ខេត្តមណ្ឌលគិរី ៖ មានការភ្ញាក់ផ្អើលមួយកាលពីល្ងាចថ្ងៃទី១៦ ខែមករា ឆ្នាំ២០១៧ នៅចំណុចព្រៃរបោះតូចៗលើដីព្រលានយន្តហោះ ស្ថិតក្នុងភូមិចម្ការតែ សង្កាត់ស្ពានមានជ័យ ក្រុងសែនមនោរម្យ ខណៈអ្នករត់ម៉ូតូឌុបម្នាក់បានប្រទះឃើញគ្រោងឆ្អឹងសាកសពមិនស្គាល់អត្តសញ្ញាណម្នាក់ ដែលគេនាំគ្នាដាក់ការសង្ស័យថា ជាករណីឃាតកម្ម តែសមត្ថកិច្ចសន្និដ្ឋានជំហានដំបូងថា ជាករណីអត្តឃាត ។
ប្រជាពលរដ្ឋជាច្រើននាក់ដែលទៅមើលឃើញឆ្អឹងសពមិនស្គាល់អត្តសញ្ញាណនោះបានឲ្យដឹងថា ហើយបើគេពិនិត្យមើលតាមការជាក់ស្ដែងសភាពគ្រោងឆ្អឹងខាងលើបានរលេះរលួយអស់ទៅហើយ នៅសល់តែគ្រោងឆ្អឹង ដោយជនរងគ្រោះស្លាប់រយៈពេលយូរណាស់មកហើយ ។
លោក សូ សុវណ្ណ ស្នងការរងទទួលបន្ទុកកណ្ដាលយុត្តិធម៌ នៃស្នងការរដ្ឋាននគរបាលខេត្តមណ្ឌលគិរី បានឲ្យដឹងថា គ្រោងឆ្អឹងជនរងគ្រោះខាងលើត្រូវបានអ្នករត់ម៉ូតូឌុបប្រទះឃើញកាលពីល្ងាចថ្ងៃទី១៦ ខែមករា ហើយគាត់បានរាយការណ៍ទៅសមត្ថកិច្ចនគរបាល ។ លោកថា ជាបឋមសមត្ថកិច្ចសន្និដ្ឋានថា ជាករណីអត្តឃាត ព្រោះសមត្ថកិច្ចនៅមិនទាន់ដឹងពីអត្តញ្ញាណ្ណសពនៅឡើយទេ ។
លោកស្នងការរងបានបញ្ជាក់ថា សាកសពខាងលើអាចនឹងស្លាប់រយៈពេលយ៉ាងតិច៦ខែមកហើយ ហើយក្រុមការងារជំនាញកំពុងធ្វើការស្រាវជ្រាវលើករណីនេះ ។ លោកបន្ថែមថា កាលពី៦ខែមុន នៅឃុំពូជ្រៃ ស្រុកពេជ្រាដា មានករណីមនុស្សប្រុសបាត់ខ្លួនម្នាក់ លោកកំពុងបញ្ជាឲ្យមេប៉ុស្តិ៍នៅទីនោះ ស្រាវជ្រាវរកបងប្អូនឲ្យទៅមើលសពនៅព្រលានយន្តហោះនោះហើយ ក្រែងមានតម្រុយខ្លះ ។
នៅជិតគ្រោងឆ្អឹងសពខាងលើគេឃើញមានស្បែកជើងរបស់មនុស្សប្រុសមួយគូ ធ្វើពីស្បែក ពណ៌ខ្មៅ ចំណែកខោអាវ និងរបស់របរផ្សេងៗទៀតគេមិនបានឃើញនោះទេ ៕
ប្រភព៖ កោះសន្តិភាព
ក្រឡេកទៅមើលព័ត៌មាន ចាប់អារម្មណ៍មួយផ្សេងទៀត៖
បុរសបាញ់សត្វក្ងោក១ក្បាល សារភាពថា សម្លាប់យកទៅធ្វើម្ហូបយ៉ាងឆ្ញាញ់ពិសារ
រាជធានីភ្នំពេញ៖ មានការរិះគន់តៗគ្នាជាច្រើនបន្តបន្ទាប់ហូរហែរ លើសកម្មភាពរបស់បុរសម្នាក់ ដែលបានប្រើជំពាមកាំស៊ូ បាញ់សត្វក្ងោកដ៏សែនស្លូតចំនួន១ក្បាល ក្នុងចំណោមសត្វ៤ក្បាល ដែលហោះហើរទុំលេងលើដំបូលផ្ទះប្រជាពលរដ្ឋ នៅក្នុងភូមិទ្រា២ សង្កាត់ស្ទឹងមានជ័យ ខណ្ឌមានជ័យ បានចូលមកសារភាពហើយ នៅម៉ោង១២ថ្ងៃទី១៦ ខែមករា នៅចំពោះមុខអាជ្ញាធរសង្កាត់ និងមន្ត្រីអភិរក្សសត្វព្រៃ ។
បុរសដែលប្រព្រឹត្តិអំពើមិនគម្បីខាងលើមានឈ្មោះ ខេង ពៅ អាយុ៦៥ឆ្នាំ មានទីលំនៅ ភូមិទ្រា២ សង្កាត់ ស្ទឹងមានជ័យ ខណ្ឌមានជ័យ រាជធានីភ្នំពេញ ។ រូបគេបានឆ្លើយសារភាពមុខអាជ្ញាធរថា ខ្លួនពិតជាបានបាញ់សម្លាញ់សត្វក្ងោកខាងលើពិតប្រាកដមែន ហើយក្រោយពេលបាញ់សម្លាញ់ហើយនោះ ខ្លួនបានយកសត្វខាងលើ ទៅចំអិនធ្វើជាម្ហូបយ៉ាងឆ្ញាញ់ពិសារអស់ទៅហើយ បន្សល់ទុកតែរោមក្ងោកបីបួនសសៃ ជាភ័ស្ដុតាងតែប៉ុណ្ណោះ ។
ការចូលឆ្លើយមកសារភាពបន្តថា ខ្លួនបានប្រព្រឹត្តិកាលពីល្ងាចថ្ងៃទី១៥ ខែមករា ឆ្នាំ២០១៧ បន្ទាប់ពីមានបណ្តាញសង្គមចុះផ្សាយព្រោងព្រាតពីរូបខ្លួន ព្រមទាំងចោទថា ជាជនជាតិវៀតណាមទៀតផង ប៉ុន្តែពុំមែននោះទេ រូបខ្លួនគឺជាជនជាតិខ្មែរ ។
យ៉ាងណាមិញរូបគេបានទទួលស្គាល់នូវកំហុសដែលបានប្រព្រឹត្តិ ដូច្នេះអាជ្ញាធរបានធ្វើការអប់រំណែនាំដល់គេ ឈប់បន្តសកម្មភាពបែបនេះទៀត ប្រសិនបើយើងឃើញមានសត្វព្រៃ ឬបក្សាបក្សី យើងគួរគម្បីធ្វើការរាយការណ៍ជូនមកសមត្ថកិច្ចមូលដ្ឋាន ដើម្បីអាជ្ញាធរមូលដ្ឋានធ្វើការទំនាក់ទំនងទៅកាន់មន្ត្រីអភិរក្ស ឬជំនាញពាក់ព័ន្ធអោយមកទទួលយកពពួកសត្វទាំងនេះ ទៅប្រលែងនៅទីវាល សមរម្យសម្រាប់ស្របតាមលក្ខណៈជីវសាស្ត្ររបស់ពួកវា ជៀសវៀងការបាញ់សម្លាប់ដូចសកម្មភាពបែបនេះ វាអាចធ្វើអោយហិនហោចនូវប្រភេទសត្វធម្មជាតិរបស់ប្រទេសយើង ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
