រាជធានីភ្នំពេញ ៖ បុរសម្នាក់ឆ្លៀតពេលថ្ងៃអាទិត្យទំនេរ បានកុហកប្រពន្ធរបស់គាត់ថា ទៅជួសជុលម៉ាស៊ីនទឹកកកឲ្យគេនៅចំណុចមុខអាកាសយានដ្ឋានអន្តរជាតិភ្នំពេញ ខណៈនោះន្រពន្ធមិនបានថាអ្វីនោះឡើយ គឺបានជឿជាក់ទៅលើលោកប្ដីទាំងស្រុង លុះក្រោយពេលបើករថយន្តចាកចេញផុតពីផ្ទះ បុរសខាងលើបានទៅដឹកស្រីស្នេហ៍ទៅដើរលេងកម្សាន្តនៅឯខេត្តកំពតយ៉ាងរំភើយ។ ប៉ុន្តែអ្វីដែលជាការសប្បាយក្លាយទៅជាទុក្ខនោះគឺ នៅក្នុងពេលកំពុងដឹកស្រីស្នេហ៍ សាសងយ៉ាងផ្អែមល្ហែមនៅក្នុងរថយន្ត ស្រាប់តែត្រូវបានសាច់ញាតិខាងប្រពន្ធប្រទះឃើញក៏បានលួចថតរូបទុកជាភស្តុតាង ព្រមទាំងបានខលប្រាប់ប្រពន្ធឲ្យដឹង។
មិនតែប៉ុណ្ណោះ ថែមទាំងបានបាញ់រូបថត របស់គាត់ និងស្រីស្នេហ៍កំពុងស្ថិតនៅជាមួយគ្នានោះទៅឲ្យប្រពន្ធរបស់គាត់ទៀតផង បន្ទាប់មកស្ត្រីជាប្រពន្ធបាននាំកូនប្រុសស្រីរបស់ខ្លួន ជិះរថយន្ត១គ្រឿងទៅតាម ហើយនៅពេលប្រទះឃើញច្បាស់នឹងភ្នែកទើបនាំគ្នាតាម និងឃាត់បាន ហើយបង្កឲ្យមានការភ្ញាក់ផ្អើលឡើង កាលពីវេលាម៉ោង៩និង៤០នាទីយប់ ថ្ងៃទី២៦ ខែកុម្ភៈ ឆ្នាំ២០១៧ នៅតាមមហាវិថីសហព័ន្ធរុស្ស៊ី ត្រង់ចំណុចមុខប៉ុស្តិ៍នគរបាលកាកាប ស្ថិតនៅក្នុងភូមិតាងួន សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។
នគរបាលបានឲ្យដឹងថា បុរសជាប្តីនោះឈ្មោះ វ៉េង ឈឿន អាយុ៥៩ឆ្នាំ មុខជាងជួសជួលម៉ាស៊ីនផលិតទឹកកក ចំណែកស្ត្រីជាប្រពន្ធដើមឈ្មោះ ប៊ុត ចាន់ធឿន អាយុ៥៥ឆ្នាំ មុខរបរនៅផ្ទះ ស្នាក់នៅក្នុងភូមិ១៦ សង្កាត់ស្រះចក ខណ្ឌដូនពេញ រាជធានីភ្នំពេញ។ ដោយឡែកស្រីស្នហ៍បណ្ដូលចិត្តដែលប្ដីគាត់ដឹកដើលេង នោះ ឈ្មោះ ម៉ម ផល្លី អាយុ៣៤ឆ្នាំ មុខរបរជាងកាត់ដេរ ស្នាក់នៅភូមិទួលសង្កែ សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ។
ក្រោយពេលតាមទាន់បុរសជាប្ដី កំពុងស្ថិតនៅក្នុងរថយន្តជាមួយនឹងស្រីស្នេហ៍ បែបនេះបានធ្វើឲ្យស្ត្រីជាប្រពន្ធដើម មានកំហឹងខ្លាំងណាស់ស្ទើរតែគាំងបេះដូងស្លាប់ ហើយបានឃាត់រថយន្ត របស់ប្ដី រួចបាននាំចូលមកកាន់ប៉ុស្ដិ៍កាកាប ហើយបានជជែកគ្នាយ៉ាងតឹងសសៃករៀងៗខ្លួន។ មិនតែប៉ុណ្ណោះ គាត់ក៏បានជេរនាងជាស្រីស្នេហ៍របស់ប្ដី យ៉ាងចាស់ដៃថែមទៀតផង។ ប៉ុន្តែដោយមានការសម្របសម្រួល ពីកងកម្លាំងនគរបាលប៉ុស្ដិ៍ ទើបមានការស្ងប់ស្ងាត់ទៅវិញ ដោយរង់ចាំដោះស្រាយគ្នានៅសាលាស្រះចក ខណ្ឌដូនពេញវិញ ហើយបុរសជាប្ដីបានដឹកស្រីស្នេហ៍ចាកចេញទៅបាត់ ឯប្រពន្ធនិងកូនបានជិះរថយន្តចាកចេញទៅតាមក្រោយបាត់ដែរ។
ស្ត្រីជាប្រពន្ធបានប្រាប់ឲ្យនគរបាលដឹងថា គាត់មិននឹកស្មានថា លោកប្ដីរបស់គាត់ចំណាស់នឹងទៅហើយ មានកលល្បិចច្រើន ហ៊ានផិតក្បត់រូបគាត់ទៅលួចលាក់មានស្រីថ្មីទាល់តែសោះ កន្លងមកគាត់ខំតែទុកចិត្តប្ដីខ្លាំងណាស់ មិនដែលមានការសង្ស័យថាប្ដីក្បត់ចិត្តនោះឡើយ ដោយឡែកនៅវេលាព្រឹកថ្ងៃទី២៦ ខែកុម្ភៈ ឆ្នាំ២០១៧ ប្ដីបានប្រាប់គាត់ថា ទៅជួសជួលម៉ាស៊ីនទឹកកកឲ្យគេ នៅមុខអាកាសយានដ្ឋានអន្តរជាតិភ្នំពេញ ។ ខណៈនោះក៏បានបើករថយន្ត១គ្រឿង ម៉ាកឡង់គ្រីស័រពណ៌ទឹកប្រាក់ ពាក់ស្លាកលេខកំពង់ចាម 2A-2907 ចាកចេញពីផ្ទះបាត់ ពេលនោះគាត់មិនបានតាមប្ដីទេ ព្រោះស្មានថាប្ដីទៅជួសជុលម៉ាស៊ីនផលិតទឹកកកឲ្យគេមែន។
ប៉ុន្តែអ្វីដែលគាត់មានការភ្ញាក់ផ្អើល និងហួសចិត្តនោះ គឺនៅវេលាម៉ោងប្រមាណជាង៣រសៀលថ្ងៃដដែល ស្រាប់តែទូរស័ព្ទបានរោទិ៍ឡើងយ៉ាងរន្ថើន ហើយគាត់បានយមកមើល ឃើញលេខដែលខលចូលមក នោះជាលេខទូរស័ព្ទសាច់ញាតិរបស់គាត់ ហើយគាត់ក៏បានស្រវាលើកនិយាយភ្លាមៗដែរ។ ស្ត្រីខាងលើបានបន្តទៀតថា ខណៈនោះគាត់ស្ទើរតែជ្រុះទូរស័ព្ទពីដៃ និងស្ទើរតែគាំងបេះដូងដួលសន្លប់ទៅហើយ ព្រោះសាច់ញាតិរបស់គាត់បានប្រាប់ថា បានឃើញប្តីរបស់គាត់កំពុងស្ថិតនៅជាមួយស្រីស្នេហ៍ នៅក្នុងខេត្តកំពត ពេលនោះគាត់បានខំសម្រួលអារម្មណ៍មិនឲ្យតានតឹងពេកទេ និងបានឲ្យសាច់ញាតិលួចថតរូបផ្ញើឲ្យគាត់មើល។
ក្រោយពេលបានឃើញរូបប្ដី និងស្រីស្នេហ៍ច្បាស់នឹងភ្នែកទើបគាត់ជឿជាក់ទាំងស្រុង ហើយបានឲ្យសាច់ញាតិគាត់ តាមដានឃ្លាំមើលរហូតប្តីរបស់គាត់ឡើងជិះរថយន្ត ត្រលប់មកភ្នំពេញវិញ។ ទើបគាត់ជាប្រពន្ធ បានចេញទៅតាមក្រែងជួបតាមផ្លូវ ហើយចៃដន្យក៏បានជួបនៅម្តុំផ្សារថ្នល់ទទឹង ស្ថិតនៅតាមផ្លូវជាតិ៤ ភូមិដំណាក់អំពិល ឃុំដំណាក់អំពិល ស្រុកអង្គស្នួល ខេត្តកណ្ដាល។ក្នុងខណៈកំពុងបើករថយន្តបញ្ច្រាសទិសគ្នា ភ្លាមៗនោះរូបគាត់ និងកូនៗបានបត់រថយន្តត្រលប់ក្រោយវិញ ហើយបានតាមពីក្រោយប្តីគាត់រហូតដល់មុខប៉ុស្តិ៍នគរបាលកាកាប ស្ថិតនៅក្នុងភូមិតាងួន សង្កាត់កាកាប ខណ្ឌពោធិ៍សែនជ័យ លើកំណាត់មហាវិថីសហព័ន្ធរុស្ស៊ី ទើបឃាត់ឲ្យឈប់បង្កឲ្យមានការភ្ញាក់ផ្អើលឡើងតែម្ដង បន្ទាប់មកក៏បាននាំគ្នាចូលទៅជជែកគ្នានៅក្នុងប៉ុស្តិ៍នោះ។
នគរបាលបានឲ្យដឹងថា ក្រោយពេលបានជួបមុខគ្នា ភាគីទាំងសងខាង គីប្ដី និងប្រពន្ធបានជជែកគ្នាយ៉ាង តឹងសសៃក និងបានឈ្លោះប្រកែកគ្នាបែកផ្សែងពេញប៉ុស្តិ៍តែម្ដង ហើយស្ត្រីជាប្រពន្ធដើម បានជេរនាងដែលជាស្ត្រីស្នេហ៍ប្ដីនោះយ៉ាងចាស់ដៃ ហើយនាងម្នាក់នោះក៏បាន តបតវិញខ្លះៗដែរ។ ដោយសារតែខ្លាចមាន អំពើហិង្សាកើតឡើង ទើបនគរបាលប៉ុស្ដិ៍កាកាប បានធ្វើការសម្របសម្រួលឲ្យអ្នកទាំងអស់គ្នានោះ នាំគ្នាស្ងប់ស្ងាត់ និងទៅដោះស្រាយគ្នានៅសាលាស្រះចក ខណ្ឌដូនពេញវិញ ព្រោះពួកគាត់រស់នៅទីនោះ ទើបពេលនោះមានការស្ងប់ស្ងាត់ ហើយស្ត្រីជាប្រពន្ធបាននិយាយថា គាត់នឹងលែងលះគ្នាជាមួយប្ដីនោះមិនយក ទៀតទេ ចំណែកបុរសជាប្ដីបានសុំឲ្យប្រពន្ធដើមគាត់ទៅផ្ទះវិញសិនទៅ។ បន្ទាប់មកបុរសនោះ និងស្រីស្នេហ៍ បានជិះរថយន្តទៅបាត់ ចំណែកស្ត្រីជាប្រពន្ធដើមបានជិះរថយន្តទៅតាមក្រោយដែរ៕
ប្រភព៖ កោះសន្តិភាព
ដោយឡែកពត៌មានគួរឲ្យចាប់អារម្មណ៍មួយទៀត៖
សន្តិសុខនៅផែស្ងួត «ត្រេនស្តារ»ម្នាក់ ត្រូវគេប្រទះឃើញ ដេកស្លាប់នៅក្នុងការដ្ឋាន
(ភ្នំពេញ)៖ បុរសជាសន្តិសុខនៅផែស្ងួត «ត្រេនស្តារ» ម្នាក់ត្រូវបានគេប្រទះឃើញដេកស្លាប់នៅក្នុងការដ្ឋាន ពេលកំពុងយាមកាម បង្កឲ្យមានការភ្ញាក់ផ្អើលនៅព្រឹកថ្ងៃទី២៧ ខែកុម្ភៈ ឆ្នាំ២០១៧នេះ ចំណុចក្នុងផែស្ងួតកុងទឺន័រ «ត្រេនស្តារ» ភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ។
សមត្ថកិច្ចបានឲ្យដឹងថា សពជនរងគ្រោឈ្មោះ ហ៊ឺ វុធ អាយុ៤៥ឆ្នាំ មានមុខរបរជាសន្តិសុខ នៅក្នុងផែស្ងួតខាងលើ ហើយសព្វថ្ងៃ ស្នាក់នៅផ្ទះជួល ភូមិព្រៃស្វាយ សង្កាត់ចោមចៅ ខណ្ឌពោធិ៍សែនជ័យ និងមានស្រុកកំណើតនៅ ភូមិព្រៃថ្នឹង ស្រុកស៊ីធរកណ្ដា ខេត្តព្រៃវែង។
សមត្ថកិច្ចបានឲ្យដឹងទៀតថា នៅមុនកើតហេតុជនរងគ្រោះ បានមកធ្វើការដូចសព្វមួយដង រហូតដល់ម៉ោងកើតហេតុខាងលើគាត់បាន ប្រាប់អ្នក ធ្វើការជាមួយគ្នាថា គាត់អត់ស្រួលខ្លួនសោះ នឹងវិលមុខទៀតផង។ បន្ទាប់មក គាត់ក៏បានដួលទៅនឹងដី ឃើញដូចនោះ អ្នកធ្វើការជាមួយគ្នា ក៏បានលើកគាត់ នឹងជួយរឹតប្រេងកាឡាឲ្យគាត់ ដោយឃើញសភាពមិនស្រួល ក៏ដឹកគាត់យកមកពេទ្យឡាំ ប៊ុនថន ពេលមកដល់ពេទ្យ ដោយមិនទាន់បានចូលផង ពេទ្យក៏បានប្រាប់ថា ស្លាប់បាត់ទៅហើយ រួចហើយបងប្អូនក៏បានយកមក តម្កល់នៅវត្តតក្ខបញ្ញោ។
តាមការពិនិត្យជាក់ស្ដែង ពីជំនាញគឺពុំមានពាក់ព័ន្ធនឹងឃាដកម្មនោះទេ ដោយមានស្នាមជាំស្លឈាម ស្លាក់ខ្យល់ នៅនឹងខ្លួនហើយក្រុម គ្រួសារក៏ពុំមានប្ដឹងផ្ដល់អ្វីនោះទេ និងសូមយកសពទៅធ្វើបុណ្យនៅស្រុកកំណើតតាមប្រពៃណី៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
