(ភ្នំពេញ)៖ ប្រធានក្រុមប្រឹក្សាជំនុំជំរះសាលាដំបូងរាជធានីភ្នំពេញលោក កោ វណ្ឌី នៅថ្ងៃទី២០ ខែកុម្ភៈ ឆ្នាំ២០១៧ បានប្រកាស សាលក្រមផ្ដន្ទាទោស ដាក់ពន្ធនាគារកំណត់៥ឆ្នាំ ពីបទ «ហិង្សាដោយចេតនាមានស្ថានទម្ងន់ទោស ដោយមរណភាព នៃជនរងគ្រោះ តាមមាត្រា២២៤ នៃក្រមព្រហ្មទណ្ឌ» ទៅលើបុរសម្នាក់ដែលបានវាយប្រពន្ធរបស់ខ្លួនរហូតស្លាប់។
សូមបញ្ជាក់ថា ជនជាប់ចោទ ទុន កែវ អាយុ៤៤ឆ្នាំ ជាកម្មករសំណង់ស្នាក់នៅផ្ទុះលេខ៤៦៣ សង្កាត់ទួលសង្កែ ខណ្ឌឬស្សីកែវ បានវាយសម្លាប់ប្រពន្ធរបស់ខ្លួនឈ្មោះ ភាព អាយុ២៧ឆ្នាំ កាលពីថ្ងៃទី២៣ ខែសីហា ឆ្នាំ២០១៦។
យោងតាមរបាយការណ៍របស់សមត្ថកិច្ច រៀងរាល់ថ្ងៃ ពេលបញ្ចប់ការងារ ២នាក់ប្តី-ប្រពន្ធនេះ តែងតែផឹកស្រាលេងនៅក្រោមផ្ទះ ហើយតែងមានជម្លោះវាយតប់គ្នា មិនលោះថ្ងៃឡើយ។ ម្យ៉ាងទៀត ប្រពន្ធរបស់គេមានជំងឺបេះដូងទៀតផង។
រហូតដល់ថ្ងៃទី២២ ខែសីហា ឆ្នាំ២០១៦ មានអ្នកធ្វើការសំណង់ជាមួយគ្នា មកលេងស្រាប់តែពួកគេ បានទិញស្រាមកផឹកដូចរាល់ដង គឺផឹកស្មើដៃគ្នាជាមួយប្រពន្ធ។ លុះដល់យប់ជ្រៅ ក៏ចូលដេកលក់នៅលើផ្ទះ ទាំង២នាក់ រហូតដល់ម៉ោង៥ទាបភ្លឺថ្ងៃទី២៣ ខែសីហា ស្រាប់តែប្រពន្ធរបស់គេ ថប់ដង្ហើមហៅឲ្យជួយ ពេលនោះ ខ្លួនគេក៏បានគោះរឹតទ្រូងឲ្យប្រពន្ធ និងហៅអ្នកជិតខាងមកជួយទៀត ប៉ុន្តែប្រពន្ធរបស់គេបានស្លាប់បាត់ទៅហើយ៕
ប្រភព៖ Fresh News
ដោយឡែករំលឹកព័ត៌មានមួយផ្សេងទៀត៖ ខ្ចីប្រាក់គេ40ម៉ឺនរៀល ទៅលួចកាប់ឈើទាលមួយដើមសងវិញ
ខេត្តកំពង់ធំ ៖ សមត្ថកិច្ចឧទ្យានុរក្ស ចល័តអន្តរាគមន បានបង្ក្រាបដោយចាប់ខ្លួនជនម្នាក់ ខណៈកំពុងធ្វើសកម្មភាព លួចអារឈើដ៏ធំមួយដើមនៅក្នុងដែនជម្រកសត្វព្រៃឡង់ ។ ជនសង្ស័យឈ្មោះ ផាត ទិត្យ ភេទប្រុស អាយុ២៥ឆ្នាំ រស់នៅភូមិបាជ័យ ឃុំសណ្តាន់ ស្រុកសណ្តាន់ ។
លោក តុប កក្កដា ប្រធានមន្ទីរបរិស្ថានខេត្តបានប្រាប់កោះសន្តិភាពឲ្យដឹងនៅព្រឹកថ្ងៃទី១៩ កុម្ភៈ ថា ជនសង្ស័យដែលត្រូវបានកម្លាំងឧទ្យានុរក្ស ក្រុមចល័តអន្តរាគមន៏ធ្វើការ ឃាត់ខ្លួនបាន ខណៈកំពុងតែធ្វើសកម្មភាពកាត់ឈើមួយដើមដ៏ធំដែលមានមុខកាត់០,៩០ម៉ែត្រ រួមជាមួយវត្ថុតាងមានម៉ាស៊ីនត្រង់សឺន័រ១គ្រឿង កាលពីវេលាម៉ោង៨និង១៥នាទីយប់ថ្ងៃទី១៨ កុម្ភៈ នៅចំណុចអូរក្បាលរាំស្ថិតក្នុងដែនជម្រកសត្វព្រៃឡង់ ស្រុកសណ្តាន់ ។
នៅចំពោះមុខ សមត្ថកិច្ចជនរូបនេះ បានសារភាពថា ដោយសារតែខ្លួនអត់លុយចាយក៏បានទៅខ្ចីលុយថៅកែម្នាក់ឈ្មោះ ភា រៀ រស់នៅភូមិ-ឃុំជាមួយគ្នាចំនួន៤០ម៉ឺនរៀល ដោយសន្យាថា និងចូលទៅអារឈើក្នុងព្រៃឡង់ដើម្បីទូទាត់កាត់សងលុយដែលបានខ្ចីគាត់ ហើយថៅកែរូបនោះក៏បានប្រគល់ឲ្យនូវរណាយន្ត១គ្រឿង និងប្រេងសាំង១កាន ដែលមានគ្នា២នាក់លួចចូលទៅអារឈើ ។
នៅពេលដែលអារដើមឈើ ទាលធំ១ដើមរលំ កំពុងតែរៀបចំច្រៀក ស្រាប់តែសមត្ថកិច្ចទៅដល់ចាប់ ឃើញដូច្នេះគ្នាគេម្នាក់ ដែលជាអ្នកចាំបោសអាចម៍រណាឈ្មោះ សាន ឃើញទាន់ក៏រត់គេចខ្លួនបាត់ទៅ នៅសល់តែរូបគេត្រូវសមត្ថកិច្ចឃាត់ខ្លួនតែម្តង ។
ពាក់ព័ន្ធ និងករណីខាងលើ លោកប្រធានមន្ទីរបន្តថា ដោយសារតែព្រៃឡង់មានទំហំធំ ផ្លូវចេញចូលក្នុងព្រៃ មានច្រើនរាប់មិនអស់ ចំណែកសមត្ថកិច្ច ជំនាញមានគ្នាតិច ហើយជនសង្ស័យបានប្តូររូបភាព ពីការធ្វើសកម្មភាពលួច ចូលអារឈើពេលថ្ងៃ មកធ្វើនៅពេលយប់វិញ ។ នៅពេលធ្វើសកម្មភាពពួកគេមានអ្នកកាន់វិទ្យុទាក់ទងរង់ចាំមើលផ្លូវ ព្រមទាំងមានអាវុធកែច្នៃដាក់តាមខ្លួនទៀតផង បើសមត្ថកិច្ចយើងខ្វះការប្រុងប្រយ័ត្នច្បាស់ជាគ្រោះថ្នាក់ ។
ក្រុមមន្ត្រីថា ការបង្ក្រាបបានជួបបញ្ហាលំបាកជាខ្លាំង ដូចជាករណីនេះជាដើមទំរាំតែចាប់បានកម្លាំងសមត្ថកិច្ច ត្រូវលូនក្នុងព្រៃ ពេលយប់ងងឹតពីចំងាយ ទំរាំចូលទៅចាប់បាន ។ ក្រុមមន្ត្រីថា ជនសង្ស័យម្នាក់នេះត្រូវបាន កសាងសំណុំរឿងបញ្ជូនទៅកាន់តុលាការដើម្បីចាត់ការតាមផ្លូវច្បាប់ ។
ជុំវិញបញ្ហាខាងលើនេះ ប្រជាពលរដ្ឋក៏បានសំណូមពរ ដល់ស្ថាប័នតុលាការខេត្ត សូមមេត្តាធ្វើការស្រាវជ្រាវ ចាប់ខ្លួនមេខ្លោង ដែលនៅពីក្រោយខ្នងនៃការឲ្យចូលទៅកាប់ទន្ទ្រានក្នុងព្រៃឡង់នេះឲ្យបាន ជាពិសេសថៅកែឈ្មោះ ភា រៀ យកមកធ្វើការផ្តន្ទាទោសចំពោះមុខច្បាប់ ពីព្រោះពួកនេះគឺជាឧក្រិដ្ឋជនបំផ្លាញព្រៃឈើ បើមិនដូច្នោះទេនោះគឺមិនអាចថែរក្សា និងការពារព្រៃដែលនៅសេសសល់ បន្តិចបន្តួចនេះឲ្យបានគង់វង់នោះឡើយ។ គេកំពុងរង់ចាំមើលថា ថៅកែឈ្មោះ ភា រៀ និងមានការចោទប្រកាន់ដែរឬយ៉ាងណានោះទេ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]