ខេត្តកណ្តាល ៖ ជារឿងគួរឱ្យសោកស្តាយបំផុត ដែលបានកើតឡើង សាជាថ្មីម្តងទៀត បន្ទាប់នារីក្រមុំម្នាក់ មានជំងឺរលាកបំពង់.ក ហើយត្រូវគ្រូពេទ្យព្យាបាលដោយចាក់ថ្នាំផង ព្យួរសេរ៉ូមផង ហើយលេបថ្នាំទៀត ស្រាប់តែរាងកាយនាងលែងធ្វើចលនា បេះដូងលែដើរ ហើយត្រូវក្រុមគ្រួសារបញ្ជូន ទៅព្យាបាលបន្តនៅមន្ទីរពេទ្យក្នុងរាជធានីភ្នំពេញ តែជាអកុសលនាង បានដាច់ខ្យល់ស្លាប់តាមផ្លូវ ។
ហេតុការណ៍នេះ កើតឡើងកាលពីវេលាម៉ោង០២ និង១០នាទីរសៀលថ្ងៃទី២១ កុម្ភៈ ដែលនារីរងគ្រោះមានឈ្មោះញែម វណ្ណា អាយុ២៦ឆ្នាំ មានទីលំនៅក្នុងភូមិអង្គរជ័យ ឃុំបន្ទាយដែក ស្រុកកៀនស្វាយ ខេត្តកណ្តាល ។ ដោយឡែក គ្រូពេទ្យដែលមកព្យាបាលនោះ មានឈ្មោះស៊ូ ម៉ារី អាយុ៥៧ឆ្នាំ ជាអនុប្រធានមណ្ឌលសុខភាពឃុំបន្ទាយដែក មានទីលំនៅក្នុងភូមិជាមួយគ្នា។
បើតាមម្តាយ នារីរងគ្រោះឱ្យដឹងថា មុនពេលកើតហេតុ កូនស្រីគាត់មានជំងឺរលាកបំពង់.ក និងក្តៅខ្លួនបន្តិចបន្តួច ហើយគាត់បានហៅអ្នកគ្រូពេទ្យខាងលើ ឱ្យមកពិនិត្យកូននៅឯផ្ទះ ។ ពេលគ្រូពេទ្យមកដល់ ក៏រៀបចំចាក់ថ្នាំ និងបន្តោងសេរ៉ូម ហើយឱ្យលេបថ្នាំទៀត ។
លុះដល់វេលាកើតហេតុ កូនស្រីគាត់មានសភាពកាន់តែធ្ងន់ គឺបេះដូងលែងដើរ និងធ្វើលែងមានចលនាអ្វីទាំងអស់ ឃើញដូច្នោះ គាត់បានរៀបចំបញ្ជូនបន្តទៅរាជធានីភ្នំពេញ តែកូនគាត់បានដាច់ខ្យល់ ស្លាប់បាត់ទៅហើយ ។
ប្រភពឱ្យដឹងទៀតថា នៅវេលាម៉ោង០៧ និង០៥នាទីយប់ថ្ងៃដដែល ក្រុមគ្រួសារនារីរងគ្រោះ ក៏បានទៅដាក់ពាក្យបណ្តឹង នៅប៉ុស្តិ៍រដ្ឋបាលបន្ទាយដែក ដើម្បីឱ្យនាំខ្លួនអ្នកគ្រូពេទ្យខាងលើមកធ្វើការសាកសួរ ។
ប្រភព៖ កោះសន្តិភាព
កំណត់ហេតុខ្មែរឡូត៖
គួររំលឹកព័ត៌មានចាស់ដែរថា៖ មិនគួរ! ឈឺផ្តាសាយត្រូវពេទ្យចាក់២ម្ជុល ប្រកាច់ស្លាប់
ខេត្តស្វាយរៀង ៖ បុរសម្នាក់មានជំងឺផ្តាសាយ ក៏ជិះម៉ូតូទៅឱ្យគ្រូពេទ្យពិនិត្យនិងព្យាបាល ក៏ត្រូវគ្រូពេទ្យចាក់ថ្នាំអស់ ២ម្ជុល ស្រាប់តែប្រកាច់ត្រដ.ខ្យល់ស្លាប់ភ្លាមៗ បង្កការភ្ញាក់ផ្អើលយ៉ាងខ្លាំង ហើយលោកគ្រូពេទ្យរូបនោះ បានដាក់មេប្រូចបាត់ ។
ហេតុការណ៍ចាក់ថ្នាំស្លាប់នេះ គឺកើតឡើងកាលពីវេលាម៉ោង០៦ និង៤០នាទីល្ងាចថ្ងៃទី១៩ កុម្ភៈ ស្ថិតនៅភូមិបឹងវែង ឃុំស្វាយជ្រំ ស្រុកស្វាយជ្រំ ។
បើតាមស្ត្រីឈ្មោះផាង សារ៉ាន អាយុ៥០ឆ្នាំ ជាប្រពន្ធបានឱ្យដឹងថា ប្តីគាត់ដែលស្លាប់ឈ្មោះព្រាប សុវណ្ណ អាយុ៤៤ឆ្នាំ ជាអ្នកបើករថយន្តដឹកកម្មករ ។ នៅមុនពេលកើតហេតុ ប្តីគាត់មានជំងឺផ្តាសាយ មួយអាទិត្យមកហើយ ប៉ុន្តែនៅតែបើកបររថយន្តដឹកកម្មកររាល់ថ្ងៃបាន ។ លុះនៅថ្ងៃកើតហេតុ វេលាម៉ោងប្រមាណជា០៦ និង២០នាទីល្ងាចដដែល ប្តីគាត់បានប្រាប់កូនថា ឪមិនស្រួលខ្លួនទេ ឪទៅផ្ទះពេទ្យឲ្យគេពិនិត្យរកថ្នាំលេប ហើយចាំមកវិញ ចាំស្លម្ហូប ។
ជនរងគ្រោះជិះម៉ូតូ ទៅផ្ទះពេទ្យឈ្មោះសុខ ហ៊ិន ភេទប្រុស អាយុ៧១ឆ្នាំ ជាអតីតពេទ្យចូលនិវត្សនៅភូមិជាមួយគ្នា ចម្ងាយជិត១គីឡូម៉ែត្រ ដើម្បីពិនិត្យព្យាបាល ស្រាប់តែម៉ោងប្រមាណជា៦ និង៤០នាទីល្ងាច កូនប្រុសគ្រូពេទ្យឈ្មោះសុខ កុសល ទូរសព្ទ័ហៅរូបគាត់ជាប្រពន្ធថា បងស្រីជួយទៅមើលបងប្រុសផង មិនដឹងយ៉ាងម៉េចទេ មុខឡើងខ្មៅអស់ហើយ ។
គ្រាន់តែឮភ្លាម កូនៗក៏បានបើករថយន្តទៅមើល តែឪពុកបានស្លាប់បាត់ទៅហើយ ប៉ុន្តែប្រពន្ធកូនមិនអស់ចិត្ត បានលើកជនរងគ្រោះ ដាក់លើរថយន្តដឹកបញ្ជូនទៅមន្ទីរពេទ្យបង្អែក ស្រុកស្វាយជ្រំ ដើម្បីសង្គ្រោះ ក៏ប៉ុន្តែគ្រូពេទ្យប្រាប់ថា ជនរងគ្រោះស្លាប់បាត់ទៅហើយ ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
