កំពង់ចាម៖ ការប្រកួតកីឡាជាតិនៃវិញ្ញាសាហែលទឹកទាំងផ្នែកបុរស និងផ្នែកនារី បានបញ្ចប់ហើយកាលពីម្សិលមិញនេះ នៅមជ្ឃមណ្ឌលកីឡាហែលទឹកតេជោសែន ស្ថិតក្នុងខេត្តកំពង់ចាម។
ក្នុងនោះ កីឡាការិនី ហែមថុន វិទីនី ដែលតំណាងឲ្យក្រសួងមហាផ្ទៃ បានឈ្នះនូវមេដាយមាសចំនួន៤ម្នាក់ឯង នៅក្នុងការប្រកួតកីឡាជាតិឆ្នាំ២០១៦។
ទន្ទឹមនឹងនេះ កាលពីយប់មិញ កីឡាការិនីរូបនេះ ក៏បានថ្លែងប្រាប់នៅក្នុងគណនីបណ្តាញសង្គមរបស់នាងផងដែរថា «ការប្រកួតរបស់ខ្ញុំគឺបានបញ្ចប់ហើយ។ ដំណឹងល្អសម្រាប់ក្រុមក្រសួងមហាផ្ទៃ គឺខ្ញុំឈ្នះមេដាយមាសចំនួន៤» ។
ជាមួយនឹងជ័យជំនះមេដាយមាសចំនួន៤ វិទីនី ក៏បានទទួលការអបអរសាទរពីសំណាក់អ្នកគាំទ្រជាច្រើននាក់ នៅក្នុងបណ្តាញសង្គមហ្វេសប៊ុកផងដែរ។
កីឡាការិនីឆ្នើមរូបនេះបន្តទៀតថា «ក្រសួងមហាផ្ទៃអើយខ្ញុំជួយបានត្រឹមតែមាស 4ទេ...មិនដឹងថាមហាផ្ទៃយើងអាចជាប់ចំណាត់ថ្នាក់លេខ១ ក្រុមក្នុងការប្រកួតកីឡាជាតិលើកនេះឬក៏អត់ទេ ស៊ូស៊ូទាំងអស់គ្នា» ។
គួរបញ្ជាក់ផងដែរថា បច្ចុប្បន្ននេះ ក្រសួងមហាផ្ទៃកំពុងស្ថិតក្នុងចំណាត់លេខ២ នៃតារាងមេដាយសរុប ខណៈរាជធានីភ្នំពេញកំពុងនាំមុខ ឈរលេខ១ បណ្តោះអាសន្ន៕
កំណត់ហេតុខ្មែរឡូត៖
ដោយឡែក រំលឹកព័ត៌មានចាស់លើកមុនផងដែរថា កីឡាវាយសី បញ្ចប់បេសកកម្មប្រកួតកីឡាជាតិ ខណៈរាជធានីភ្នំពេញ ឈ្នះមេដាយច្រើនជាងគេ ។ គួររំលឹកផងដែរថា កីឡាវាយសី បានបញ្ចប់បេសកកម្មចូលរួមប្រកួតកីឡាជាតិ លើកទី១ ដែលជាព្រឹត្តិការណ៍ប្រវត្តិសាស្ដ្ររបស់កម្ពុជាហើយ បន្ទាប់ពីដំណើរការនៃការប្រកួតអស់រយៈពេល ៥ថ្ងៃ កាលពីថ្ងៃទី២៩ ខែតុលា ដល់ថ្ងៃទី២ ខែវិច្ឆិកា ឆ្នាំ២០១៦ កន្លងទៅ នៅលើទីលានពហុកីឡដ្ឋានជាតិ ប៉ុន្ដែប្រភេទកីឡាមួយចំនួនធំ នៅមិនទាន់បញ្ចប់នោះទេ គ្រាដែលពិធីបិទការប្រកួតផ្លូវការ នឹងធ្វើឡើងនៅថ្ងៃទី៥ ខែវិច្ឆិកាចុងសប្តាហ៍តែម្តង។
សម្រាប់លទ្ធផលនៃការប្រកួតកីឡាវាយសីនេះ ចំណាត់ថ្នាក់លេខ១ ចំពោះក្រុមដណ្ដើមបានមេដាយច្រើនជាងគេ គឺបានទៅក្រុមកីឡារាជធានីភ្នំពេញ ដែលដណ្ដើមបានមេដាយសរុប ៥គ្រឿង រួមមានមេដាយមាស ៣វិញ្ញាសា មេដាយប្រាក់ ១វិញ្ញាសា និងមេដាយសំរឹទ្ធ ១វិញ្ញាសា ហើយចំណាត់ថ្នាក់លេខ២ បានទៅក្រុមកីឡាមកពីខេត្តកំពង់ឆ្នាំង ដណ្ដើមបានមេដាយមាស ៣វិញ្ញាសា។
លោក ជាម សុភា អគ្គលេខាធិការសហព័ន្ធកីឡាវាយសីកម្ពុជាបានឲ្យដឹងថា «ការប្រកួតនេះបានបញ្ចប់ដោយជោគជ័យ ទាំងគណៈកម្មការរៀបចំ គណៈកម្មការឲ្យពិន្ទុ និងការប្រកួតរបស់កីឡាករ-កីឡាការិនីជាដើម គឺសុទ្ធតែប្រកបដោយភាពយុត្តិធម៌ត្រឹមត្រូវ។ តាមរយៈការប្រកួតនេះ លោករំពឹងថា ស៊ីហ្គេម ឆ្នាំ២០២៣ នៅពេលកម្ពុជាធ្វើម្ចាស់ផ្ទះនោះ កីឡាវាយសីនឹងមានសមត្ថភាពគ្រប់គ្រាន់ ដើម្បីរៀបចំទទួលក្រុមភ្ញៀវមកពីបណ្ដាប្រទេសផ្សេងៗទៀតក្នុងប្លុកអាស៊ាន»។
គួរបញ្ជាក់ផងដែរថា មកទល់ពេលនេះ មានកីឡា ៥ប្រភេទហើយ ដែលបានបញ្ចប់ការប្រកួតក្នុងព្រឹត្តិការណ៍កីឡាជាតិនេះ គឺមានកីឡាវាយសី ប៉េតង់ តេក្វាន់ដូ វាយកូនឃ្លីលើតុ និងកីឡាសូរិនហ្សិកាំប៉ូ ខណៈកីឡាកាយសម្ព័ន្ធវិញ គ្រោងនឹងបញ្ចប់នៅល្ងាចថ្ងៃទី២ ខែវិច្ឆិកានេះ។ ចំណែកកីឡាកំពុងបន្ដយុទ្ធនាការយ៉ាងក្ដៅគគុកលើទីលាន រួមមានកីឡាអត្តពលកម្ម ហែលទឹក ចំបាប់ ល្បុក្កតោ បាល់បោះ បាល់ទាត់ បាល់ទះ ប្រដាល់ និងកីឡាវាយកូនបាល់៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]