រាជធានីភ្នំពេញ ៖ លោក ស្រី រតនា នាយកមណ្ឌលសុខភាពផ្សារដើមថ្កូវ រួមទាំងបុគ្គលិក៣នាក់ទៀត បានត្រូវនគរបាលខណ្ឌ ចំការមន ឃាត់ខ្លួនពីបទជំរិតទារប្រាក់ប្រចាំខែពីក្រុមអាជីវករ លក់ដូរលើចិញ្ចើមផ្លូវសាធារណៈ នៅជុំវិញរបងមណ្ឌលសុខភាព ក្រោយពីផ្ទុះការតវ៉ារឿង ដំឡើងថ្លៃក្នុងមួយតូបចំនួន ២០ដុល្លារបន្ថែមទៀតដល់ពួកគាត់ចំនួន២៨តូប ក៏មានការលើកគ្នា មកដាក់ពាក្យបណ្តឹងនៅប៉ុស្តិ៍នគរបាលផ្សារដើមថ្កូវ ។
ការឃាត់ខ្លួននាយក និងបុគ្គលិកមណ្ឌលសុខភាព ចំនួន៣នាក់ទៀតនេះ បានធ្វើឡើងកាលពីវេលាម៉ោង១១និង២០នាទីព្រឹកថ្ងៃទី៦ ខែមករា នៅមណ្ឌលសុខភាពខាងលើ ស្ថិតនៅកែងផ្លូវលេខ ៤៣០និងផ្លូវលេខ១៦៣ ក្នុងសង្កាត់ផ្សាដើមថ្កូវ ខណ្ឌចំការមន ។
តាមប្រភពព័ត៌មានពី នគរបាលបានឱ្យដឹងថា មន្ត្រីនិងបុគ្គលិកពេទ្យទាំង៤នាក់ដែលឃាត់ខ្លួនមាន ៖
១-ឈ្មោះ ស្រី រតនា ភេទប្រុស អាយុ៤៩ឆ្នាំ ជានាយកមណ្ឌល សុខភាពផ្សារដើមថ្កូវ មានទីលំនៅផ្ទះលេខ១៥BEo ផ្លូវលេខ៣៣៦ សង្កាត់ផ្សារដើមគ ខណ្ឌទួលគោក ២-ឈ្មោះ អ/wg សៀងប៉ាង ភេទស្រី អាយុ៦៥ឆ្នាំ ជាបុគ្គលិកពេទ្យ (អ្នកដើរប្រមូលលុយ) មានទីលំនៅផ្ទះលេខ៨៤E1 ផ្លូវលេខ១៨២ សង្កាត់បឹងព្រលិត ខណ្ឌ៧មករា ៣-ឈ្មោះ ចាន់ សុខា ភេទប្រុស អាយុ៦៥ឆ្នាំ ជាកម្មករសំណង់ (អ្នកដើរប្រមូលលុយ) មានទីលំនៅផ្ទះលេខ១២៧ ផ្លូវលំ ភូមិកោះប្រាក់់ ឃុំគគីរធំ ស្រុកកៀនស្វាយ ខេត្តកណ្តាល និង៤-ឈ្មោះ សេង វាសនា ភេទប្រុស អាយុ៣៥ឆ្នាំ ជាបុគ្គលិកភោជនីយដ្ឋាន(អ្នកដើរប្រមូលលុយ) មានទីលំនៅផ្ទះលេខ១០B ផ្លូវបេតុង សង្កាត់ដង្កោ ខណ្ឌដង្កោ ។
ការឃាត់ខ្លួនអ្នកទាំង៤នាក់ ខាងលើនេះ គឺធ្វើឡើងក្រោយពីមានក្រុមអាជីវករចំនួន២៨នាក់ នាំគ្នាមកដាក់ពាក្យ បណ្តឹងនៅប៉ុស្តិ៍នគរបាល ប៉ុស្តិ៍ផ្សារដើមថ្កូវ ដើម្បីធ្វើការតវ៉ាទៅនឹងលោក ស្រី រតនា នាយកមណ្ឌលសុខភាពផ្សារដើមថ្កូវ និងបុគ្គលិកចំនួន៣នាក់ ដែលដើរទារប្រាក់ដំឡើង ថ្លៃតូបរបស់ពួកគាត់ ក្នុងមួយតូបចំនួន២០ដុល្លារបន្ថែមទៀត ។
តាមប្រភពដដែលបន្តទៀតថា ចាប់តាំងពីឆ្នាំ២០១៤មក ពេលដែលលោក ស្រី រតនា មកកាន់តំណែង ជានាយកមណ្ឌល សុខភាពផ្សាដើមថ្កូវ គឺលោកបានដើរទារប្រាក់ពីការលក់ដូររបស់បងប្អូន អាជីវករទាំងនោះក្នុងមួយតូប ចាប់ពី២០ដុល្លារ ទៅ៣០ដុល្លារ ទៅ៥០ដុល្លារ និងរហូតដល់៧០ដុល្លារ ដោយក្នុងមួយខែលោកទារបានប្រាក់សរុបចំនួន ៥៨០ដុល្លារ ។
ទោះបីជាបែបណា លោក ស្រី រតនា បានអះអាងថា កាប្រមូលប្រាក់ពីក្រុមអាជីវករទាំងនោះ ដើម្បីយកទៅជប់លៀងជូនដល់ បុគ្គលិកពេទ្យទាំងអស់ដែលកំពុងបម្រើការងារនៅក្នុងមណ្ដលសុខភាព ផ្សារដើមថ្កូវជារៀងរាល់ឆ្នាំ ។ ប៉ុន្តែការនិយាយនេះ ក៏មានក្រុមបុគ្គលិកពេទ្យ មួយចំនួនធ្វើការ អះអាងប្រឆាំងវិញថា ពួកគាត់មិនដែលទទួលបានការជប់លៀង ឬយកមកដាក់ហោប៉ៅ មួយរៀលឡើយ គឺយកដាក់ហោប៉ៅ តែប៉ុន្មាននាក់នោះប៉ុណ្ណោះ ។
មានការលើកឡើងថា ក្នុងរយៈពេលជាង៣ឆ្នាំ ក្នុងអាណត្តិរបស់លោក ស្រី រតនា មកកាន់ជានាយកមណ្ឌល សុខភាពផ្សារដើមថ្កូវនេះ លោកតែងតែប្រមូលប្រាក់ពីក្រុមអាជីវករក្នុងមួយខែ៥៨០ដុល្លារ ហើយយកទៅដាក់ហោប៉ៅខ្លួនឯងប៉ុណ្ណោះ ។
ក្រោយពីទទួលបាន ការសារភាពពីលោក ស្រី រតនា នាយកមណ្ឌលសុខភាពផ្សារដើមថ្កូវ រួមទាំងក្រុមបុគ្គលិក ពេទ្យទាំង៣នាក់ ដែលបានឃាត់ខ្លួនពីបទជំរិតទាប្រាក់ពីក្រុមអាជីវករលក់ដូរទាំងនោះ ក៏បាននាំមកធ្វើការសាកសួរ និងកសាងសំណុំរឿងបញ្ជូនទៅកាន់អធិការដ្ឋាន នគរបាលខណ្ឌចំការមន ដើម្បីចាត់ការទៅតាមនិតិវិធី ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]