ខេត្តបាត់ដំបង ៖ យុវជន៣នាក់ត្រូវបានសមត្ថកិច្ចចាប់ខ្លួនជាបន្តបន្ទាប់រួចកសាងសំណុំរឿងបញ្ជូនទៅតុលាការកាលពីរសៀលថ្ងៃទី២៤ ខែកុម្ភៈ ឆ្នាំ២០១៧ បន្ទាប់ពីយុវជនទាំង៣នាក់នេះបានព្រួតគ្នាកាប់យុវជនម្នាក់ក្នុងជម្លោះរឿងស្រីញីនៅក្នុងក្លិបកំសាន្ត ។
ជនដៃដល់៣នាក់ដែលត្រូវសមត្ថកិច្ចឃាត់ខ្លួនក្រោយពីកាប់យុវជនម្នាក់បណ្ដាលឲ្យរបួសធ្ងន់ ដោយសារជម្លោះរឿងស្រីញីនៅក្នុងក្លិបកំសាន្ត នឹងត្រូវកម្លាំងនគរបាលក្រុងបាត់ដំបង កសាងសំណុំរឿងបញ្ជូនទៅតុលាការនៅរសៀលថ្ងៃទី២៤កុម្ភ:នេះហើយ នេះបើតាមសេចក្ដីរាយការណ៏របស់សមត្ថកិច្ច។
លោក ប៉ាង ហៀង អធិការក្រុងបាត់ដំបង បានឲ្យដឹងថា យុវជនទាំង៣នាក់នេះ ១-ឈ្មោះ នឿន សូនិក អាយុ២០ឆ្នាំ, ២-ឈ្មោះ ឡាត់ ចាន់រិទ្ធ ហៅ តន្ត្រី អាយុ២២ឆ្នាំ ជន២នាក់នេះនៅភូមិកុះពង់ឆ្លង ឃុំវត្តតាមិម ស្រុកសង្កែ និង៣-ឈ្មោះ ឈូន តុលា អាយុ១៧ឆ្នាំ នៅភូមិរំចេក៤ សង្កាត់រតន: ក្រុងបាត់ដំបង ។
លោកថា ក្រុមនេះបានព្រូតគ្នាវាយ និងកាប់ជនរងគ្រោះឈ្មោះ សរ ពិរស់ អាយុ១៨ឆ្នាំ នៅភូមិដង្កោទាប សង្កាត់ទូលតាឯក នៅខាងមុខក្លិបស្តាឡៃយ៍ ស្ថិតក្នុងភូមិរំចេក៤ សង្កាត់រតន: កាលពីវេលាម៉ោង១ និង១០នាទីរំលងអាធ្រាត្រឈានចូលថ្ងៃទី២២ កុម្ភ: ដោយសារជម្លោះរឿងស្រីញី ប៉ុន្តែក្រោយពីបង្កហិង្សា ក្រុមជនបង្កបានរត់គេចខ្លួន លុះនៅវេលាថ្ងៃត្រង់ ថ្ងៃទី២៣ កុម្ភ: ទើបកម្លាំងសមត្ថកិច្ចរបស់លោកធ្វើការស្រាវជ្រាវឃាត់ខ្លួនបានពួកគេជាបន្តបន្ទាប់នាំយកមកសូរនាំ ។
បើតាមសាក្សីបាននិយាយថា ដំបូងគេឃើញយុវជនតែ២នាក់ទេ ដែលបានឈ្លោះប្រកែកគ្នានៅក្នុងក្លិបកំសាន្ត តែការឈ្លោះឌឺដងដាក់គ្នានៅក្នុងក្លិបនេះមិនបានឈានដល់ការប្រទូស្តរាយគ្នាទេ ។ លុះបន្តិចក្រោយមក ពេលពួកគេចេញក្រៅក្លិបក៏មានការប្រយុទ្ធគ្នាស្លាប់រស់តែម្ដង ។
ប្រភពដដែលបញ្ជាក់ថា គ្រានោះគេឃើញភាគីដៃដល់បានទូរស័ព្ទហៅបក្សពួកបន្ថែមទៀត រហូតដល់៣នាក់ ដោយមានកាំបិតផង បានកាប់ទៅលើជនរងគ្រោះបណ្ដាលឲ្យរងរបួសឈាមស្រោចពេញខ្លួន រួចនាំគ្នាជិះម៉ូតូគេចខ្លួនបាត់អស់មុនពេលសមត្ថកិច្ចចុះទៅដល់ ។
លោក ប៉ាង ហៀង អធិការក្រុងបាត់ដំបង បាននិយាយថា សមត្ថកិច្ចបានស្រាវជ្រាវឃាត់ខ្លូនក្រុមជនដៃដល់បានជាបន្តបន្ទាប់ក្រោយកើតហេតុមួយថ្ងៃ ។ លោកអធិការបានស្រង់ចម្លើយក្រុមជនសង្ស័យថា ពួកខ្លួនពិតជាបានព្រូតគ្នាវាយ និងប្រើកាំបិតកាប់ទៅលើជនរងគ្រោះមែន ដោយសារគំនុំ និងមានជម្លោះនៅក្នុងក្លិប ។ លោក បញ្ជាក់ថា មន្ត្រីជំនាញបានបញ្ចប់ការសួរចម្លើយជនសង្ស័យទាំង៣នាក់នេះហើយ ហើយកំពុងរៀបចំសំណុំរឿងបញ្ជូនទៅតុលាការនៅរសៀលថ្ងៃទី២៤ កុម្ភ:នេះហើយ ដើម្បីចាត់ការតាមនិតិវិធីច្បាប់ ៕
ប្រភព៖ កោះសន្តិភាព
ដោយឡែករំលឹកព័ត៌មានមួយផ្សេងទៀត៖ ឆ្លងចរន្តអគ្គិសនីនៅរោងចក្រ SolaModa ជិតទន្លេបាទី បណ្តាលឲ្យកម្មករ រត់ផ្អើលចេញមកក្រៅ សន្លប់ជាង២០នាក់
(តាកែវ)៖ កម្មករ-កម្មការិនី រោងចក្រកាត់ដេរសម្លៀកបំពាក់យីហោ «SolaModa» ស្ថិតនៅជិតទន្លេបាទី ឃុំពត់សរ ស្រុកបាទី ខេត្តតាកែវ ជាង២០នាក់ បានទន់ដៃទន់ជើង និងខ្លះទៀតដួលសន្លប់ ដោយសារតែពួកគេភ័យនឹងហេតុការណ៍ ឆ្លងចរន្តអគ្គិសនី រហូតឆេះកម្ទេចកម្ទីនៅក្នុងរោងចក្រ បណ្តាលឲ្យមានការភ្ញាក់ផ្អើល ហើយនាំគ្នារត់ចេញមកក្រៅ ឡើងប្រសេចប្រសាច នៅថ្ងៃទី២៤ ខែកុម្ភៈ ឆ្នាំ២០១៧នេះ។
លោក ង៉ាន់ សារី អធិការនគរបាលស្រុកបាទី ខេត្តតាកែវ បានប្រាប់ Fresh News ថា ដំបូងឡើយមានករណីឆ្លងចរន្តអគ្គិសនីបានកើតឡើង រហូតក្លាយជា អគ្គិភ័យឆេះកម្ទេចក្រណាត់ នៅក្បែរអគារកាត់ដេរ បណ្តាលឲ្យក្រុមកម្មករទាំងអស់មានការភ័យខ្លាច នាំគ្នារត់ចេញមកក្រៅ រហូតមានអ្នកសន្លប់តែម្តង ជាង២០នាក់។
បើតាមលោកអធិការ ជនរងគ្រោះជាង២០នាក់នេះ ត្រូវបានសមត្ថកិច្ចរបស់លោក ហៅឡានពេទ្យជួយដឹកយកទៅសង្គ្រោះអស់ហើយ ដោយឡែកករណីអគ្គិភ័យនោះ ក៏ត្រូវខាងរោងចក្រនាំគ្នាបាញ់ពន្លត់រួចហើយដែរ។
លោក ង៉ាន់ សារី បានបញ្ជាក់ថា រោងចក្រកាត់ដេរសម្លៀកបំពាក់មួយនេះមានកម្មករ-កម្មការិនីជាង៦០០នាក់៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
