ឪពុកតារាសម្តែងស្រីថៃ នាង Kimberley ទទួលមរណភាព ក្រោយចេញពីការវះកាត់

ថៃ៖ បន្ទាប់ពីលោក Hans Wolthomas ឪពុករបស់តារាសម្តែងស្រីនាង Kimmy Kimberley ឬ Kimberley Ann Thomas ធ្លាក់ខ្លួនឈឺជាទម្ងន់ និងបានសម្រាកព្យាបាល នៅមន្ទីរពេទ្យដោយទទួលការវះកាត់ជាបន្ទាន់ផងនោះ កាលពីព្រឹកមិញនេះលោក Hans Wolthomas បានទទួលមរណៈភាពហើយ។

ការចាកចេញនេះបានធ្វើឱ្យក្រុមគ្រួសារនាង Kimberley ទាំងមូលមានទុក្ខសោកក្រៀមក្រំជាខ្លាំង ហើយសាកសពរបស់លោក Hans Wolthomas បានតម្កល់ទុកធ្វើបុណ្យរយៈពេល៧ថ្ងៃ នៅឯវត្ត Phrasri Mahathat Woramahawihan បរិវេណសាលពិធីបូជាសពលេខ៣។ ចំណែកឯពិធីបូជាសព នឹងប្រារព្ធធ្វើឡើងនៅថ្ងៃទី៣ ខែធ្នូ ឆ្នាំ២០១៦ ខាងមុខនេះ នៅវេលាម៉ោង ១៦:00 រសៀល។

គួរឱ្យដឹងផងដែរថា បន្ទាប់ពីបានទទួលការវះកាត់ចុងក្រោយ ប្រមាណជា២សប្តាហ៍មុននេះលោក Hans Wolthomas បានទទួលការមើលថែទាំ យ៉ាងជិតដិតពីសំណាក់ក្រុមគ្រួសារ ដោយនាង Kimberley ក៏បានលុបចោលការសម្តែង និងកម្មវិធីជាច្រើនទៀត ជាអ្នកគាំទ្រដើម្បីនៅថែរក្សាឪពុករបស់នាងយ៉ាងជិតស្និទ្ធ។ ប៉ុន្តែគួរឱ្យសោកស្តាយដែលលោក Hans Wolthomas នៅតែមិនអាចជាសះស្បើយបាន។

ដំណឹងនេះក៏បានធ្វើឱ្យអ្នកគាំទ្រសោកស្តាយយ៉ាងខ្លាំង និងពួកគេទាំងអស់គ្នា ក៏បានផ្ញើសារចូលរួមរំលែកទុក្ខនាង Kimberley ពីចម្ងាយ ទាំងនៅក្នុង IG និងនៅក្នុងបណ្តាញទំនាក់ទំនងសង្គមហ្វេសប៊ុក៕

• យុវវ័យ
• គ្រួសារ