ខេត្តកំពង់ស្ពឺ ៖ មុខសញ្ញាប្លន់ដែលតែងតែធ្វើសកម្មភាពនាពេលកន្លងមក ពេលនេះអស់លក្ខណ៍ត្រូវបានសមត្ថកិច្ចនគរបាលស្រុកសំរោងទង ឃាត់ខ្លួនបាន ខណៈបក្សពួក២នាក់ទៀត យកម៉ូតូដែលប្លន់បានជិះគេចខ្លួនបាត់។ ក្រោយឃាត់ខ្លួនបានសមត្ថកិច្ចកំពុងកសាងសំណុំរឿងបញ្ជូនទៅកាន់ការិយាល័យព្រហ្មទណ្ឌកំរិតស្រាលចាត់ការបន្ត។
ការឃាត់ខ្លួនក្រុមជនសង្ស័យធ្វើឡើងកាលវេលាម៉ោង1 ថ្ងៃទី11 ខែកុម្ភៈ ឆ្នាំ2017 នៅចំណុចតាមផ្លូវជាតិលេខ4 គីឡូម៉ែត្រលេខ42-43 ស្ថិតនៅភូមិចំបក់ ឃុំវល្លិស ស្រុកសំរោងទង ខេត្តកំពង់ស្ពឺ។
ជនសង្ស័យដែលជាមុខសញ្ញាប្លន់ ១-ឈ្មោះ មុត ផល្លី ភេទប្រុស អាយុ17ឆ្នាំ នៅភូមិរលាំងសង្កែ សង្កាត់សុព័រទេព ក្រុងច្បារមន ខេត្តកំពង់ស្ពឺ ២-ឈ្មោះ សុខ អាទិត្យ ភេទប្រុស អាយុ20ឆ្នាំ នៅភូមិស្នោរទី1 សង្កាត់រកាធំ ក្រុងច្បារមន ខេត្តកំពង់ស្ពឺ។ ជនរងគ្រោះជាម្ចាស់ម៉ូតូឈ្មោះ ម៉ៅ ប៊ុនថា ភេទប្រុស អាយុ19ឆ្នាំ នៅភូមិក្រាំងចចាប ឃុំមហាសាំង ស្រុកភ្នំស្រួច ខេត្តកំពង់ស្ពឺ ។
ប្រភពពីសមត្ថកិច្ចនគរបាលបានឱ្យដឹងថា ក្រុមជនសង្ស័យ រួមទាំងបក្សពួកបានធ្វើសកម្មភាពវាយប្លន់យកម៉ូតូ1គ្រឿង ម៉ាកស៊ូម័រ ពណ៌ខៀវ ស៊េរីឆ្នាំ2015 គ្មានផ្លាកលេខ ជារបស់ជនរងគ្រោះខាងលើ។ ក្រុមជនសង្ស័យបានប្រើល្បិចដោយឱ្យមនុស្សស្រីម្នាក់ទាក់ទងជាមួយជនរងគ្រោះនៅក្នុងក្លឹប ក្រោយមកពេលស្គាល់គ្នាមួយភ្លែតហើយនោះ ក៏បានប្រើល្បិចថា ពឹងឱ្យជូនទៅផ្ទះ ពេលទៅដល់កន្លែងស្ងាត់ដែលជាគោលដៅដែលពួកគេណាត់គ្នាទុកជាមុននោះ បន្ទាប់មកមនុស្សស្រីដែលបក្សពួកគេរបស់ជនសង្ស័យនោះបានប្រាប់ឱ្យជនរងគ្រោះឱ្យឈប់ ស្រាប់តែពេលនោះក្រុមជនដៃដល់ក៏ចេញមកវាយប្លន់យកម៉ូតូពីជនរងគ្រោះតែម្តង។ ក្រោយពីវាយប្លន់បានហើយ ស្រីម្នាក់ដែលបក្សពួករបស់គេដែលប្រើជានុយសម្រាប់ទាក់នោះ ក៏យកម៉ូតូជិះគេចខ្លួនបាត់តែម្តង ។ ក្រោយកើតហេតុសមត្ថកិច្ចបានចុះអន្តរាគមន៍ឃាត់ខ្លួនជនសង្ស័យទាំង២នាក់បានភ្លាមៗផងដែរ។
ប្រភពបន្តថា ក្រោយឃាត់ខ្លួនបានជនសង្ស័យទាំង២នាក់ខាងលើ បានឆ្លើយសារភាពថា ក្រុមខ្លួនមានគ្នា4នាក់ ប្រុស3នាក់ និងស្រីម្នាក់ ១-ឈ្មោះ ណុប ភេទប្រុស អាយុប្រហែល20ជាង នៅម្ដុំភ្នំជាល មិនស្គាល់ភូមិ-ឃុំ បានរត់គេចខ្លួនបាត់ ២-ឈ្មោៈ ម៉ី ភេទស្រី អាយុប្រហែល20ឆ្នាំ មិនស្គាល់ទីលំនៅ ជាអ្នកយកម៉ូតូជនរងគ្រោះជិះគេចខ្លួន។
លោកអនុសេនីយ៍ឯក ម៉ិច សុភាន់ អធិការរងនគរបាលស្រុកសំរោងទង បានឱ្យដឹងថា នៅព្រឹកថ្ងៃទី១២កុម្ភៈ ថា ករណីនេះជំនាញព្រហ្មទណ្ឌកំពុងសហការជាមួយព្រហ្មទណ្ឌកំរិតស្រាលនៃស្នងការដ្ឋាននគរបាលខេត្ត កំពុងធើ្វការស្រាវជ្រាវតាមចាប់បក្សពួកផ្សេងទៀតដែលកំពុងរត់គេចខ្លួនជាបន្តបន្ទាប់ ដោយឡែកជនសង្ស័យដែលឃាត់ខ្លួនបាន កម្លាំងរបស់លោកបានកសាងសំណុំរឿងបញ្ជូនទៅកាន់ការិយាល័យព្រហ្មទណ្ឌកំរិតស្រាល ចាត់ការបន្តតាមនីតិវិធី។
សូមរំលឹកថា ក្រុមជនសង្ស័យ គឺជាមុខសញ្ញាចាស់ដែលតែងតែប្រើល្បិច និងធ្វើសកម្មភាពវាយប្លន់បែបនេះជាច្រើនដងមកហើយ និងស្ថិតក្រោមការតាមដានរបស់សមត្ថកិច្ចជាយូរមកហើយដែរ៕
ប្រភព៖ កោះសន្តិភាព
ដោយឡែករំលឹកព័ត៌មានមួយផ្សេងទៀត៖ ឃាត់ខ្លួនមុខសញ្ញា៤នាក់ ភ្ជង់ប្លន់អាជីវកលក់មាស "សុខ លក្ខិណា" នៅកំពង់ចាម
សៀមរាប ៖ នៅល្ងាចថ្ងៃទី១០ ខែកុម្ភ:ឆ្នាំ២០១៧ កម្លាំងសមត្ថកិច្ច បានឃាត់ខ្លួនមុខ សញ្ញាជនសង្ស័យ ក្រុមចោរប្លន់ចំនួន៤នាក់ និងបក្សពួក ដែលបានធ្វើសកម្មភាពភ្ជង់ប្លន់អាជីវករលក់មាស នៅជាប់ផ្សារធំថ្មី ខេត្តកំពង់ចាម យីហោ "សុខ លក្ខិណា" យកទ្រព្យសម្បិត្ត គិតជាទឹកប្រាក់អស់សរុបជិត២ម៉ឺនដុល្លារ កាលពីវេលាម៉ោង៧:២០នាទីព្រឹក ថ្ងៃទី០៥ ខែកុម្ភៈ ឆ្នាំ២០១៧កន្លងទៅនៅចំណុចខាងលិច ជាប់ផ្សារធំថ្មី ស្ថិចនៅភូមិទី១២ សង្កាត់កំពង់ចាម ក្រុងកំពង់ចាម។
ប្រតិបត្តិការនេះ បានធ្វើឡើងក្រោមកិច្ចសហការយ៉ាងល្អ រវាង កម្លាំងនគរបាលខេត្ត កម្លាំងនគរបាលរាជធានីភ្នំពេញ កម្លាំងនគរបាលនៃស្នងការដ្ឋាន នគរបាលខេត្តសៀមរាប និងកម្លាំងនគរបាលនាយកដ្ឋានក្រសួងមហាផ្ទៃ។
ការឃាត់ខ្លួនជនសង្ស័យធ្វើឡើងនៅទីតាំងផ្សេងគ្នាក្នុងភូមិសាស្ត្រ ក្រុងសៀមរាប កាលពីល្ងាចថ្ងៃទី១០ខែកុម្ភះ ដោយជនសង្ស័យចំនួន២នាក់ត្រូវបានឃាត់ខ្លួននៅចំណុច មុខគ្រុឌ ភូមិថ្នល់ សង្កាត់ស្រង៉ែ បន្ទាប់មកទៀតជនសង្ស័យចំនួន០២នាក់ បន្ថែមទៀតត្រូវបានឃាត់នៅចំណុចស្ពាននាគ ភូមិទ្រាំង សង្កាត់ស្លក្រាម និងជនសង្ស័យម្នាក់ទៀតភេទស្រី ត្រូវបានឃាត់ខ្លួននៅចំណុច ផ្ទះសំណាក់ពុធ្ធារី នៅជិតផ្សារចាស់ ក្រុងសៀមរាប ខេត្តសៀមរាប ។
គួររំលឹកថា តាមរបាយការណ៍ជនរងគ្រោះបាត់បង់សម្ភារៈក្នុងករណីប្លន់ខាងលើរួមមាន ទូរស័ព្ទដៃចំនួន៤គ្រឿង, លុយខ្មែរប្រហែល៤លានរៀល, លុយដុល្លារ ប្រហែល៣ពាន់ដុល្លារ, លុយបាត ប្រហែល១០ម៉ឺនបាត និងគ្រឿងមាស ផ្លាកទីន មានតម្លៃប្រហែល១ម៉ឺនដុល្លារ។ ជនសង្ស័យក្រោយធ្វើការឃាត់ខ្លួន ត្រូវបានបញ្ជូនទៅនាយកដ្ឋានព្រហ្មទណ្ឌ ដើម្បីធ្វើការសាកសួរបន្ថែម៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]