(ភ្នំពេញ)៖ កម្លាំងនគរបាលខណ្ឌពោធិ៍សែនជ័យ បានបើកប្រតិបត្តិការ និងចេញជួយអន្តរាគមន៍ទប់ស្កាត់ អំពើហិង្សាដោយចេតនា ពីសំណាក់ក្រុមកម្មកររបស់ក្រុមហ៊ុនប្រមូលសំរាម ស៊ិនទ្រី រហូតមានការចាប់ខ្លួនចំនួន១២នាក់ បន្ទាប់ពីពួកគេបានទៅវាយជនរងគ្រោះម្នាក់ ដែលមិនមានកំហុសទាល់តែសោះ ពោលគឺជាការយល់ច្រឡំថា ជនរងគ្រោះជាបក្ខពួករបស់មនុស្សមួយក្រុមទៀត ដែលមានជម្លោះជាមួយពួកគេ។
អំពើហិង្សាដែលបង្កអសន្តិសុខសង្គមខាងលើនេះ បានបង្កឲ្យមានការភ្ញាក់ផ្អើលយ៉ាងខ្លាំង នៅយប់ថ្ងៃទី២១ ខែកុម្ភៈ ឆ្នាំ២០១៧ ស្ថិតនៅចំណុចខាងកើតផ្សារត្រពាំងថ្លឹង តាមបណ្តោយផ្លូវវេងស្រេង ក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។
ជនរងគ្រោះឈ្មោះ សន មិថុនា អាយុ២២ឆ្នាំ មុខរបរកម្មករលើកកាតុងតាមរោងចក្រ ស្នាក់នៅភូមិកើតហេតុខាងលើ មានប្រពន្ធឈ្មោះ ចាន់ ស្រីលិន អាយុ២៩ឆ្នាំ មុខរបរកម្មការិនីរោងចក្រ។
នៅព្រឹកថ្ងៃទី២២ ខែកុម្ភៈ ឆ្នាំ២០១៧នេះ អធិការនគរបាលខណ្ឌពោធិ៍សែនជ័យ លោក យឹម សារ៉ាន់ បានបញ្ជាក់ថា តាមការសួរនាំ គឺមុនដំបូង កម្មករប្រមូលសំរាម បានដើរប្រមូលសំរាមនៅតាមបណ្តោយផ្លូវវេងស្រេង ខណះមកដល់ចំណុចផ្សារត្រពាំងថ្លឹង កំពុងប្រមូលសំរាម ក៏បានប៉ះពាក្យសំដីជាមួយសន្តិសុខ ដែលយាមផ្សារកំពុងអង្គុយផឹកស៊ី។
បន្ទាប់ពីប៉ះពាក្យសម្តីគ្នារួចមក ក៏បង្កហិង្សាដាក់ទៅវិញទៅមក ចំណែកជនរងគ្រោះ នៅអង្គុយរង់ចាំឡានដឹកកាតុងរោងចក្រមកដឹក នៅក្បែរកន្លែងដែរ គេកំពុងឈ្លោះគ្នា។ ជនរងគ្រោះឃើញគេឈ្លោះគ្នាក៏រត់ចេញ ហើយក្រុមកម្មករស៊ិនទ្រីស្មានតែ បក្ខពួកក្រុមខាងសន្តិសុខផ្សារ ក៏នាំគ្នាវាយបណ្តាលបែកចិញ្ចើម និងប៉ោងភ្នែកខាងស្តាំ។
ពេលនោះសមត្ថកិច្ចរបស់លោក កំពុងតែល្បាតបានឃើញពួកកម្មករក្រុមហ៊ុន ស៊ិនទ្រី ក៏រត់គេចខ្លួន ហើយសមត្ថកិច្ចក៏បាននាំជនរងគ្រោះ ទៅមន្ទីរពេទ្យដេរមុខរបួស។ ក្រោយមកទៀត ក្រុមកម្មករ ស៊ិនទ្រី បានហៅបក្ខពួកមក២ឡានទៀត សរុបចំនួន១២នាក់ មកព្រួតគ្នាវាយមកលើជនរងគ្រោះជាលើកទី២ ខណះដែលជនរងគ្រោះទើប និងដើរចេញពីមន្ទីរពេទ្យដេររបួសទើបរួច ក៏ផ្អើលដល់សមត្ថកិច្ចកម្លាំងអន្តរាគមន៍ ដែលល្បាតទៅដល់ទាន់ និងបានបង្ក្រាបក្រុមទាំងនោះបានទាំងអស់គ្នា១២នាក់តែម្តង។
ក្រោយពេលកើតហេតុ ជនរងគ្រោះត្រូវបានសាច់ញាតិ ដឹកតាមម៉ូតូទៅសង្គ្រោះនៅមន្ទីរពេទ្យ រីឯជនបង្កទាំង១២នាក់ ត្រូវបានកម្លាំងសមត្ថកិច្ចនាំខ្លួន ទៅកាន់ផ្នែកជំនាញព្រហ្មទណ្ឌខណ្ឌពោធិ៍សែនជ័យ ដើម្បីចាត់ការតាមនិតិវិធីច្បាប់៕
ប្រភព៖ Fresh News
ដោយឡែករំលឹកព័ត៌មានមួយផ្សេងទៀត៖ ម្តេចចេះតែចឹង! នាងក្រមុំឈឺរលាកបំពង់.ក ហៅពេទ្យព្យាបាល ដូចហៅមកសម្លាប់
ខេត្តកណ្តាល ៖ ជារឿងគួរឱ្យសោកស្តាយបំផុត ដែលបានកើតឡើង សាជាថ្មីម្តងទៀត បន្ទាប់នារីក្រមុំម្នាក់ មានជំងឺរលាកបំពង់.ក ហើយត្រូវគ្រូពេទ្យព្យាបាលដោយចាក់ថ្នាំផង ព្យួរសេរ៉ូមផង ហើយលេបថ្នាំទៀត ស្រាប់តែរាងកាយនាងលែងធ្វើចលនា បេះដូងលែដើរ ហើយត្រូវក្រុមគ្រួសារបញ្ជូន ទៅព្យាបាលបន្តនៅមន្ទីរពេទ្យក្នុងរាជធានីភ្នំពេញ តែជាអកុសលនាង បានដាច់ខ្យល់ស្លាប់តាមផ្លូវ ។
ហេតុការណ៍នេះ កើតឡើងកាលពីវេលាម៉ោង០២ និង១០នាទីរសៀលថ្ងៃទី២១ កុម្ភៈ ដែលនារីរងគ្រោះមានឈ្មោះញែម វណ្ណា អាយុ២៦ឆ្នាំ មានទីលំនៅក្នុងភូមិអង្គរជ័យ ឃុំបន្ទាយដែក ស្រុកកៀនស្វាយ ខេត្តកណ្តាល ។ ដោយឡែក គ្រូពេទ្យដែលមកព្យាបាលនោះ មានឈ្មោះស៊ូ ម៉ារី អាយុ៥៧ឆ្នាំ ជាអនុប្រធានមណ្ឌលសុខភាពឃុំបន្ទាយដែក មានទីលំនៅក្នុងភូមិជាមួយគ្នា។
បើតាមម្តាយ នារីរងគ្រោះឱ្យដឹងថា មុនពេលកើតហេតុ កូនស្រីគាត់មានជំងឺរលាកបំពង់.ក និងក្តៅខ្លួនបន្តិចបន្តួច ហើយគាត់បានហៅអ្នកគ្រូពេទ្យខាងលើ ឱ្យមកពិនិត្យកូននៅឯផ្ទះ ។ ពេលគ្រូពេទ្យមកដល់ ក៏រៀបចំចាក់ថ្នាំ និងបន្តោងសេរ៉ូម ហើយឱ្យលេបថ្នាំទៀត ។
លុះដល់វេលាកើតហេតុ កូនស្រីគាត់មានសភាពកាន់តែធ្ងន់ គឺបេះដូងលែងដើរ និងធ្វើលែងមានចលនាអ្វីទាំងអស់ ឃើញដូច្នោះ គាត់បានរៀបចំបញ្ជូនបន្តទៅរាជធានីភ្នំពេញ តែកូនគាត់បានដាច់ខ្យល់ ស្លាប់បាត់ទៅហើយ ។
ប្រភពឱ្យដឹងទៀតថា នៅវេលាម៉ោង០៧ និង០៥នាទីយប់ថ្ងៃដដែល ក្រុមគ្រួសារនារីរងគ្រោះ ក៏បានទៅដាក់ពាក្យបណ្តឹង នៅប៉ុស្តិ៍រដ្ឋបាលបន្ទាយដែក ដើម្បីឱ្យនាំខ្លួនអ្នកគ្រូពេទ្យខាងលើមកធ្វើការសាកសួរ ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
