ព្រះសីហនុ៖ ជនសង្ស័យចំនួន៥នាក់ ត្រូវបានកម្លាំងនគរបាលការិយាល័យកណ្តាល ព្រហ្មទណ្ឌ នៃស្នងការដ្ឋាននគរបាលខេត្តព្រះសីហនុ ចាប់ឃាត់ខ្លួន ក្រោយបង្ករឿងកាប់គ្នាយ៉ាងព្រៃផ្សៃ នៅចំណុចវិមានឯករាជ្យ ស្ថិតក្នុងភូមិ៣ សង្កាត់លេខ៣ ក្រុងព្រះសីហនុ បណ្តាលឲ្យមានជនរងគ្រោះម្នាក់រងរបួសកដៃទាំងសងខាង (ជិតដាច់) និងត្រូវក្បាល៣កាំបិត ដែលករណីនេះបានកើតឡើងកាលពីថ្ងៃទី១៥ ខែមករា ឆ្នាំ២០១៧។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានឱ្យដឹងថា ជនរងគ្រោះមានឈ្មោះ មាស គឹមសាន ភេទប្រុស អាយុ២៣ឆ្នាំ មុខរបរជាងចម្លាក់ មានទីលំនៅភូមិ១ សង្កាត់លេខ៣ ក្រុងព្រះសីហនុ។
លោកឧត្តមសេនីយ៍ បានបន្តទៀតថា ដោយមានការស្រាវជ្រាវស៊ើបអង្កេតយ៉ាងម៉ត់ចត់ នៅថ្ងៃទី១៧ ខែមករា ឆ្នាំ២០១៧នេះ កម្លាំងការិយាល័យកណ្តាលព្រហ្មទណ្ឌរបស់លោក សហការជាមួយកម្លាំងនគរបាលមូលដ្ឋាន បានចុះឃាត់ខ្លួនជនសង្ស័យបានចំនួន៥នាក់៖ ១. ឈ្មោះ កុយ ដារ៉ា ភេទប្រុស អាយុ១៧ឆ្នាំ មុខរបរជាងម៉ាស៊ីនត្រជាក់ មានទីលំនៅភូមិ៤ សង្កាត់លេខ៤ ក្រុងព្រះសីហនុ។ ២. ឈ្មោះ អ៊ុង ដារិទ្ធ ភេទប្រុស អាយុ១៧ឆ្នាំ មានទីលំនៅភូមិ២ សង្កាត់លេខ១ ក្រុងព្រះសីហនុ។ ៣. ឈ្មោះ លី ជាសាង ភេទប្រុស អាយុ១៧ឆ្នាំ មានទីលំនៅ ភូមិ១ សង្កាត់លេខ៤ ក្រុងព្រះសីហនុ។ ៤. ឈ្មោះ គឹម វិសាល ភេទប្រុស អាយុ១៦ឆ្នាំ មានទីលំនៅភូមិ១ សង្កាត់លេខ១ ក្រុងព្រះសីហនុ។ ៥. ឈ្មោះ ទេព វាសនា ភេទប្រុស អាយុ១៧ឆ្នាំ មុខរបរបុគ្គលិកកាស៊ីណូហូលីដេរ មានទីលំនៅសង្កាត់១ ក្រុងព្រះសីហនុ។
បើតាមលោកស្នងការ បានបន្តថា វត្ថុតាងដែលដកហូតបាន រួមមាន ម៉ូតូម៉ាកស៊ូស៊ុគីនិច ២គ្រឿង, ម៉ូតូម៉ាកស្កុបពី ១គ្រឿង, ម៉ូតូម៉ាកស៊ូស៊ុគីលែត ១គ្រឿង, ដាវ១ដើម។
ឆ្លងតាមការសួរចម្លើយជនសង្ស័យទាំង៥នាក់ បានសារភាពថា ពួកគេមានជម្លោះជាមួយភាគីខាងរងគ្រោះ តាំងពីថ្ងៃទី១១ ខែមករា ឆ្នាំ២០១៧ មកម្ល៉េះ មូលហេតុដោយសារភាគីរងគ្រោះ បានកាប់មិត្តភក្តិរបស់ពួកគេមុន គឺឈ្មោះ លី ជាសាង នៅចំណុចបុរីគុជអាស៊ី ភូមិ១ សង្កាត់លេខ៣ ក្រុងព្រះសីហនុ ពេលនោះពួកគេមានគ្នា៩នាក់ បាននាំគ្នាដេញកាប់ទៅលើភាគីខាងរងគ្រោះ តែភាគីខាងរងគ្រោះរត់គេចខ្លួនទាន់ ហើយពួកគេបានតែកាប់ម៉ូតូរបស់ភាគីខាងរងគ្រោះតែប៉ុណ្ណោះ។
រហូតដល់ថ្ងៃទី១៥ ខែមករា ឆ្នាំ២០១៧ ពួកគេបានឃើញភាគីខាងរងគ្រោះ នៅវិមានឯករាជ្យ ជិះម៉ូតូ១គ្រឿង ម៉ាកស៊ូយស៊ូគីលែត មានគ្នា៣នាក់ ពេលនោះពួគេមានគ្នា៩នាក់ ដោយមានដាវ២ដើម ខណៈនោះជនសង្ស័យឈ្មោះ កុយ និង ឈ្មោះ ឈិត ស្ទុះទៅកាប់ជនរងគ្រោះតែម្តង។ តែកាប់បានតែម្នាក់ដែលជិះពីក្រោយ ឈ្មោះ មាស គឹមសាន តែប៉ុណ្ណោះ ចំណែកឯអ្នកបើកម៉ូតូ និងអ្នកជិះកណ្តាលរត់គេចខ្លួនទាន់។
ចំពោះជនសង្ស័យដែលនៅសេលសល់ កម្លាំងនគរបាលកំពុងមានវិធានការតាមចាប់ខ្លួនបន្ត រីឯជនសង្ស័យទាំង៥នាក់ ខាងលើ កំពុងកសាងសំណុំរឿង ដើម្បីចាត់ការតាមផ្លូវច្បាប់។
ប្រភព៖ Fresh News
ដោយឡែកពត៌មានគួរឲ្យចាប់អារម្មណ៍មួយផ្សេងទៀត៖
ឧត្តរមានជ័យ៖ មនុស្ស២នាក់រពិសដៃយកយុទ្ធភណ្ឌមិនទាន់ផ្ទុះកែច្នៃជាគ្រាប់បែក ដើម្បីយកទៅបំផ្ទុះបោកយកត្រី ទីបំផុតផ្ទុះដាច់ម្នាក់ រងរបួលស្រាលម្នាក់។ ហេតុការណ៍នេះ កើតឡើងនៅរសៀលថ្ងៃទី១៨ ខែមករា ឆ្នាំ២០១៧ នៅចំណុចស្ទឹងស្រែង ខាងកើតភូមិអាតោ ឃុំចុងកាល់ ស្រុកចុងកាល់ ខេត្តឧត្តរមានជ័យ។
សមត្ថកិច្ចមូលដ្ឋានបានឲ្យដឹងថា ករណីខាងលើនេះ រងរបួសមនុស្សប្រុស២នាក់ ទី១៖ឈ្មោះ ឈួន ផល់ អាយុ៥៥ឆ្នាំ (អតីតយុទ្ធជន) របួសធ្ងន់ដាច់ដៃ
ខាងស្ដាំ និងទី២៖ឈ្មោះ ហ៊ត់ ព្រីង អាយុ២២ ឆ្នាំ (របួសស្រាល) រស់នៅភូមិអាតោ ឃុំចុងកាល់ ស្រុកចុងកាល់ ខេត្ដឧត្ដរមានជ័យ។
ក្រោយពីកើតហេតុសមត្ថកិច្ច បានបញ្ជូនជនរងគ្រោះទាំង២នាក់ ទៅកាន់មន្ទីរពេទ្យបង្អែកស្រុក៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
