចៅ ខណ្ឌពោធិសែនជ័យ ។

ជនរងគ្រោះបើតាមពិនិត្យលើអត្តសញ្ញាណប័ណ្ណបន្សល់ទុកមានឈ្មោះ ម៉ៅ សារ៉ាត់ អាយុ២៣ឆ្នាំ មានទីលំនៅភូមិស្វាយ ឃុំពករៃកន្លោង ស្រុកពោធិ៍រៀង ខេត្តព្រៃវែង មានទីកន្លែងកំណើត ឃុំតាកោ ស្រុកកំពង់លាវ ខេត្តព្រៃវែង។ ជនរងគ្រោះកាន់អត្តសញ្ញាណប័ណ្ណលេខ051502934។

តាមម្ចាស់ផ្ទះសំណាក់ មិនបានប្រាប់ឈ្មោះ បានឲ្យដឹងថា ជនរងគ្រោះបានដើរថ្មើជើងមកជួលបន្ទប់ស្នាក់នៅ១យប់១ថ្ងៃ ស្មើ២៤ម៉ោង ក្នុងតម្លៃ៥ដុល្លារ ចូលនៅវេលាម៉ោង០៩៖៤០នាទីព្រឹកថ្ងៃទី១៤ ខែមីនា ដោយសម្រាកបន្ទប់លេខ៣០៦ ជាន់ទី៣ លុះរហូតដល់វេលាម៉ោង១០ព្រឹកថ្ងៃទី១៥ ខែមីនា ឆ្នាំ២០១៧ បន្ទាប់ពី មេការផ្ទះសំណាក់ឡើង​ទៅបំណងសាកសួរ​ស្នាក់នៅ​បន្ត ឬត្រូវចាកចេញតែដល់ពេលគោះទ្វារហៅមិនសូរមាត់ឆ្លើយទើបរុញទ្វារ ដោយជនរងគ្រោះ មិនបានដាក់គន្លឹះពីក្នុងឡើយ បើកទ្វារភ្លាម ពុទ្ធោ! ប្រទះឃើញជនរងគ្រោះចងកសម្លាប់ខ្លួនស្លាប់បាត់ទៅហើយក្នុងបន្ទប់ទឹក ទើបរត់ចុះមកក្រោម​វិញរាយ​ការណ៍ប្រាប់សមត្ថកិច្ចចុះមកពិនិត្យ។

បើតាមសម្តីបុរសឈ្មោះ សែម ឆក អាយុ២៦ឆ្នាំ ជាមេការផ្ទះសំណាក់មានជ័យខាងលើ មានស្រុកកំណើតភូមិស្រកានាគ ឃុំតាកែន ស្រុកឈូក ខេត្តកំពត បានឲ្យដឹងថា ក្រោយពីជនរងគ្រោះចូលមកជួលបន្ទប់ស្នាក់នៅ១ថ្ងៃ បន្ទប់ខាងលើ រហូតដល់​វេលាម៉ោង១០ព្រឹកថ្ងៃទី១៥ ខែមិនា ត្រូវគម្រប់១ថ្ងៃហើយ ពេលឡើងទៅក្នុងបំណងសាកសួរ ស្នាក់នៅបន្តឬ​ត្រូវចាកចេញ ទើបគោះទ្វារហៅ មិនសូរ្យឆ្លើយរុញទ្វារឃ្វាំងស្រាប់តែប្រទះឃើញ សាកសពជនរងគ្រោះ ចងក​សម្លាប់​ខ្លួនទៅវិញ និងមានអត្តសញ្ញាណប័ណ្ណរបស់ជនរងគ្រោះចំនួន២សន្លឹកនៅលើគ្រែពូក ទើបរាយការណ៍ប្រាប់​ទៅសមត្ថ​កិច្ច ចុះមកពិនិត្យផ្ទាល់ដល់កន្លែងតែម្តង។

ហេតុការណ៍ខាងលើ ត្រូវបាននគរបាលជំនាញខណ្ឌ ក្រុង ចុះធ្វើការពិនិត្យកោសល្យវិច័យ ដោយជនរងគ្រោះ ចងនឹងកន្សែង​ពោះគោ ពណ៌ក្រហម។ ក្រោយពិនិត្យរួចសាកសពត្រូវបាននគរបាល ដឹកយកទៅតំកល់ទុកនៅវត្តអង្គតាម៉ិញ ភូមិគោកចំបក់ សង្កាត់ចោមចៅ ដើម្បីបន្តស្រាវជ្រាវ រកមើលហេតុ និងស្រាវជ្រាវរកសាច់ញាតិ មកទទួលយកទៅធ្វើបុណ្យតាមប្រពៃណី ៕

ប្រភព៖ Fresh News

ដោយឡែករំលឹកព័ត៌មានមួយផ្សេងទៀត៖ កូនទមិឡ! វាយម្តាយក្មេកឡើងទ្រោមខ្លួន ព្រោះខឹងស្រឡាញ់ចៅមិនស្មើគ្នា តែខ្លួនឯងស្រវឹងឡប់ឡែជោគខ្លួនរាល់ថ្ងៃ

(ភ្នំពេញ)៖ ក្នុងអាការៈញញីញញ័រភិតភ័យ ស្ត្រីចំណាស់ម្នាក់ បានរត់ទៅប្ដឹងនគរបាលសង្កាត់ភ្នំពេញថ្មី ទាំងព្រឹក ក្រោយត្រូវកូនប្រសាប្រុស វាយដំច្រំធាក់យ៉ាងដំណំ បណ្តាលឲ្យរបួសជាទម្ងន់ ទាំងកណ្តាលអាធ្រាត្រឈានចូលថ្ងៃទី១៥ ខែមីនា ឆ្នាំ២០១៧ នៅភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ។

ស្ត្រីរងគ្រោះខាងលើមានឈ្មោះ នៅ ស៊ីថន អាយុ៦៥ឆ្នាំ ស្នាក់នៅកន្លែងហិង្សាខាងលើ ចំណែកកូនប្រសារប្រុស ដែលគាត់មកប្តឹងនោះ មានឈ្មោះ លី ម៉េងជី អាយុ៣០ឆ្នាំ ស្នាក់នៅជាមួយគ្នា។

តាមសំដីរបស់ស្ត្រីរងគ្រោះ បានប្រាប់សមត្ថកិច្ចថា កន្លងមកកូនប្រសាចិត្តតិរច្ឆានរូបនេះ តែងតែអុកឡុក និងប្រើអំពើហិង្សាជាញឹកញាប់មកហើយ ដោយចោទប្រកាន់គាត់ថា ស្រឡាញ់ចៅមិនស្មើគ្នា ប៉ុន្តែដោយអាណិតដល់កូន ទើបគាត់មិនដាច់ចិត្តប្តឹងសមត្ថកិច្ច។

លុះដល់យប់កើតហេតុ ខណៈដែលគាត់កំពុងអង្គុយមើលទូរទស្សន៍ ស្រាប់តែកូនប្រសារូបនេះ មិនដឹងមកពីផឹកស៊ីនៅកន្លែងណា ពេលចូលដល់ក្នុងផ្ទះ ក៏ស្រែកឡូឡាដាក់ប្រពន្ធ ហើយបានទៅលើកចំនៀងផ្ទះ គប់មកលើគាត់ ដែលកំពុងអង្គុយនោះ ធ្លាក់លើជើងខាងស្តាំរបស់ម្ដាយជរា ត្រូវកំភួនដៃស្តាំ និងពកក្បាល រងរបួសទ្រោមខ្លួនតែម្តង ភ្លាមៗនោះ គាត់បានរត់ចេញពីផ្ទះ ដើម្បីគេចមួយគ្រាសិន។

រហូតដល់ព្រឹកថ្ងៃទី១៥ ខែមីនា ឆ្នាំ២០១៧នេះ គាត់ក៏សម្រេចចិត្តទៅប្តឹងកូនប្រសាខាងលើតែម្ដង ពីបទប្រើអំពើហិង្សាមកលើគាត់ជាម្តាយក្មេកដើម្បីតាមចាប់ខ្លួន៕