(ភ្នំពេញ)៖ ពិតជារឿងមួយនឹកស្មានមិនដល់ សម្រាប់តារាចម្រៀងជើងថ្មី និងជាម្ចាស់បទ «ទាល់តែយូរទើបស៊ីអូនបាន» កញ្ញា ច័ន្ទ ម៉ាលីស បានទទួលកាដូរ យ៉ាងគាប់ចិត្តក្នុងថ្ងៃខួបកំណើតរបស់នាង គឺគ្រឿងពេជ្រមួយឈុត មានតម្លៃប្រមាណជាង២ម៉ឺនដុល្លារ និងការប្រគល់ជូននូវហាងអាហារ ស្ថិតនៅក្នុងខេត្តព្រៃវែង ដែលមានតម្លៃជាង២០ម៉ឺនដុល្លារ ឲ្យនាងក្លាយជាម្ចាស់កម្មសិទ្ធិគ្រប់គ្រងផ្ទាល់ ខណៈការងារសិល្បៈរបស់នាង ក៏កំពុងមានសន្ទុះ គួរឲ្យកត់សម្គាល់។
ការប្រគល់ជូនកាដូ ដ៏គួរឲ្យភ្ញាក់ផ្អើលនេះ គឺត្រូវបានប្រកាសឡើង ក្នុងថ្ងៃខួបកំណើតគម្រប់អាយុ២២ឆ្នាំ របស់តារាចម្រៀង ច័ន្ទ ម៉ាលីស ដែលមហាជនស្គាល់នាងច្បាស់ តាមរយៈការបកស្រាយបទចម្រៀង មានចំណងជើងថា «ទាល់តែយូរទើបស៊ីអូនបាន» ធ្វើឲ្យទស្សនិកជនប្រតិកម្មយ៉ាងខ្លាំង ចំពោះអត្ថន័យបទចម្រៀង រហូតក្រសួងវប្បធម៌ និងវិចិត្រសិល្បៈ ប្រកាសបិទមិនឲ្យចាក់ផ្សាយ បទចម្រៀងនេះ។
តារាចម្រៀងធ្មេញជំពើស កញ្ញា ច័ន្ទ ម៉ាលីស បានថ្លែងក្នុងទឹកមុខញញឹមញញែមថា បន្ទាប់ពីបទចម្រៀងរបស់នាង ត្រូវបានទទួលប្រតិកម្ម ពីមហាជន រហូតដល់ថ្នាក់ក្រសួងប្រកាសបិទ មិនឲ្យចាក់ផ្សាយមក បានធ្វើឲ្យរូបនាងត្រូវបានគេស្គាល់ច្រើនឡើងៗ ពីមួយថ្ងៃទៅមួយថ្ងៃ ហើយគាប់ជូននាងបានហក់ចូល ក្នុងផលិតកម្ម BN បន្ថែមទៀត ធ្វើឲ្យនាងមានទ្រនំត្រឹមត្រូវក្នុងការចេញបទចម្រៀង Original Song វាយលុកក្នុងទីផ្សារ ពង្រឹងប្រជាប្រិយភាពខ្លាំងឡើងបន្ថែមទៀត។ ជាការពិតទោះបីបទចម្រៀង របស់នាង «ទាល់តែយូរទើបស៊ីអូនបាន» ត្រូវបានគេប្រតិកម្ម ប៉ុន្តែនាងក៏អរគុណ ចំពោះបទនេះ ដែលធ្វើឲ្យគេស្គាល់នាង រហូតមានមហាជនខ្លះ តែងតែសំណូមពរឲ្យនាងច្រៀងបទនេះ ពេលចូលរួមក្នុងកម្មវិធីតូចធំផ្សេងៗ។
ងាកមកចាប់អារម្មណ៍ ក្នុងពិធីខួបកំណើតឯណេះវិញ តារាចម្រៀង កញ្ញា ច័ន្ទ ម៉ាលីស បានឲ្យដឹងថា នាងពិតជាសប្បាយរីករាយរកអ្វី ប្រៀបផ្ទឹមពុំបាន ដែលទទួលបានការលើកទឹកចិត្ត រហូតផ្ដល់ជូនជាកាដូរ មានតម្លៃជាទឹកប្រាក់ដ៏ច្រើនសន្ធឹកសន្ធាប់នេះ ដែលជាកាដូរលើកដំបូងក្នុងជីវិតរបស់នាង។ ក្នុងចំណោមកាដូរដែលនាងទទួលបាននោះ គឺមានខ្សែក ខ្សែដៃ ក្រវិល និងចញ្ចៀនពេជ្រ សរុបមានតម្លៃ១៧៥០០ដុល្លារអាមេរិក និងការប្រគល់ហាងអាហារមួយកន្លែងក្នុងខេត្តព្រៃវែង ឲ្យនាងគ្រប់គ្រងផ្ដាច់មុខ ដែលមានតម្លៃជាង២០ម៉ឺនដុល្លារ ឲ្យនាងក្លាយជាម្ចាស់កម្មសិទ្ធផ្ទាល់តែម្ដង។
អ្វីដែលគួរឲ្យចាប់អារម្មណ៍នោះ គឺអ្នកពិសេសរបស់នាង ពុំមែនគូសង្សារ ឬបុរសជាគូកំណាន់ចិត្តអ្វីនោះទេ ពោលគឺជាឪពុកម្ដាយរបស់នាងផ្ទាល់តែម្ដង ដែលបានផ្ដល់ទំនុកចិត្តដល់រូបនាង និងជូនកាដូរដ៏ច្រើនមហិមានេះ ខណៈការផ្ដល់ជូននេះ គឺពុំបានឲ្យនាងដឹងជាមុននោះទេ។
យ៉ាងណាមិញ ទោះបីចូលដល់ក្នុងវ័យ២២ឆ្នាំទៅហើយក្ដី ពេលសួរដល់អនាគតគូស្រករ ត្រូវបានតារាចម្រៀងរូបនេះ បញ្ជាក់ថា នាងមិនទាន់គិតគូអ្វីទាំងអស់ ព្រោះសំខាន់គឺការងារសិល្បៈ ដែលនាងពេញចិត្តតាំងពីយូរណាស់មកហើយ ទទួលបាននូវភាពជោគជ័យ និងការគាំទ្រឲ្យមានឈ្មោះល្បី ដូចបណ្ដាអ្នកសិល្បៈដទៃជាមុនសិន ចំណែករឿងគូអនាគត នាងមិនទាន់គិតទាន់ចង់បាន នៅពេលនេះទេ៕
ប្រភព៖ Khmertalking
ដោយឡែកព័ត៌មានគួរឲ្យចាប់អារម្មណ៍មួយផ្សេងទៀត៖ នៅ សូនីតា រំលឹកដល់ថ្ងៃគម្រប់ខួប៤ឆ្នាំនៃស្នេហារបស់ខ្លួន តែមិនព្រមបញ្ចេញមុខគូស្នេហ៍ពិតសោះ!
ម្សិលមិញនេះ គឺជាថ្ងៃគម្រប់ខួប៤ឆ្នាំ នៃទំនាក់ទំនងស្នេហារបស់តារាសម្តែងវ័យក្មេងកញ្ញា នៅ សូនីតា និងគូស្នេហ៍នាង។
ប៉ុន្តែនៅក្នុងពិធីរំលឹកខួបចំណងស្នេហ៍៤ឆ្នាំនេះ កញ្ញា នៅ សូនីតា ក៏នៅតែលាក់បាំងមុខមាត់ពិតរបស់គូស្នេហ៍នាងដដែល ដោយមិនបញ្ចេញឱ្យអ្នកគាំទ្របានឃើញឡើយ គឺជាក់ស្តែងនាង បានត្រឹមតែថតរូបម្នាក់ឯង ជាមួយនឹងនំខេកអបអរ នៅថ្ងៃពិសេសនេះតែប៉ុណ្ណោះ ព្រមជាមួយនឹងការផុសប្រយោគប៉ុន្មានឃ្លានៅលើហ្វេសប៊ុកថា៖
«រវល់ហើយ ឆ្លៀតយកមកឲ្យទៀត ស្មានតែភ្លេចហើយ 18 01 2013-18 01 2017 Happy 4years anniversary for us»។
ការលាក់បាំងនេះ បានធ្វើឱ្យមានការងឿងឆ្ងល់យ៉ាងខ្លាំង ពីមហាជនដែលស្រឡាញ់ចូលចិត្ត និងគាំទ្រនាង។ ពួកគេពិតជាចង់ឃើញមុខគូស្នេហ៍ម្នាក់នោះខ្លាំងណាស់ ប៉ុន្តែការទន្ទឹងរង់ចាំនៅតែបន្តទៅមុខទៀតដដែល ព្រោះសូម្បីតែខួបគម្រប់៤ឆ្នាំនៃចំណងស្នេហ៍របស់ខ្លួន ក៏ស្រីស្អាត នៅ សូនីតា នៅតែព្យាយាមលាក់បាំង។
ដូច្នេះមានតែរង់ចាំបន្តទៀតថា តើការពិតនឹងបើកបង្ហាញនៅពេលណា?
គួរឱ្យដឹងដែរថា កញ្ញា នៅ សូនីតា ត្រូវបានគេសង្ស័យថាមានទំនាក់ទំនងស្នេហាជាមួយនឹងកម្លោះសង្ហាម្នាក់ ដែលជាតួសម្តែងជាមួយគ្នានៅក្នុងបទចម្រៀង «ស្រលាញ់គេតែម្នាក់ឯង» របស់លោក ហេង ពិទូ។ ជាពិសេស កាលពីពេលថ្មីៗនេះអ្នកទាំងពីរក៏បានពាក់អាវគូស្នេហ៍បណ្តើរគ្នាទៅមើលកុនផងដែរ។
ប៉ុន្តែរឿងទំនាក់ទំនងស្នេហាយ៉ាងណានោះ កញ្ញា នៅ សូនីតា ក៏មិនទាន់បានបើកបង្ហាញ ជាសាធារណៈនៅឡើយទេ តែយើងក៏អាចដឹងថា មួយគូនេះ Sweet មិនចាញ់គូស្នេហ៍ដទៃទៀតប៉ុន្មាននោះទេ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]