(ឧត្តរមានជ័យ)៖ លោក ម៉ែន លី ស្នងការនគរបាលខេត្តឧត្តរមានជ័យ បានឲ្យភ្នាក់ងារ Fresh News ដឹងនៅព្រឹកថ្ងៃទី១២ ខែកុម្ភៈ ឆ្នាំ២០១៧នេះថា ក្រោយពីកម្លាំងសមត្ថកិច្ចជំនាញអនុវត្តតាមបញ្ជារបស់ លោក កូយ កាន់យ៉ា ព្រះរាជអាជ្ញាអមសាលាដំបូងខេត្តឧត្តមានជ័យ នៅម៉ោង ៦៖៣០នាទីល្ងាចម្សិលមិញ កំលាំងអធិការដ្ឋាននគរបាលស្រុកត្រពាំងប្រាសាទ បានធ្វើការឃាត់ខ្លួនជនសង្ស័យចំនួន៤ នាក់ ក្នុងចំណោម ៦នាក់ ដែលបានគំរាមទារប្រាក់ពីជនរងគ្រោះជាឈ្មួញរកស៊ីឈើបានចំនួន ២,៥០០,០០០រៀល ជាថ្នូរនៃការមិនចុះផ្សាយអត្ថបទព័ត៌មាន។
លោកស្នងការបានបន្តថា ជនសង្ស័យ ទី១៖ ឈ្មោះ ស៊ិញ សំឡី ភេទប្រុស អាយុ ៤០ឆ្នាំ ជានិពន្ធនាយកសារព័ត៌មានវិមានឯករាជ្យ មានទីលំនៅបច្ចុប្បន្ន ភូមិគោកឫស្សី ឃុំកែវពណ៌ ស្រុកពួក ខេត្តសៀមរាប, ទី២៖ ឈ្មោះ ស ធុច ភេទប្រុស អាយុ៤១ឆ្នាំ ជាភ្នាក់ងារសារព័ត៌មានកោះពេជ្រ រស់នៅភូមិដូនស ឃុំស្វាយជ្រុំ ស្រុកស្វាយជ្រុំ ខេត្តស្វាយរៀង, ទី៣៖ ឈ្មោះ ប៉ាវទិត ណារ៉ុង ភេទប្រុស អាយុ៣២ឆ្នាំ ជាទាហាន ក២ ជើងគោក កាន់ប័ណ្ណភ្នាក់ងារសារព័ត៌មានខ្មែរម្ចាស់ស្រុក រស់នៅភូមិព្រែកព្រះស្តេច សង្កាត់ស្វាយប៉ោ ក្រុងបាត់ដំបង ខេត្តបាត់ដំបង និងទី៤៖ ឈ្មោះ សឿង សាន ភេទប្រុស អាយុ២៨ឆ្នាំ មុខរបរមិនពិតប្រាកដ រស់នៅភូមិតាំងក្រសាំង ឃុំតាំងក្រសាំង ស្រុកបាធាយ ខេត្តកំពង់ចាម។
លោកស្នងការបន្ថែមថា វត្ថុតាងសមត្ថកិច្ចជំនាញដកហូតបានរួមមានប្រាក់ចំនួន ១,២០០,០០០រៀល ប័ណ្ណសារព័ត៌មានចំនួន ៣សន្លឹក, អត្តសញ្ញាណប័ណ្ណសញ្ជាតិខ្មែរ ៥សន្លឹក ,ទូរស័ព្ទដៃចំនួន ៩គ្រឿង, កាត ATM ចំនួន ៣សន្លឹក, ប័ណ្ណសំគាល់ទោចក្រយានយន្ត ១សន្លឹក និងរថយន្តម៉ាក Camry ពណ៌សំបកឪឡឹក ១គ្រឿង ពាក់ស្លាកលេខ ភ្នំពេញ 2C- 0130 ជាមធ្យោបាយជិះធ្វើសកម្មភាព។
បច្ចុប្បន្នសមត្ថកិច្ចជំនាញកំពុងកសាងសំណុំរឿងជនល្មើសខាងលើ និងវត្ថុតាងទាំងអស់បញ្ជូនទៅកាន់សាលាដំបូង ចាត់ការតាមនីតិវិធី៕
ប្រភព៖ Fresh News
ដោយឡែករំលឹកព័ត៌មានមួយផ្សេងទៀត៖ សមត្ថកិច្ចបង្ក្រាបទីតាំងជួញដូរផ្លូវភេទជ្រកក្រោមស្លាកម៉ាស្សា និងកោសជប់មួយកន្លែង
រាជធានីភ្នំពេញ ៖ កម្លាំងនគរបាល នៃនាយកដ្ឋានប្រឆាំងការជួញដូរមនុស្ស និងការពារអនីតិជន នៃអគ្គនគរបាលជាតិ សហការជាមួយនឹងកម្លាំងនគរបាលខណ្ឌចំការមន បានឆ្មក់ចុះបង្ក្រាបទីតាំងជួញដូរ ផ្លូវភេទជ្រកក្រោមស្លាកម៉ាស្សា និងកោសជប់មួយកន្លែងដែលមានយីហោ (ធ្វើសសៃតាមបែបបុរាណខ្មែរ) ដោយធ្វើការឃាត់ខ្លួនទាំងស្ត្រីម្ចាស់ទីតាំងម្នាក់ និងស្ត្រីប្រកបមុខរបររកស៊ី ផ្លូវភេទសរុបចំនួន៧នាក់ផងដែរ។
ប្រតិបត្តិការបង្ក្រាបនេះដែរបានធ្វើឡើងកាលពីវេលាម៉ោង ៣និង០០នាទីរសៀល ថ្ងៃទី១០ ខែកុម្ភៈ ឆ្នាំ ២០១៧ នៅចំណុចផ្ទះលេខ៤៧៧ DEo ផ្លូវលេខ៥១៤ ក្នុងសង្កាត់ផ្សារដើមថ្កូវ ខណ្ឌចំការមន។
តាមប្រភពព័ត៌មាន ពីមន្ត្រីនគរបាលមូលដ្ឋានម្នាក់ បានប្រាប់ឱ្យដឹងថា ក្រុមស្ត្រីរកស៊ីផ្លូវភេទ និងស្ត្រីជាម្ចាស់ទីតាំង ដែលបានឃាត់ខ្លួនមានទី១-ឈ្មោះ សាង ស្រីស្រស់ អាយុ៣៥ឆ្នាំ (ជាម្ចាស់ទីតាំង)ទី២-ឈ្មោះ ចាន់ រស្មី អាយុ១៧ឆ្នាំ ទី៣-ឈ្មោះ គៀ គន្ធា អាយុ៣៧ឆ្នាំ ទី៤-ឈ្មោះ ដាវ ស្រីទូច អាយុ២០ឆ្នាំ ទី៥-ឈ្មោះ យ៉ែម ស្រី អាយុ២៣ឆ្នាំ ទី៦-ឈ្មោះ អែម ឆាលក្ខណ៍ អាយុ២៣ឆ្នាំ និងទី៧-ឈ្មោះ ចិន ស្រីមុំ អាយុ៣០ឆ្នាំ។
ប្រតិបត្តិការបង្ក្រាបទីតាំង ជួញដូរផ្លូវភេទនៅក្នុង ទីតាំងខាងលើនេះដែរ គឺបានធ្វើឡើងក្រោយពីមានការស្រាវជ្រាវ ពីកម្លាំងជំនាញនៃនាយកដ្ឋាន ប្រឆាំងការជួញដូរមនុស្ស និងការពារអនិតិជន នៃអគ្គនគរបាលជាតិ អស់រយៈពេលជាច្រើនថ្ងៃមកហើយ និងបានដឹងថាមានការបង្កប់ នូវសេវាកម្មបម្រើផ្លូវភេទ ប្រាកដមែននោះទើបឆ្មក់ចុះបង្ក្រាបតែម្តង។
តាមប្រភពដដែល បានប្រាប់បន្តទៀតថា ក្នុងប្រតិបត្តិការនេះដែរកម្លាំងមានសមត្ថកិច្ចបានធ្វើការឃាត់ខ្លួនស្ត្រី ជាម្ចាស់ទីតាំងម្នាក់ និងស្ត្រីបម្រើផ្លូវភេទសរុបចំនួន៧នាក់ និងរកឃើញស្រោម អនាម័យដែលប្រើប្រាស់រួច និងមិនទាន់ប្រើប្រាស់ នៅតាមបន្ទប់ដែលជាវត្ថុតាងមួយចំនួនធំទៀតផងដែរ។
ក្រោយពីការឆ្មក់ចុះ ប្រតិបត្តិការបង្ក្រាបនេះ ទាំងស្ត្រីម្នាក់ជាម្ចាស់ទីតាំង និងស្ត្រីប្រកបរបររកស៊ីផ្លូវភេទទាំង ៧នាក់ រួមទាំងវត្ថុតាងមួយចំនួនធំទៀត ដែលបានដកហូតនោះ បាននាំទៅកាន់នាយកដ្ឋាន ប្រឆាំងការជួញដូរមនុស្ស និងការពារអនីតិជននៃអគ្គនគរបាលជាតិ ដើម្បីចាត់ការទៅតាមផ្លូវ ច្បាប់ជាបន្តទៅទៀត៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
