ខេត្តកំពត ៖ រាត្រីទឹកឃ្មុំ ក្លាយជារាត្រីទឹកខ្មេះ ព្រោះកូនកម្លោះខានបានផ្សំដំណេកជាមួយកូនក្រមុំដោយសារតែ ត្រូវឪពុករបស់ខ្លួនហៅ ឲ្យត្រឡប់ទៅផ្ទះវិញជាប្រញាប់ បន្ទាប់ពីភ្ញៀវខាងប្រុស និងភ្ញៀវខាងស្រី បានឈ្លោះប្រកែកគ្នា កាលពីវេលាម៉ោង១០ និង៣០នាទីយប់ ថ្ងៃទី១៦ ខែមករា ឆ្នាំ២០១៧ នៅភូមិព្រៃកឹក ឃុំប្រសាទភ្នំខ្យង ស្រុកកំពង់ត្រាច ។
ប្រភពព័ត៌មានបានឲ្យដឹងថា អាពាហ៍ពិពាហ៍នេះ មានកូនកម្លោះឈ្មោះ ណ.ម នៅភូមិឃ្លីតលើ ឃុំខ្ជាយខាងជើង ស្រុកដងទង់ ខេត្តកំពត កូនក្រមុំឈ្មោះ ទ.ក នៅភូមិកើតហេតុ ។
ប្រភពព័ត៌មានបានឲ្យដឹងទៀតថា អាពាហ៍ពិពាហ៍នេះខាងស្រី ធ្វើម្ហូបទទួលភ្ញៀវ៤០តុ រីឯខាងប្រុសធ្វើម្ហូបទទួលភ្ញៀវ ១០០តុ ហើយការទទួលភ្ញៀវទាំងខាងប្រុសទាំងខាងស្រីប្រកបដោយសប្បាយរីករាយ ដោយមានការប្រគុំតន្ត្រីសម័យ យ៉ាងរណ្ដំផងដែរ ប៉ុន្តែនៅវេលាម៉ោង១០ និង៣០នាទីយប់ ខណៈកំពុងរាំយ៉ាងសប្បាយរីករាយនោះ ស្រាប់តែភ្ញៀវខាងកូនកម្លោះ និងភ្ញៀវខាងកូនក្រមុំ បានឈ្លោះគ្នារហូតដល់វាយតប់គ្នា និងគប់កែវ គប់កៅអីឆ្វេចឆ្វាចធ្វើឲ្យអ្នក ចូលរួមពិធី និងក្រុមតន្ត្រីរត់បាត់ជើងសព្រាត ។
ការឈ្លោះទាស់ទែងគ្នានេះ បណ្ដាលឲ្យមានមនុស្សរបួសធ្ងន់៤នាក់ និងរងរបួសស្រាលជាច្រើននាក់ ហើយកូនប្រុសម្ចាស់ដើមការ ខាងស្រីម្នាក់ និងសាច់ញាតិម្នាក់ បានរងរបួសបែកក្បាល ត្រូវបានគេបញ្ជូនទៅសង្គ្រោះ នៅប្រទេសវៀតណាមទាំងយប់ ។ រីឯឈ្មោះ ណ. ខ ជាឪពុកកូនកម្លោះ និងបុរសម្នាក់ទៀត ជាសាច់ញាតិខាងកូនកម្លោះ ក៏បានរងរបួសដែរ ។
ប្រភពព័ត៌មានបានបញ្ជាក់ថា ក្រោយពេលផ្ទុះហិង្សា កូនកម្លោះបានឡើងទៅលើផ្ទះដើម្បីជួបកូនក្រមុំ ប៉ុន្តែត្រូវឪពុកកូនកម្លោះ ហៅឲ្យចុះមកវិញជាប្រញាប់ ហើយត្រឡប់ទៅផ្ទះវិញទាំងយប់ដោយមិនផ្សំដំណេក ជាមួយកូនស្រីឡើយ ។
ឪពុកកូនក្រមុំ បានឲ្យសមត្ថកិច្ចដឹងនៅព្រឹកថ្ងៃទី១៧ ខែមករា ឆ្នាំ២០១៧ថា គាត់មិនបានដឹងរឿងទេ ស្រាប់តែពេលកំពុងរាំ ក៏ឃើញមនុស្សរត់ព្រាតតែម្តង ៕
ប្រភព៖ កោះសន្តិភាព
ដោយឡែកក្រឡេទៅមើល ព័ត៌មានចាប់អារម្មណ៍មួយផ្សេងទៀត៖
ចិន៖ រថភ្លើងមួយខ្សែ នឹងត្រូវធ្វើដំណើរក្នុងរយៈចម្ងាយជាង ១២ ០០០គីឡូម៉ែត្រ ពីប្រទេសចិន ទៅកាន់ទីក្រុងឡុងដ៏ ដែលជាផ្លូវធ្វើពាណិជ្ជកម្មជំនួញសូត្រមួយ កាលពីសម័យបុរាណ ហើយត្រូវយកមកប្រើប្រាស់ជាថ្មីក្នុងសម័យនេះ។ នេះបើយោងតាមការចុះផ្សាយរបស់សារព័ត៌មាន ដេលីម៉ែល កាលពីថ្ងៃទី១៦ ខែមករា ឆ្នាំ២០១៧។
ក្បាលរថភ្លើងឈ្មោះ The East Wind មួយខ្សែនេះ នឹងចាកចេញពីប្រទេសចិន ដោយឆ្លងកាត់ប្រទេសរុស្ស៊ី កាហ្សាក់ស្ថាន បេឡារូស ប៉ូឡូញ បែលហ្សិក និងបារាំង មុនពេលដែលវាចូលទៅដល់ចំណត Hackney Rail Freight ភាគខាងកើតទីក្រុងឡុងដ៏។
ប្រភពព័ត៌មានបានឲ្យដឹងថា រថភ្លើងមួយនេះ ត្រូវដឹកទំនិញចំនួន ៣៤ទូ ចេញពីរោងចក្រ ក្នុងទីក្រុង Yiwu ភាគខាងកើតប្រទេសចិន ដោយត្រូវចំណាយពេលធ្វើដំណើរចំនួន ១៦ថ្ងៃ។ ហើយក្នុងការធ្វើដំណើរមួយនេះ រថភ្លើងត្រូវឆ្លងកាត់ជួរភ្នំជាច្រើន វាលខ្សាច់ និងតំបន់ដ៏ធំល្វឹងល្វើយនៅប្រទេសរុស្ស៊ី។
ខ្សែរថភ្លើង The East Wind គឺជាការបង្កើតឲ្យមានការរស់ឡើងវិញនៃផ្លូវធ្វើពាណិជ្ជកម្មជំនួញសូត្របុរាណ ហើយក៏ជាជំនាន់ថ្មីមួយ នៃទំនាក់ទំនងរវាងអង់គ្លេស និងចិនផងដែរ។ កាលពីមុន ផ្លូវនេះត្រូវបានប្រើដោយពួកឈ្មួញ ដើម្បីនាំយកផលិតផលរបស់ខ្លួនទៅកាន់តំបន់អឺរ៉ុប។
រថភ្លើង The East Wind ត្រូវបានដំណើរការដោយក្រុមហ៊ុនវិនិយោគរបស់ចិន Yiwu Timex ហើយនឹងរត់ម្ដងក្នុងមួយសប្តាហ៍ក្នុងអំឡុងពេលដាក់ឲ្យដំណើរការជាលើកដំបូងនេះ ។ ខណៈលោក Oscar Lin អ្នកចាត់ការទូទៅខ្សែរថភ្លើងថ្មី នៃ UK agent Onetwothree Logistics របស់អង់គ្លេស បាននិយាយថា “សេវាកម្មរថភ្លើងដឹកទំនិញនេះ បានបញ្ជាក់នូវភាពជាដៃគូពាណិជ្ជកម្មយ៉ាងសំខាន់រវាងចក្រភពអង់គ្លេស និងប្រទេសចិន”។
ដោយសារតែរង្វាស់នៃផ្លូវរថភ្លើងខុសៗគ្នា ក្នុងប្រទេសនីមួយៗ រថភ្លើងតែមួយមិនអាចបំពេញបេសកកម្មនៃការធ្វើដំណើរមួយនេះបាននោះទេ ប៉ុន្តែសម្រាប់រថភ្លើង The East Wind មួយខ្សែនេះវាអាចធ្វើបាន។ ការធ្វើដំណើរមួយនេះ នឹងលឿនជាងការដឹកជញ្ជួនតាមកប៉ាល់ដឹកទំនិញធំៗ ហើយមានតម្លៃថោកជាងពាក់កណ្តាល នៃតម្លៃក្នុងការដឹកជញ្ជូនទំនិញតាមផ្លូវអាកាស។ វានឹងធ្វើឲ្យទីក្រុងឡុងដ៍ ក្លាយជាទីក្រុងទី១៥ ដែលត្រូវបានតភ្ជាប់ដោយផ្ទាល់ទៅកាន់ប្រទេសចិន៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]