ខេត្តកំពង់ចាម ៖ រឿងដ៏ចម្លែក ដែលនឹកស្មានមិនដល់ ដោយសារកូនក្រមុំ ដែលគ្រោងនឹងចូលរោងការ ក្នុងពេលឆាប់ៗខាងមុខនេះ បែរជាបាត់ខ្លួននៅក្នុងផ្សារធំ ក្រុងកំពង់ចាម ក្នុងពេលដែលដើរ មកទិញឡេលាបមុខ កាលពីវេលាម៉ោង១០ និង៣០នាទីព្រឹកថ្ងៃទី៣០ វិច្ឆិកា ២០១៦ កន្លងមក ។ ស្ត្រីជាបងបានប្រញាប់ មកប្តឹងសមត្ថកិច្ចមូលដ្ឋាន ដើម្បីឱ្យជួយអន្តរាគមន៍តាមរក តែមិនមានតំរុយទាល់តែសោះ ។
តាមដំណឹងចុងក្រោយថា នាងបានគេចពីរោងការ ហើយកំពុងតែនៅជាមួយនឹងមិត្តភក្តិស្រីកន្លែងមួយ ដែលមានសុវត្ថិភាព តែមិនបានបញ្ជាក់ពីទីកន្លែងនោះទេ ។
លោកទាម តុងម៉េង នាយប៉ុស្ត៏សង្កាត់កំពង់ចាមឲ្យដឹងនៅរសៀលថ្ងៃទី២ ធ្នូ ២០១៦ថា នៅវេលាម៉ោង៨ព្រឹកថ្ងៃកើតហេតុខាងលើឈ្មោះសាន ដានី បានជិះរថយន្តឈ្មួលចេញពីផ្ទះនៅភូមិ-ឃុំរោងចក្រ ស្រុកចំការលើ ឆ្ពោះមកក្រុងកំពង់ចាម ដើម្បីយករូបថតសម្រាប់ដាក់តាំងមុខរោងការ ដែលគ្រោងនឹងប្រព្រឹត្តិនៅថ្ងៃទី២២ ធ្នូ ២០១៦ ខាងមុខនេះ ។
ក្រោយពីបានយករូបថតរួច ក៏នាំគ្នាឆ្ពោះមកកាន់ផ្សារធំក្រុងកំពង់ចាម ដើម្បីទិញទំនិញបន្តទៀត ក្នុងពេលនោះវេលាម៉ោង១០និង៣០នាទីព្រឹក ប្អូនស្រីឈ្មោះចិន្តា (កូនក្រមុំ) បានដើរមកទិញឡេ សម្រាបលាបខ្លួន លុះពេលដែលបងស្រីកំពុងតែឈរទិញនោះ ស្រាប់តែប្អូនមកទិញនៅកន្លែងផ្សេង ស្រាប់តែបាត់ខ្លួនតែម្តង មិនដឹងជាទៅទីណានោះទេ ។
បន្ទាប់មក ស្ត្រីជាបងបានប្រញាប់ មកកាន់ប៉ុស្តិ៍រដ្ឋបាល សង្កាត់កំពង់ចាម ដើម្បីប្តឹងសមត្ថកិច្ចឲ្យជួយស្រាវជ្រាវតាមរកប្អូនស្រី
ដែលបាត់នោះ ។ រូបលោកបានរាយការណ៏ ជូនលោកអធិការនគរបាលក្រុងកំពង់ចាម ព្រមទាំងលោកវរសេនីយ៏ឯកចាន់ ហោ នាយរងការិយាលកណ្តាលព្រហ្មទណ្ឌខេត្ត ដោយបានទាក់ទង ដល់បណ្តាប៉ុស្តិ៍ រដ្ឋបាលនានានា ព្រមទាំងអធិការដ្ឋាននគរបាលស្រុកផ្សេងៗទៀត ដោយបានបញ្ជូនរូបតាម ប្រព័ន្ធវ៉ាត់អាប់ នៅតែមិនទាន់មានដំណឹងណាមួយទេ ។
លោកទាម តុងម៉េង នាយប៉ុស្តិ៍រដ្ឋបាលសង្កាត់ កំពង់ចាមបញ្ជាក់ថា រូបលោកបានទទួលដំណឹងថា នៅថ្ងៃទី១ ធ្នូ ក្រោយពីបានបាត់ខ្លួន១ថ្ងៃ ដែលធ្វើឲ្យអ្នកផ្ទះមានការភិតភ័យ និងព្រួយកង្វល់ជាខ្លាំង ចំពោះថ្ងៃរៀបអាពាហ៍ពិពាហ៍ថ្ងៃខាងមុខ ថាតើនឹងត្រូវដោះស្រាយ ដោយរបៀបណានោះ ព្រោះកូនស្រីឈ្មោះចិន្តា បានទូរស័ព្ទមកម្តាយរបស់ខ្លួននៅស្រុកចំការលើ ព្រមទាំងបានប្រាប់ថា នាងនៅកន្លែងមួយ ដែលមានសុវត្ថិភាពថែមទាំងយំផង តែមិនបានបញ្ជាក់ពី ទីកន្លែងនោះទេ ។
លោកថា កូនក្រមុំដែលបាត់ខ្លួននោះ ទំនងជាមិនពេញចិត្ត នឹងការរៀបមង្គលការខាងលើ ទើបរត់គេចខ្លួនបែបនេះ ហើយសមត្ថកិច្ចកំពុងតែ ស្រាវជ្រាវតាមរកបន្ត ។
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]