ខេត្តបន្ទាយមានជ័យ ៖ មានការភ្ញាក់ផ្អើលមួយ ចំពោះកូនតុងទីនជាច្រើននាក់ បន្ទាប់ពីទៅដល់តូបមេតុងទីនស្រាប់តែមានអ្នកថ្មីលក់ ហើយសាកសួរអ្នកជិតខាងថាបាត់មួយរយៈហើយ។
ហេតុការណ៍ភ្ញាក់ផ្អើលខាងលើ បានកើតឡើងនៅរសៀល ថ្ងៃទី២៧ កុម្ភៈ ២០១៧ នៅចំណុចផ្សារត្រី ស្ថិតក្នុងភូមិបាលិលេយ្យ១ សង្កាត់និងក្រុងប៉ោយប៉ែត។ នៅកន្លែងកើតហេតុកូនតុងទីនមិនច្រើនទេ ប៉ុន្តែពេលសួរនាំពួកគាត់និយាយថា ចំនួនកូនតុងទីនមាន១៣៩នាក់ ខ្លះលេង៥ក្បាល ខ្លះលេង៣ឬ២ក្បាល ដែលសរុបទឹកប្រាក់ប្រមូលក្នុងមួយថ្ងៃៗ មិនតិចជាង១ម៉ឺនដុល្លាអាមេរិកឡើយ។
ក្រុមកូនតុងទីននិយាយថា មេតុងទីននោះប្តីឈ្មោះ ជា ប្រពន្ធឈ្មោះ ឡេង ជាអាជីវករលក់គ្រឿងក្រអូបនៅផ្សារត្រី ក្នុងភូមិកើតហេតុខាងលើ ហើយមានតូបរហូត៣។ ពាក់ព័ន្ធបញ្ហានេះក្រុមកូនតុងទីនភាគច្រើន មិនហ៊ានធ្វើបទសម្ភាសទេ តែស្ត្រីអាជីវករលក់អង្ករក្នុងផ្សារត្រីឈ្មោះ អាង ឈុន អាយុ៤៤ឆ្នាំ និយាយថា សម្រាប់គ្រួសារគាត់លេងតុងទីន៥ក្បាលអស់ប្រាក់១៥ម៉ឺនបាត និងស្ត្រីម្នាក់ទៀត ជាម្ចាស់ហាងកាហ្វេក្នុងផ្សារត្រីនោះដែរមិនប្រាប់អត្តសញ្ញាណបាននិយាយថា គ្រួសារគាត់លេង៥ក្បាលដែរ អស់ប្រាក់រហូត៣០ម៉ឺនបាត។
ក្រុមអាជីវករនិយាយថា មេតុងទីនរូបនេះ ទំនងជារៀបគម្រោង រត់យូរហើយព្រោះ តូបទាំងអស់បានសេងទៅឲ្យអ្នកថ្មីគ្មាននរណាដឹងទេ លុះឃើញអ្នកថ្មីមកលក់ ហើយពេលសួរនាំម្ចាស់ថ្មីប្រាប់ថា សេងពីមេតុងទីនខាងលើ ទើបដឹងថា មេតុងទីនរត់ក៏នាំគ្នាភ្ញាក់ផ្អើលតែម្តង។ មុននេះបន្តិចដោយមានសេចក្តីរាយការណ៍ ដល់សមត្ថកិច្ចលោកវរសេនីយ៍ទោ ធិន ស៊ិនដេត អធិការនគរបាលក្រុងប៉ោយប៉ែត បានបញ្ជាកម្លាំងទៅជួបជាមួយកូនតុងទីន និងណែនាំឲ្យទៅដាក់ពាក្យបណ្តឹង ចៀសវាងកើតមានអំពើហិង្សា៕
ប្រភព៖ កោះសន្តិភាព
ដោយឡែក ព័ត៌មានចាប់អារម្មណ៍មួយផ្សេងទៀត៖
អាសូរណាស់! ស្រ្តីម្នាក់សម្រាលកូនដំបូង នៅកណ្តាលវាលស្រែក្នុងខេត្តស្ទឹងត្រែង
(ស្ទឹងត្រែង)៖ អាសូណាស់! កូនទី១ ឈឺពោះសម្រាលក្រោមកម្តៅថ្ងៃ កណ្តាលវាលស្រែ ឆ្ងាយពីភូមិ ជិតមួយគីឡូម៉ែត្រ និង ឃា្លតឆ្ងាយពីមណ្ឌលសុខភាព ស្រែក្រសាំង រាប់គីឡូម៉ែត្រនៅថ្ងៃទី២៧ ខែកុម្ភៈ ឆ្នាំ២០១៧ ស្ថិតក្នុងភូមិដំរីផុង ឃុំកោះសម្ពាយ ស្រុកសៀមបូក ខេត្តស្ទឹងត្រែង។ ទាំងនេះគឺជាការរៀបរាប់របស់អ្នកភូមិ សំដៅដល់ស្រ្តីម្នាក់ឈ្មោះ ថេង ធារី អាយុ២៦ឆ្នាំ ស្រុកកំណើត នៅភូមិច្រវ៉ា ឃុំគោលាប់ ស្រុកចិត្របូរី ខេត្តក្រចេះ និងទើបមករស់នៅធ្វើស្រែចំការ នៅភូមិដំរីផុងឃុំកោះសម្ពាយស្រុកសៀមបូក បានមួយឆ្នាំប៉ុណ្ណោះ។
តែយ៉ាងណាក៏ដោយ ដោយសារតែមានបុណ្យជួយ បច្ចុប្បន្នទាំងទារក និងម្តាយកំពុងសម្រាកថែទាំសុខភាព នៅមណ្ឌលសុខភាព ស្រែក្រសាំងស្រុកសៀមបូក ដោយរួចផុតពីគ្រោះថ្នាក់ហើយ ដោយសារតែបានប្រជាពលរដ្ឋបានជួយទាន់។
ស្ត្រីសម្រាលកូនខាងលើនេះ បានរៀបរាប់ថា នាងពុំដឹងខ្លួនឈឺពោះរៀបនឹងសម្រាលកូននោះទេ តែស្រាប់កើតឡើងភ្លាមៗ នៅថ្ងៃទី២៧ ខែកុម្ភៈនេះ ទាំងពុំដឹងខ្លួនបែបហ្នឹង។ នាងបន្តថា នេះជាចំណងដៃកូនទីមួយក្រោយរៀបការជាមួយប្តីបានជាងមួយឆ្នាំកន្លងទៅ។
បុរសជាប្តីក៏បានរៀបរាប់ដែរថា ខ្លួនមិនដឹងប្រពន្ធត្រូវជួបប្រទះរឿងបែបនេះសោះ ហើយវាជាអនុស្សាវរីយ៍មួយ ដែលមិនអាចបំភ្លេចបាន ក្រោយកូនប្រុសត្រូវសម្រាលនៅកណ្តាលវាលស្រែ ដ៏ជូរចត់បែបនេះ ហើយខ្លួនក៏មានការរំភើបដែលបានធ្វើជាឪពុកក្នុងប្រវត្តិជូរចត់របស់កូនគ្រានេះដែរ។
បុរសរូបនេះបន្តថា ទន្ទឹមនឹងប្រពន្ធផ្តើមឈឺពោះ ខ្លួនមានការបារម្ភណ៍ពីបញ្ហាប្រឈមទីមួយ គ្មានពេទ្យឆ្មប និងទីពីរ មណ្ឌលសុខភាពនៅឆ្ងាយរាប់គីឡូម៉ែត្រ និងជាការធ្វេសប្រហែសមួយ ដែលមិនបានទៅពិនិត្យផ្ទៃពោះ ទទួលការណែនាំនៅមន្ទីរពេទ្យ ឬមណ្ឌលសុខភាពដើម្បីត្រៀមលក្ខណៈជាមុន។
តាមការឲ្យដឹងពីប្អូនស្រីស្រ្តីខាងលើ នៅថ្ងៃទី២៧ ខែកុម្ភៈ រូបនាងរួមបងប្អូន ប្រុស ស្រី៤នាក់ រួមទាំងបងស្រីមាន ផ្ទៃពោះផងនោះទៅចូលបុណ្យលើកធាតុយាយនៅភូមិចម្ងាយពីខ្ទមស្រែ ជិតមួយគីឡូម៉ែត្រលុះដើបានជាង១០០ម៉ែត្រ គាត់ប្រាប់ថា ឈឺចង្កេះដោយពុំនឹកស្មានថា ឈឺពោះសម្រាលកូននោះទេ បន្ទាប់មកក៏ស្រាប់ឈឺពោះកាន់តែខ្លាំង និងដើរមិនរួចទើបសម្រាលនៅកណ្តាលស្រែតែម្តង។
នារីដដែលបន្តថា គ្រាកំពុងឈឺពោះជាការដៃដន្យបំផុត មានអ្នកគ្រូពេទ្យឆ្មបម្នាក់ឆ្លងកាត់ ជួយពិនិត្យ និងជូនដំណឹងទៅ ប្រធាន មណ្ឌលសុខភាពស្រែក្រសាំងឲ្យបញ្ជូនអ្នកគ្រូពេទ្យឆ្មបជំនាញពីរនាក់ រួមទាំងសភារៈមកជួយបន្ថែមទាន់ពេល ចំណែកប្តីរបស់គាត់ប្រឹងកាប់ដើមឬស្សីចងអង្រឹង សែងទៅបណ្តើរតែការឈឺពោះនោះលឿនពេកសម្រាលភ្លាមៗ នៅកណ្តាលស្រែនោះតែម្តង បន្ទាប់មកក្រុមគអ្នកគ្រូពេទ្យឆ្មបមកដល់ជួយសម្អាតសុកចេញ និងបញ្ជូនតាមម៉ូតូបន្តទៅទទួលការថែទាំនៅមណ្ឌលសុខភាពភ្លាមៗដែរ។
លោក ឯម ប៊ុនសុំ ប្រធានមណ្ឌលសុខភាពភូមិស្រែក្រសាំង ឃុំស្រែក្រសាំងស្រុកសៀមបូក បានបញ្ជាក់ថា សុខភាពម្តាយ និងទារកមានសុខភាពល្អធម្មតា ហើយវាជារឿងមួយដែលកម្រសម្រាប់ស្ត្រីមានផ្ទៃពោះជួបប្រទះ ការសម្រាលកូនដោយខ្លួនឯង ដោយមិនដឹងខ្លួនបែបនេះ។
លោក ឯម ប៊ុនសុំ បានបន្ថែមថា ទាក់ទិនការសម្រាលកូនបែបនេះ មានការប្រឈមគ្រោះថ្នាក់ខ្លាំងណាស់ ប្រសិនលើកក្រោយសម្រាល មិនបានយកសុកចេញឈាម នឹងចាប់ផ្តើមធ្លាក់ដែលអាចកើតមានគ្រោះថ្នាក់គ្រប់ពេលលើសុខភាពម្តាយ។
លោកបានបញ្ជាក់បន្ថែមថា ខាងមណ្ឌលសុខភាពបានចុះផ្សព្វផ្សាយអប់រំដល់មូលដ្ឋានជាប្រចាំ តែមានប្រជាពលរដ្ឋ ខ្លះគាត់ចូលរួមនិងខ្លះទៀតគាត់មិនបានចូលរួមស្តាប់ការផ្សព្វផ្សាយ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
