(ភ្នំពេញ)៖ ក្រុមបាល់ទាត់ឈុតធំជម្រើសជាតិកម្ពុជា នឹងជួបប្រកួតជាលក្ខណៈមិត្តភាពអន្តរជាតិទល់នឹងម្ចាស់ផ្ទះសិង្ហបុរី (Singapore) នារាត្រីថ្ងៃអាទិត្យ ទី១៣ ខែវិច្ឆិកា ឆ្នាំ២០១៦ ខាងមុខ ដើម្បីត្រៀមប្រកួតពានរង្វាន់អាស៊ាន AFF Suzuki Cup 2016 ដូចគ្នា នេះបើយោងតាមលោក ខៀវ សាម៉េត អនុប្រធានសហព័ន្ធកីឡាបាល់ទាត់កម្ពុជា ថ្លែងប្រាប់ Khmertalking នាព្រឹកថ្ងៃទី១ ខែវិច្ឆិកានេះ។
ក្រុមដែលមានរហស្សនាមថា «គោព្រៃ» នោះបានចាប់ផ្ដើមប្រមូលផ្ដុំកីឡាករជាថ្មីនាថ្ងៃទី៣១ ខែតុលា នៅឯទីលានមជ្ឈមណ្ឌល និងសាលាបាល់ទាត់ជាតិបាទី ខេត្តតាកែវ បន្ទាប់ពីប្រកាសរំសាយ១សប្ដាហ៍ ក្រោយយកឈ្នះគូប្រជែង ៣ប្រកួតជាប់គ្នាក្នុងនាមម្ចាស់ផ្ទះវគ្គជម្រុះបឋមនៃពានរង្វាន់ AFF Suzuki Cup 2016 កាលពីពេលថ្មីៗកន្លងទៅ។
លោក ខៀវ សាម៉េត បានបញ្ជាក់ថា «ការប្រមូលផ្ដុំហ្វឹកហាត់នេះ គឺធ្វើឡើង ដើម្បីត្រៀមប្រកួតសន្សំពិន្ទុក្នុងពូលនៃពាន AFF Suzuki Cup 2016 ខណៈក្រុមដែលកំពុងឈរនៅលេខ១៦៧ ក្នុងតារាងចំណាត់ថ្នាក់ពិភពលោករបស់ FIFA ស្ថិតក្នុងពូល B ជាមួយក្រុមម្ចាស់ផ្ទះមីយ៉ាន់ម៉ា ម៉ាឡេស៊ី និងវៀតណាម ដែលនឹងចាប់ផ្ដើមការប្រកួតនៅថ្ងៃទី២០ ខែវិច្ឆិកា ឆ្នាំ២០១៦ ខាងមុខនេះហើយ»។
កម្ពុជា ទើបតែយកឈ្នះសិង្ហបុរី ២-១ ក្នុងមិត្តភាពអន្តរជាតិនេះដូចគ្នាកាលពីថ្ងៃទី២៨ ខែកក្កដា ក្រោមក្រសែភ្នែក អ្នកចូលរួមទស្សនាផ្ទាល់ពេញស្តាតតែម្តង ប្រមាណជាង៥ម៉ឺននាក់ និងក្រោមដំណក់ទឹកភ្លៀងផងដែរនោះ ហើយក្រុម ក៏ដែលកំពុងឈរនៅចំណាត់ថ្នាក់លេខ១៧១ ក្នុង FIFA Ranking សិង្ហបុរី ក៏ត្រៀមប្រកួតពាន AFF Suzuki Cup 2016 ផងដែរ ដោយស្ថិតក្នុងពូល A ជាមួយម្ចាស់ផ្ទះហ្វីលីពីន ឥណ្ឌូនេស៊ី និងក្រុមការពារតំណែងជើងឯកថៃ។
ជាការត្រៀមខ្លួននេះទៀតសោត ក្រុមជម្រើសជាតិកម្ពុជា នឹងមានការប្រកួតមិត្តភាពអន្ដរជាតិផ្លូវការមួយ មុននឹងចេញដំណើរទៅប្រទេសមីយ៉ាន់ម៉ា គឺត្រូវជួបក្រុមជម្រើសជាតិសិង្ហបុរី នៅថ្ងៃទី១៣ ខែវិច្ឆិកាខាងមុខ ដើម្បីពង្រឹងសមត្ថភាពកីឡាករបន្ថែម ក៏ដូចជាជម្រុះកីឡាករ ៣នាក់ចេញ ទុក២៣នាក់ទៅប្រកួតប្រជែងដណ្ដើមកៅអីវគ្គពាក់កណ្ដាលផ្ដាច់ព្រ័ត្រនៃពាន AFF Suzuki Cup 2016 ខាងលើផងដែរ ដែលគ្រោងនឹងចាកចេញពីកម្ពុជានៅថ្ងៃទី១១ ខែវិច្ឆិកាខាងមុខនេះ៕
ប្រភព៖ Khmertalking
កំណត់ហេតុខ្មែរឡូត៖
ដោយឡែក រំលឹកព័ត៌មានចាស់លើកមុនផងដែរថា ក្រុមជម្រើសជាតិកម្ពុជាលើកពានវគ្គជម្រុះ AFF SUZUKI CUP 2016 ។ គួររំលឹកផងដែរថា ទីបំផុតក្រុមជម្រើសជាតិកម្ពុជា បានសាងនូវប្រវត្តិសាស្ត្រគួឱ្យភ្ញាក់ផ្អើលបំផុត និងមិនធ្លាប់មានអស់រយៈពេល៨ឆ្នាំមកនេះ បន្ទាប់ពីបានយកឈ្នះលើកក្រុមជម្រើសជាតិទីម័រខាងកើត នៅក្នុងលទ្ធផល៣-២ នាការប្រកួតវគ្គជម្រុះចុងក្រោយ ពានធំប្រចាំតំបន់អាស៊ាន AFF Suzuki Cup 2016 នៅលើទីលានពហុកីឡដ្ធានជាតិកាលពីថ្ងៃសុក្រទី២១ កន្លងមកនេះ។
គួរំលឹកផងដែរថា ចាប់តាំងពីឆ្នាំ២០០៨មក ក្រុមជម្រើសជាតិកម្ពុជាពុំដែលបានឆ្លងផុតវគ្គជម្រុះម្ដងណាឡើយ ។ ដោយឡែកនៅក្នុងឆ្នាំ២០១៦នេះ ក្រុមជម្រើសជាតិកម្ពុជា ក្នុងឋានៈជាម្ចាស់ផ្ទៈរៀបចំការប្រកួត បានយកឈ្នះ៣ប្រកួតជាប់គ្នា ធ្វើឱ្យក្រុមជម្រើសជាតិកម្ពុជា មានឱកាសបានឡើងទៅវគ្គប្រកួតចែកពូល ជាបន្ត ។
សម្រាប់ការប្រកួតនៅក្នុងវគ្គជម្រុះចុងក្រោយជាមួយក្រុមជម្រើសជាតិទីម័រ ក្រុមជម្រើសជាតិកម្ពុជាពិតជាធ្វើបានល្អមែនទែន គ្រាន់តែបើកឆាកប្រកួត២នាទីដំបូង ត្រូវកីឡាករ ទិត្យ ឌីណា ទាត់បញ្ចូលទីក្រុមទីម័រខាងកើតបាន ១គ្រាប់នាំមុខមុន ខណៈ១គ្រាប់ទៀត រកបានដោយកីឡាករខ្សែប្រយុទ្ធ ចាន់ វឌ្ឍនាកា ពាក់អាវលេខ១១ នៅនាទីទី១៧ មុនពេលក្រុមទីម័រ តាមសងបាន២គ្រាប់វិញ គឺនៅនាទីទី២០ ដែលជាគ្រាប់បាល់ទាត់ប៉េណាល់ទី ចម្ងាយ១១ម៉ែត្រ ជាថ្វីជើងរបស់កីឡាករ Anggisu ពាក់អាវលេខ៦ និង១គ្រាប់ទៀត រកបានដោយកីឡាករពាក់អាវលេខ២២ Nelson នៅនាទី៣៥ ទោះជាយ៉ាងណាក្រុមជម្រើសជាតិកម្ពុជា នៅតែធ្វើការព្យាយាមលេងវាយសម្រុក ដើម្បីរកគ្រាប់បន្ថែមនាំមុខទាល់តែបាន គឺនៅនាទី៧៧ កីឡាករ ចាន់ វឌ្ឍនាការ ជាអ្នកសម្រេចបាននូវគ្រាប់ទី២របស់ខ្លួន ធ្វើឱ្យចប់ការប្រកួត ក្រុមជម្រើសជាតិកម្ពុជាបានយកឈ្នះលើកក្រុមជម្រើសជាតិ ទីម័រខាងកើត នៅក្នុងលទ្ធផល៣ទល់នឹង២។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
