ខេត្តបាត់ដំបង ៖ ស្ត្រីម្នាក់ដែលជាម្ចាស់ហាងផឹកស៊ីមួយកន្លែងដែលសង់ជាខ្យូស ត្រូវសមត្ថកិច្ចឃាត់ខ្លួន កាលពីល្ងាចថ្ងៃទី១២ កុម្ភ: នៅក្នុងភូមិអូរដាលើ ឃុំបឹងរាំង ស្រុកកំរៀង ដែលពាក់ព័ន្ធនឹងករណីជួញដូរគ្រឿងញៀននិងរក្សាទុកប្រាក់ដុល្លារក្លែងក្លាយក្នុងគោលបំណងទុច្ចរិតដែលមុខរបរបែបនេះកុំស្មានថាលាក់ជិត។
លោក គឹម ពន្លក អធិការនគរបាលស្រុកកំរៀង បានឲ្យដឹងថា ជនសង្ស័យឈ្មោះ វ៉ែន វួច ភេទស្រី អាយុ៥០ឆ្នាំ រស់នៅក្នុងភូមិដូង ឃុំបឹងរាំង ស្រុកកំរៀង ប៉ុន្តែស្ត្រីរូបនេះមានបើកហាងផឹកស៊ីដែលគ្មានយីហោមួយកន្លែង នៅចំណុចកើតហេតុខាងលើ ។ លោកអធិការបានប្រាប់ថា ស្ត្រីរូបនេះត្រូវកម្លាំងរបស់លោកឃាត់ខ្លួន នៅពេលកំពុងលក់ដូរថ្នាំញៀននៅក្នុងហាងរបស់ខ្លួន បន្ទាប់ពីមន្ត្រីជំនាញតាមដានសកម្មភាពប្រព្រិត្តិបទល្មើសនេះ អស់រយ:ពេលយូរណាស់មកហើយ ក្រោមការបញ្ជាផ្ទាល់ពីលោកស្នងការខេត្ត ។
ជាមួយនឹងការឃាត់ខ្លួនស្ត្រីថៅកែហាង និងជាមេឈ្មួញថ្នាំញៀនដ៏ធំនេះ សមត្ថកិច្ចរឹបអូសបាននូវម្សៅក្រាមពណ៌.ស ដែលគេសង្ស័យថា ជាថ្នាំញៀនប្រភេទមេតំហ្វេតាមីនICE (ម៉ាទឹកកក) ចំនួន៣៥ថង់តូច និង២ថង់ធំ ប្រាក់ដុល្លាក្លែងក្លាយចំនួន២១,៧០០ដុល្លា ប្រាក់ខ្មែរចំនួន១៥៣,០០០រៀល ប្រាក់ថៃចំនួន១៨០បាត និងទូរស័ព្ទដៃ១គ្រឿង ។ ទាក់ទិននឹងការឃាត់ខ្លួនស្ត្រីខាងលើ ព្រមទាំងរឹបអូសបានវត្ថុតាងបទល្មើសជាច្រើន មានទាំងថ្នាំញៀន មានទាំងប្រាក់ដុល្លាក្លែងក្លាយផងនេះ បើតាមមន្ត្រីជំនាញបានឲ្យដឹងថា ជនសង្ស័យឈ្មោះ វ៉ែន វួច បានព្យាយាមឆ្លើយបដិសេធមិនទទូលខុសត្រូវចំពោះវត្ថុតាងទាំងនេះទេ ជាពិសេសថ្នាំញៀន ។
ស្ត្រីរូបនេះបានផ្ដល់ចម្លើយដដែលៗថា ថ្នាំញៀននោះគឺជាបញ្ញើរបស់គេទេ ។ ប៉ុន្តែក្រោយមកទើបស្ត្រីល្បិចច្រើនរូបនេះ ព្រមសារភាពទទួលស្គាល់វត្ថុតាងថា ពិតជារបស់ខ្លួន នៅពេលមន្ត្រីជំនាញសួរជាន់កែងប៉ះចំណុចខ្សោយ ។ ទីបំផុតស្ត្រីថៅកែហាងរូបនេះបានសារភាពថា ថ្នាំញៀន និងប្រាក់ដុល្លាក្លែងក្លាយនោះ ពិតជារបស់ខ្លួនមែន ហើយពេលខ្លួនកំពុងណាត់ជួបម៉ួយ ដើម្បីដោះដូរទំនិញនៅក្នុងហាងរបស់ខ្លួន ក៏ត្រូវសមត្ថកិច្ចក្របួចជាប់តែម្ដងទៅ ។
លោក គឹម ពន្លក អធិការស្រុកកំរៀង បាននិយាយថា ស្ត្រីឈ្មោះ វ៉ែន វួច នេះជាមុខសញ្ញាជួញដូរថ្នាំញៀនដ៏ធំនៅក្នុងស្រុកកំរៀង ដែលកម្លាំងការិយាល័យប្រឆាំងគ្រឿងញៀន នៃស្នងការដ្ឋានខេត្ត ផ្ដល់តម្រុយឲ្យកម្លាំងរបស់ខ្លួនតាមប្រមាញ់រហូតឈានដល់ការបង្ក្រាបបានតែម្ដង ។ លោកអធិការបានបញ្ជាក់ថា ពេលនេះលោកស្នងការខេត្ត បានបញ្ជាឲ្យមន្ត្រីជំនាញសួរនាំ ដើម្បីកសាងសំណុំរឿងបញ្ជូនជនសង្ស័យរូបនេះ និងវត្ថុតាងទៅកាន់តុលាការហើយ ។
លោកស្នងការខេត្ត ថែមទាំងចេញបញ្ជាឲ្យមន្ត្រីជំនាញតាមស្វែងរកមុខសញ្ញាមួយចំនួនទៀត ដែលគេសង្ស័យថា ជាបក្សពួករបស់ស្ត្រីមេខ្លោងជួញដូរគ្រឿងញៀនខាងលើនេះ ៕
ប្រភព៖ កោះសន្តិភាព
ដោយឡែករំលឹកព័ត៌មានមួយផ្សេងទៀត៖ កម្លាំងនគរបាលខេត្តរតនគិរី ចុះបង្ក្រាប និងរឹបអូសឈើប្រណិតជាច្រើនដុំ នៅកណ្តាលក្រុងបានលុង, ឈ្មួញលាក់ទុក ប្រុងនាំចេញទៅវៀតណាម
(រតនគិរី)៖ កម្លាំងនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តរតនគិរី ដឹកនាំដោយលោក ម៉ម វណ្ណដា ព្រះរាជអាជ្ញារងអមសាលាដំបូងខេត្ត នៅព្រឹកថ្ងៃទី១៣ ខែកុម្ភៈ ឆ្នាំ២០១៧ បានចុះបង្ក្រាប និងរឹបអូសឈើប្រណិត ជាច្រើនដុំ ស្ថិតនៅទីតាំងស្តុកឈើមួយកន្លែង ក្នុងភូមិអូរមៀត សង្កាត់ឡាបានសៀក ក្រុងបានលុង ខេត្តរតនគិរី។
នាយការិយាល័យប្រឆាំងបទល្មើសសេដ្ឋកិច្ច លោកវរសេនីយ៍ឯក នូវ ដារ៉ា បានប្រាប់ភ្នាក់ងារ Fresh News ថា បន្ទាប់ពីទទួលព័ត៌មានពីកម្លាំងសម្ងាត់ថា ទីតាំងខាងលើ មានរថយន្តដឹកឈើប្រណិតចូលញឹកញាប់រួចមក លោកបានសុំគោលការណ៍ ពីលោកឧត្តមសេនីយ៍ត្រី ងួន គឿន ស្នងការនគរបាលខេត្ត និងលោកឧត្តសេនីយ៍ត្រី វ៉ាន់ សង្វាត ស្នងការរងទទួលបន្ទុកប្រឆាំងបទល្មើស ព្រមទាំងមានការសម្របសម្រួលតាមច្បាប់ពីលោក ម៉ម វណ្ណដា ព្រះរាជអាជ្ញារងផងនោះ បានចុះរឹបអូសឈើប្រណិតជាក់ស្តែងតែម្តង។
លោកបានបញ្ជាក់ថា ម្ចាស់ទីតាំងនេះឈ្មោះ យ៉ាវ លាងហេង ភេទប្រុស អាយុ៣០ឆ្នាំ ជនជាតិខ្មែរ។ កម្លាំងនគរបាល បានរឹបអូសឈើប្រណិត និងឈើលេខមួ មួយចំនួនធំ រួចហើយនាំយកទៅរក្សាទុកនៅស្នងការដ្ឋាននគរបាលខេត្ត ដើម្បីចាត់ការបន្តទៀត។
លោក ម៉ម វណ្ណដា បានថ្លែងថា «ឈើទាំងនេះ បន្ទាប់ពីធ្វើការវាស់វែងរួច យើងនឹងប្រគល់ជំនាញរដ្ឋបាលព្រៃឈើ ចាត់ការបន្តតាមច្បាប់ស្តីពីព្រៃឈើ»។
បើតាមមន្រ្តីនគរបាល ដែលចូលរួមប្រតិបត្តិការចុះរឹបអូសនេះ ឈើទាំងនេះ ត្រូវបានម្ចាស់ទីតាំងស្តុកទុក ដើម្បីប្រុងនាំទៅកាន់វៀតណាម។ យ៉ាងណាក៏ដោយ ចំនួនឈើនៅមិនទាន់ដឹងនៅឡើយទេ ហើយពេលចុះបង្ក្រាប ក៏មិនមានការឃាត់ខ្លួនម្ចាស់ទីតាំងបានឡើយ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
