(ស្ទឹងត្រែង)៖ អាសូណាស់! កូនទី១ ឈឺពោះសម្រាលក្រោមកម្តៅថ្ងៃ កណ្តាលវាលស្រែ ឆ្ងាយពីភូមិ ជិតមួយគីឡូម៉ែត្រ និង ឃា្លតឆ្ងាយពីមណ្ឌលសុខភាព ស្រែក្រសាំង រាប់គីឡូម៉ែត្រនៅថ្ងៃទី២៧ ខែកុម្ភៈ ឆ្នាំ២០១៧ ស្ថិតក្នុងភូមិដំរីផុង ឃុំកោះសម្ពាយ ស្រុកសៀមបូក ខេត្តស្ទឹងត្រែង។ ទាំងនេះគឺជាការរៀបរាប់របស់អ្នកភូមិ សំដៅដល់ស្រ្តីម្នាក់ឈ្មោះ ថេង ធារី អាយុ២៦ឆ្នាំ ស្រុកកំណើត នៅភូមិច្រវ៉ា ឃុំគោលាប់ ស្រុកចិត្របូរី ខេត្តក្រចេះ និងទើបមករស់នៅធ្វើស្រែចំការ នៅភូមិដំរីផុងឃុំកោះសម្ពាយស្រុកសៀមបូក បានមួយឆ្នាំប៉ុណ្ណោះ។
តែយ៉ាងណាក៏ដោយ ដោយសារតែមានបុណ្យជួយ បច្ចុប្បន្នទាំងទារក និងម្តាយកំពុងសម្រាកថែទាំសុខភាព នៅមណ្ឌលសុខភាព ស្រែក្រសាំងស្រុកសៀមបូក ដោយរួចផុតពីគ្រោះថ្នាក់ហើយ ដោយសារតែបានប្រជាពលរដ្ឋបានជួយទាន់។
ស្ត្រីសម្រាលកូនខាងលើនេះ បានរៀបរាប់ថា នាងពុំដឹងខ្លួនឈឺពោះរៀបនឹងសម្រាលកូននោះទេ តែស្រាប់កើតឡើងភ្លាមៗ នៅថ្ងៃទី២៧ ខែកុម្ភៈនេះ ទាំងពុំដឹងខ្លួនបែបហ្នឹង។ នាងបន្តថា នេះជាចំណងដៃកូនទីមួយក្រោយរៀបការជាមួយប្តីបានជាងមួយឆ្នាំកន្លងទៅ។
បុរសជាប្តីក៏បានរៀបរាប់ដែរថា ខ្លួនមិនដឹងប្រពន្ធត្រូវជួបប្រទះរឿងបែបនេះសោះ ហើយវាជាអនុស្សាវរីយ៍មួយ ដែលមិនអាចបំភ្លេចបាន ក្រោយកូនប្រុសត្រូវសម្រាលនៅកណ្តាលវាលស្រែ ដ៏ជូរចត់បែបនេះ ហើយខ្លួនក៏មានការរំភើបដែលបានធ្វើជាឪពុកក្នុងប្រវត្តិជូរចត់របស់កូនគ្រានេះដែរ។
បុរសរូបនេះបន្តថា ទន្ទឹមនឹងប្រពន្ធផ្តើមឈឺពោះ ខ្លួនមានការបារម្ភណ៍ពីបញ្ហាប្រឈមទីមួយ គ្មានពេទ្យឆ្មប និងទីពីរ មណ្ឌលសុខភាពនៅឆ្ងាយរាប់គីឡូម៉ែត្រ និងជាការធ្វេសប្រហែសមួយ ដែលមិនបានទៅពិនិត្យផ្ទៃពោះ ទទួលការណែនាំនៅមន្ទីរពេទ្យ ឬមណ្ឌលសុខភាពដើម្បីត្រៀមលក្ខណៈជាមុន។
តាមការឲ្យដឹងពីប្អូនស្រីស្រ្តីខាងលើ នៅថ្ងៃទី២៧ ខែកុម្ភៈ រូបនាងរួមបងប្អូន ប្រុស ស្រី៤នាក់ រួមទាំងបងស្រីមាន ផ្ទៃពោះផងនោះទៅចូលបុណ្យលើកធាតុយាយនៅភូមិចម្ងាយពីខ្ទមស្រែ ជិតមួយគីឡូម៉ែត្រលុះដើបានជាង១០០ម៉ែត្រ គាត់ប្រាប់ថា ឈឺចង្កេះដោយពុំនឹកស្មានថា ឈឺពោះសម្រាលកូននោះទេ បន្ទាប់មកក៏ស្រាប់ឈឺពោះកាន់តែខ្លាំង និងដើរមិនរួចទើបសម្រាលនៅកណ្តាលស្រែតែម្តង។
នារីដដែលបន្តថា គ្រាកំពុងឈឺពោះជាការដៃដន្យបំផុត មានអ្នកគ្រូពេទ្យឆ្មបម្នាក់ឆ្លងកាត់ ជួយពិនិត្យ និងជូនដំណឹងទៅ ប្រធាន មណ្ឌលសុខភាពស្រែក្រសាំងឲ្យបញ្ជូនអ្នកគ្រូពេទ្យឆ្មបជំនាញពីរនាក់ រួមទាំងសភារៈមកជួយបន្ថែមទាន់ពេល ចំណែកប្តីរបស់គាត់ប្រឹងកាប់ដើមឬស្សីចងអង្រឹង សែងទៅបណ្តើរតែការឈឺពោះនោះលឿនពេកសម្រាលភ្លាមៗ នៅកណ្តាលស្រែនោះតែម្តង បន្ទាប់មកក្រុមគអ្នកគ្រូពេទ្យឆ្មបមកដល់ជួយសម្អាតសុកចេញ និងបញ្ជូនតាមម៉ូតូបន្តទៅទទួលការថែទាំនៅមណ្ឌលសុខភាពភ្លាមៗដែរ។
លោក ឯម ប៊ុនសុំ ប្រធានមណ្ឌលសុខភាពភូមិស្រែក្រសាំង ឃុំស្រែក្រសាំងស្រុកសៀមបូក បានបញ្ជាក់ថា សុខភាពម្តាយ និងទារកមានសុខភាពល្អធម្មតា ហើយវាជារឿងមួយដែលកម្រសម្រាប់ស្ត្រីមានផ្ទៃពោះជួបប្រទះ ការសម្រាលកូនដោយខ្លួនឯង ដោយមិនដឹងខ្លួនបែបនេះ។
លោក ឯម ប៊ុនសុំ បានបន្ថែមថា ទាក់ទិនការសម្រាលកូនបែបនេះ មានការប្រឈមគ្រោះថ្នាក់ខ្លាំងណាស់ ប្រសិនលើកក្រោយសម្រាល មិនបានយកសុកចេញឈាម នឹងចាប់ផ្តើមធ្លាក់ដែលអាចកើតមានគ្រោះថ្នាក់គ្រប់ពេលលើសុខភាពម្តាយ។
លោកបានបញ្ជាក់បន្ថែមថា ខាងមណ្ឌលសុខភាពបានចុះផ្សព្វផ្សាយអប់រំដល់មូលដ្ឋានជាប្រចាំ តែមានប្រជាពលរដ្ឋ ខ្លះគាត់ចូលរួមនិងខ្លះទៀតគាត់មិនបានចូលរួមស្តាប់ការផ្សព្វផ្សាយ៕
ប្រភព៖ fresh news
ដោយឡែកពត៌មានគួរឲ្យចាប់អារម្មណ៍មួយទៀត៖
ត្រីងៀតឆ្លៀតពង ! ដឹកស្រីស្នេហ៍ដើរលេង មានអីប្រពន្ធតាមទាន់
រាជធានីភ្នំពេញ ៖ បុរសម្នាក់ឆ្លៀតពេលថ្ងៃអាទិត្យទំនេរ បានកុហកប្រពន្ធរបស់គាត់ថា ទៅជួសជុលម៉ាស៊ីនទឹកកកឲ្យគេនៅចំណុចមុខអាកាសយានដ្ឋានអន្តរជាតិភ្នំពេញ ខណៈនោះន្រពន្ធមិនបានថាអ្វីនោះឡើយ គឺបានជឿជាក់ទៅលើលោកប្ដីទាំងស្រុង លុះក្រោយពេលបើករថយន្តចាកចេញផុតពីផ្ទះ បុរសខាងលើបានទៅដឹកស្រីស្នេហ៍ទៅដើរលេងកម្សាន្តនៅឯខេត្តកំពតយ៉ាងរំភើយ។ ប៉ុន្តែអ្វីដែលជាការសប្បាយក្លាយទៅជាទុក្ខនោះគឺ នៅក្នុងពេលកំពុងដឹកស្រីស្នេហ៍ សាសងយ៉ាងផ្អែមល្ហែមនៅក្នុងរថយន្ត ស្រាប់តែត្រូវបានសាច់ញាតិខាងប្រពន្ធប្រទះឃើញក៏បានលួចថតរូបទុកជាភស្តុតាង ព្រមទាំងបានខលប្រាប់ប្រពន្ធឲ្យដឹង។
មិនតែប៉ុណ្ណោះ ថែមទាំងបានបាញ់រូបថត របស់គាត់ និងស្រីស្នេហ៍កំពុងស្ថិតនៅជាមួយគ្នានោះទៅឲ្យប្រពន្ធរបស់គាត់ទៀតផង បន្ទាប់មកស្ត្រីជាប្រពន្ធបាននាំកូនប្រុសស្រីរបស់ខ្លួន ជិះរថយន្ត១គ្រឿងទៅតាម ហើយនៅពេលប្រទះឃើញច្បាស់នឹងភ្នែកទើបនាំគ្នាតាម និងឃាត់បាន ហើយបង្កឲ្យមានការភ្ញាក់ផ្អើលឡើង កាលពីវេលាម៉ោង៩និង៤០នាទីយប់ ថ្ងៃទី២៦ ខែកុម្ភៈ ឆ្នាំ២០១៧ នៅតាមមហាវិថីសហព័ន្ធរុស្ស៊ី ត្រង់ចំណុចមុខប៉ុស្តិ៍នគរបាលកាកាប ស្ថិតនៅក្នុងភូមិតាងួន សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។
នគរបាលបានឲ្យដឹងថា បុរសជាប្តីនោះឈ្មោះ វ៉េង ឈឿន អាយុ៥៩ឆ្នាំ មុខជាងជួសជួលម៉ាស៊ីនផលិតទឹកកក ចំណែកស្ត្រីជាប្រពន្ធដើមឈ្មោះ ប៊ុត ចាន់ធឿន អាយុ៥៥ឆ្នាំ មុខរបរនៅផ្ទះ ស្នាក់នៅក្នុងភូមិ១៦ សង្កាត់ស្រះចក ខណ្ឌដូនពេញ រាជធានីភ្នំពេញ។ ដោយឡែកស្រីស្នហ៍បណ្ដូលចិត្តដែលប្ដីគាត់ដឹកដើលេង នោះ ឈ្មោះ ម៉ម ផល្លី អាយុ៣៤ឆ្នាំ មុខរបរជាងកាត់ដេរ ស្នាក់នៅភូមិទួលសង្កែ សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ។
ក្រោយពេលតាមទាន់បុរសជាប្ដី កំពុងស្ថិតនៅក្នុងរថយន្តជាមួយនឹងស្រីស្នេហ៍ បែបនេះបានធ្វើឲ្យស្ត្រីជាប្រពន្ធដើម មានកំហឹងខ្លាំងណាស់ស្ទើរតែគាំងបេះដូងស្លាប់ ហើយបានឃាត់រថយន្ត របស់ប្ដី រួចបាននាំចូលមកកាន់ប៉ុស្ដិ៍កាកាប ហើយបានជជែកគ្នាយ៉ាងតឹងសសៃករៀងៗខ្លួន។ មិនតែប៉ុណ្ណោះ គាត់ក៏បានជេរនាងជាស្រីស្នេហ៍របស់ប្ដី យ៉ាងចាស់ដៃថែមទៀតផង។ ប៉ុន្តែដោយមានការសម្របសម្រួល ពីកងកម្លាំងនគរបាលប៉ុស្ដិ៍ ទើបមានការស្ងប់ស្ងាត់ទៅវិញ ដោយរង់ចាំដោះស្រាយគ្នានៅសាលាស្រះចក ខណ្ឌដូនពេញវិញ ហើយបុរសជាប្ដីបានដឹកស្រីស្នេហ៍ចាកចេញទៅបាត់ ឯប្រពន្ធនិងកូនបានជិះរថយន្តចាកចេញទៅតាមក្រោយបាត់ដែរ។
ស្ត្រីជាប្រពន្ធបានប្រាប់ឲ្យនគរបាលដឹងថា គាត់មិននឹកស្មានថា លោកប្ដីរបស់គាត់ចំណាស់នឹងទៅហើយ មានកលល្បិចច្រើន ហ៊ានផិតក្បត់រូបគាត់ទៅលួចលាក់មានស្រីថ្មីទាល់តែសោះ កន្លងមកគាត់ខំតែទុកចិត្តប្ដីខ្លាំងណាស់ មិនដែលមានការសង្ស័យថាប្ដីក្បត់ចិត្តនោះឡើយ ដោយឡែកនៅវេលាព្រឹកថ្ងៃទី២៦ ខែកុម្ភៈ ឆ្នាំ២០១៧ ប្ដីបានប្រាប់គាត់ថា ទៅជួសជួលម៉ាស៊ីនទឹកកកឲ្យគេ នៅមុខអាកាសយានដ្ឋានអន្តរជាតិភ្នំពេញ ។ ខណៈនោះក៏បានបើករថយន្ត១គ្រឿង ម៉ាកឡង់គ្រីស័រពណ៌ទឹកប្រាក់ ពាក់ស្លាកលេខកំពង់ចាម 2A-2907 ចាកចេញពីផ្ទះបាត់ ពេលនោះគាត់មិនបានតាមប្ដីទេ ព្រោះស្មានថាប្ដីទៅជួសជុលម៉ាស៊ីនផលិតទឹកកកឲ្យគេមែន។
ប៉ុន្តែអ្វីដែលគាត់មានការភ្ញាក់ផ្អើល និងហួសចិត្តនោះ គឺនៅវេលាម៉ោងប្រមាណជាង៣រសៀលថ្ងៃដដែល ស្រាប់តែទូរស័ព្ទបានរោទិ៍ឡើងយ៉ាងរន្ថើន ហើយគាត់បានយមកមើល ឃើញលេខដែលខលចូលមក នោះជាលេខទូរស័ព្ទសាច់ញាតិរបស់គាត់ ហើយគាត់ក៏បានស្រវាលើកនិយាយភ្លាមៗដែរ។ ស្ត្រីខាងលើបានបន្តទៀតថា ខណៈនោះគាត់ស្ទើរតែជ្រុះទូរស័ព្ទពីដៃ និងស្ទើរតែគាំងបេះដូងដួលសន្លប់ទៅហើយ ព្រោះសាច់ញាតិរបស់គាត់បានប្រាប់ថា បានឃើញប្តីរបស់គាត់កំពុងស្ថិតនៅជាមួយស្រីស្នេហ៍ នៅក្នុងខេត្តកំពត ពេលនោះគាត់បានខំសម្រួលអារម្មណ៍មិនឲ្យតានតឹងពេកទេ និងបានឲ្យសាច់ញាតិលួចថតរូបផ្ញើឲ្យគាត់មើល។
ក្រោយពេលបានឃើញរូបប្ដី និងស្រីស្នេហ៍ច្បាស់នឹងភ្នែកទើបគាត់ជឿជាក់ទាំងស្រុង ហើយបានឲ្យសាច់ញាតិគាត់ តាមដានឃ្លាំមើលរហូតប្តីរបស់គាត់ឡើងជិះរថយន្ត ត្រលប់មកភ្នំពេញវិញ។ ទើបគាត់ជាប្រពន្ធ បានចេញទៅតាមក្រែងជួបតាមផ្លូវ ហើយចៃដន្យក៏បានជួបនៅម្តុំផ្សារថ្នល់ទទឹង ស្ថិតនៅតាមផ្លូវជាតិ៤ ភូមិដំណាក់អំពិល ឃុំដំណាក់អំពិល ស្រុកអង្គស្នួល ខេត្តកណ្ដាល។ក្នុងខណៈកំពុងបើករថយន្តបញ្ច្រាសទិសគ្នា ភ្លាមៗនោះរូបគាត់ និងកូនៗបានបត់រថយន្តត្រលប់ក្រោយវិញ ហើយបានតាមពីក្រោយប្តីគាត់រហូតដល់មុខប៉ុស្តិ៍នគរបាលកាកាប ស្ថិតនៅក្នុងភូមិតាងួន សង្កាត់កាកាប ខណ្ឌពោធិ៍សែនជ័យ លើកំណាត់មហាវិថីសហព័ន្ធរុស្ស៊ី ទើបឃាត់ឲ្យឈប់បង្កឲ្យមានការភ្ញាក់ផ្អើលឡើងតែម្ដង បន្ទាប់មកក៏បាននាំគ្នាចូលទៅជជែកគ្នានៅក្នុងប៉ុស្តិ៍នោះ។
នគរបាលបានឲ្យដឹងថា ក្រោយពេលបានជួបមុខគ្នា ភាគីទាំងសងខាង គីប្ដី និងប្រពន្ធបានជជែកគ្នាយ៉ាង តឹងសសៃក និងបានឈ្លោះប្រកែកគ្នាបែកផ្សែងពេញប៉ុស្តិ៍តែម្ដង ហើយស្ត្រីជាប្រពន្ធដើម បានជេរនាងដែលជាស្ត្រីស្នេហ៍ប្ដីនោះយ៉ាងចាស់ដៃ ហើយនាងម្នាក់នោះក៏បាន តបតវិញខ្លះៗដែរ។ ដោយសារតែខ្លាចមាន អំពើហិង្សាកើតឡើង ទើបនគរបាលប៉ុស្ដិ៍កាកាប បានធ្វើការសម្របសម្រួលឲ្យអ្នកទាំងអស់គ្នានោះ នាំគ្នាស្ងប់ស្ងាត់ និងទៅដោះស្រាយគ្នានៅសាលាស្រះចក ខណ្ឌដូនពេញវិញ ព្រោះពួកគាត់រស់នៅទីនោះ ទើបពេលនោះមានការស្ងប់ស្ងាត់ ហើយស្ត្រីជាប្រពន្ធបាននិយាយថា គាត់នឹងលែងលះគ្នាជាមួយប្ដីនោះមិនយក ទៀតទេ ចំណែកបុរសជាប្ដីបានសុំឲ្យប្រពន្ធដើមគាត់ទៅផ្ទះវិញសិនទៅ។ បន្ទាប់មកបុរសនោះ និងស្រីស្នេហ៍ បានជិះរថយន្តទៅបាត់ ចំណែកស្ត្រីជាប្រពន្ធដើមបានជិះរថយន្តទៅតាមក្រោយដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]